Ezekiel 18

Ilonggo (Maayong Balita nga Biblia (2012))

← Chapter 17 Jump to: Chapter 19 →

1Ang Ginoo naghambal liwat sa akon,

2“Ano bala ang buot silingon sining hulobaton nga ginasulitsulit sang mga tawo sa duta sang Israel? ‘Ang mga ginikanan nagkaon sang maaslom nga mga ubas, kag nagngilo ang mga ngipon sang mga kabataan.’”

3Ang Ginoo nga Gamhanan nagasiling, “Subong nga ako ang Dios nga buhi, indi na ninyo pagsuliton ini nga hulobaton sa Israel.

4Ang kabuhi sang tagsa ka tawo akon, ginikanan ukon bata. Ang tawo nga nagapakasala mapatay.

5“Abi, kon may isa ka tawo nga maayo gid, matarong kag maminatud-on,

6wala sia nagasimba sa mga diosdios sang mga Israelinhon ukon nagakaon sang mga halad nga gindulot sa mga altar nga ginadilian. Wala sia nagapakighilawas sa asawa sang iban nga tawo ukon nagapakighirop sa isa ka babayi nga yara ang iya pamulanon.

7Wala sia nagadaya ukon nagapangawat sa iban. Ginauli niya ang bisan ano nga ginaprenda sa iya, ginapakaon niya ang ginagutom kag ginahatagan niya sing bayu ang hublas nga tawo.

8Wala sia nagapahulam sing pasakaan. Wala sia nagahimo sing malain kag nagahukom sia nga wala sing pinilian sa mga nagainaway.

9Ina nga tawo nagatuman sang akon mga sugo kag nagahimo sing maayo sang akon mga kasugoan. Matarong sia kag magakabuhi,” siling sang Ginoo nga Gamhanan.

10“Abi, kon ini nga tawo may anak nga lalaki nga nagapangawat kag nagapamatay, kag nagahimo sang mga butang

11nga wala gid ginhimo sang iya amay: Nagakaon sia sang mga halad nga ginadulot sa ginadilian nga mga altar kag nagapakighilawas sa asawa sang iban nga tawo.

12Nagadaya sia sa mga imol, nagapangawat, kag wala niya ginauli ang ginaprenda sa iya. Nagakadto sia sa mga altar sang mga pagano, nagasimba sa makahuloya nga mga diosdios,

13kag nagapahulam sia sing kwarta nga pasakaan. Magakabuhi bala sia? Indi! Ginhimo niya ini tanan nga makahuloya nga mga butang kag tungod sini mapatay sia. Sia ang may salabton sang iya kamatayon.

14“Abi, kon ini nga tawo may isa ka anak nga lalaki. Nakita niya ang tanan nga mga sala nga ginhimo sang iya amay kag wala sia magsunod sini.

15Wala sia nagasimba sa mga diosdios sang mga Israelinhon ukon nagakaon sang mga halad nga ginadulot sa ginadilian nga mga altar. Wala sia nagapakighilawas sa asawa sang iban nga tawo,

16ukon nagapigos sa kay bisan sin-o ukon nagapangawat. Ginauli niya ang ginaprenda sa iya. Ginapakaon niya ang ginagutom kag ginahatagan niya sing bayu ang hublas nga tawo.

17Wala sia nagahimo sing malains kag wala sia nagapahulam sing pasakaan. Ginatuman niya ang akon mga kasugoan kag ginahimo niya ang akon mga sugo. Indi sia mapatay tungod sang mga sala sang iya amay, kundi magakabuhi sia.

18Ang iya amay nagpangdaya kag nagpangawat kag naghimo sing malain sa tagsatagsa. Gani, napatay sia tungod sang iya mga sala.

19“Pero nagapamangkot kamo, ‘Ngaa bala indi dapat mag-antos ang anak tungod sang mga sala sang iya amay?’ Ang sabat amo ini: ang anak naghimo sing matarong kag maayo. Ginhimo niya ang akon mga kasugoan kag gintuman ini sing maayo, gani magakabuhi gid sia.

20Ang nagapakasala amo ang mapatay. Ang anak indi dapat mag-antos tungod sang mga sala sang iya amay, ukon ang amay tungod sang mga sala sang iya anak. Ang maayo nga tawo pagabalusan tungod sang iya ginahimo nga maayo, kag ang malaut nga tawo magaantos tungod sang kalautan nga iya ginahimo.

21“Kon ang malaut nga tawo mag-untat sa pagpakasala kag magtuman sang akon mga sugo, kon maghimo sia sang matarong kag maayo, indi gid sia mapatay, kundi magakabuhi gid sia.

22Ang tanan niya nga mga sala patawaron kag magakabuhi sia, tungod kay ginhimo niya ang matarong.

23Nagahunahuna bala kamo nga ako, ang Ginoo nga Gamhanan nalipay magtan-aw nga mapatay ang isa ka malaut nga tawo? Indi, kundi luyag ko nga maghinulsol sia kag magkabuhi.

24“Pero kon ang isa ka matarong nga tawo mag-untat sa paghimo sing maayo kag maghimo sang tanan nga kalautan kag makahuloya nga mga butang nga ginahimo sang malaut nga mga tawo, magapadayon bala sia sa pagkabuhi? Indi! Ang tanan niya nga hinimuan nga maayo indi na pagdumdomon. Mapatay sia tungod sang pagbiya niya sang iya pagtuo kag tungod sang iya mga sala.

25“Pero nagasiling kamo, ‘Indi husto ang ginahimo sang Ginoo.’ Pamati kamo, mga Israelinhon. Nagahunahuna bala kamo nga indi husto ang akon ginahimo? Kamo ang nagahimo sang indi husto.

26Kon ang matarong nga tawo mag-untat sa paghimo sing maayo, kag maghimo sing malain kag dayon mapatay, tungod sang iya ginhimo nga malaut mapatay sia.

27Kon ang malaut nga tawo mag-untat sa pagpakasala kag maghimo sing matarong kag maayo, maluwas niya ang iya kabuhi.

28Kon matalupangdan niya ang iya ginahimo kag mag-untat sia sa pagpakasala, indi gid sia mapatay, kundi magakabuhi.

29Kag kamo nga mga Israelinhon nagasiling, ‘Indi husto ang ginahimo sang Ginoo.’ Nagahunahuna bala kamo nga indi husto ang akon ginahimo? Kamo ang nagahimo sang indi husto.

30“Gani, ako ang Ginoo nga Gamhanan nagasiling sa inyo nga mga Israelinhon nga hukman ko kamo suno sa inyo ginhimo. Untati ninyo ang tanan nga kalautan nga inyo ginahimo, kag indi pagtugoti nga malaglag kamo tungod sang inyo sala.

31Untati ang tanan nga kalautan nga inyo ginahimo kag bag-uha ang inyo mga hunahuna kag ang inyo mga tagipusoon. Mga Israelinhon, ngaa bala luyag kamo magkalamatay?

32Wala ako sing luyag nga may isa sa inyo nga mapatay. Mag-untat kamo sa pagpakasala kag magkabuhi,” siling sang Ginoo nga Gamhanan.

← Chapter 17 Jump to: Chapter 19 →