Ezekiel 44

Ilonggo (Maayong Balita nga Biblia (2012))

← Chapter 43 Jump to: Chapter 45 →

1Gindala ako sang tawo sa nagwa nga pwerta sa nasidlangan nga bahin sang Templo. Ang pwerta sirado,

2kag ang Ginoo nagsiling sa akon, “Ini nga pwerta magapabilin nga sirado kag indi gid pag-abrihan. Wala sing tawo nga makagamit sini, tungod kay ako, ang Ginoo nga Dios sang Israel, nagsulod paagi sini. Magapabilin ini nga sirado.

3Pero ang nagagahom nga pangulo sarang makakadto didto sa pagkaon sang balaan nga kalan-on sa akon presensya. Magasulod sia kag magagwa sa pwerta nga alagyan paagi sa entrada nga kwarto sa nasulod nga punta.”

4Dayon gindala ako sang tawo pakadto sa atubangan sang Templo sang Ginoo paagi sa naaminhan nga pwerta. Nagtan-aw ako kag nakita ko ang Templo nga napuno sang masilaw nga kasanag nga nagapahayag sang iya presensya. Naghapa ako sa duta,

5kag ang Ginoo nagsiling sa akon, “Tawo nga mamalatyon, talupangda sing maayo ang tanan nga imo makita kag mabatian. Isugid ko sa imo ang tanan nga mga kasugoan kag mga pagsulondan para sa Templo. Talupangda sing maayo kon sin-o nga mga tawo ang mapahanugotan sa pagsulod kag paggwa sa Templo kag kon sin-o ang indi.

6“Singgana inang mabinatuon nga mga tawo sang Israel nga ako, ang Ginoo nga Gamhanan, indi na magtugot sang makahuloya nga mga butang nga ila ginhimo tubtob karon.

7Ginpasipalahan nila ang akon Templo paagi sa pagpasulod sang mga di-tinuli nga mga dumoluong, mga tawo nga wala nagatuman sa akon, samtang ginadulot sa akon ang sapay kag dugo sang mga halad. Gani, ang akon mga tawo naglapas sang akon kasugtanan paagi sining tanan nga makahuloya nga mga butang nga ila ginhimo.

8Wala sila magdumala sang balaan nga mga hilikuton sa akon Templo, sa baylo gintugyan nila ini sa mga dumoluong.

9“Ako, ang Ginoo nga Gamhanan, nagasiling nga wala sing di-tinuli nga dumoluong, wala sing di-matinumanon sa akon, nga magsulod sa akon Templo, bisan ang isa ka dumoluong nga nagaestar sa tunga sang akon mga tawo nga Israelinhon.”

10Ang Ginoo nagsiling sa akon, “Ginasilutan ko ang mga Levita upod sa mga tawo sang Israel nga nagsikway sa akon kag nagsimba sa mga diosdios.

11Sarang sila makaalagad sa akon sa Templo paagi sa pagbantay sa mga pwerta kag sa pag-obra sa Templo. Makaihaw sila sang mga sapat nga ginadulot sang mga tawo subong mga halad nga sinunog kag iban pa nga mga halad, kag kinahanglan handa sila sa pag-alagad sa mga tawo.

12Pero tungod kay ginpangunahan nila ang mga tawo sang Israel sa pagsimba sa mga diosdios kag paagi sini gindala nila ang mga tawo sa pagpakasala, ako, ang Ginoo nga Gamhanan, nagasumpa nga dapat gid sila silutan.

13Indi sila dapat mag-alagad sa akon subong mga pari, ukon magpalapit sa mga butang nga akon ginpakabalaan, ukon magsulod sa Labing Balaan nga Duog. Amo ini ang silot tungod sang makahuloya nga mga butang nga ila ginhimo.

14Ginahatag ko sa ila ang tanan nga mabudlay nga mga ulobrahon sa Templo.”

15Ang Ginoo nga Gamhanan nagsiling, “Pero ang Levita nga mga pari nga mga kaliwat ni Sadoc nagpadayon sa pag-alagad sa akon sing matutom sa Templo samtang ang iban nga mga tawo sang Israel nagsikway sa akon. Gani karon sila amo ang magaalagad sa akon kag magapalapit sa akon presensya sa pagdulot sa akon sang sapay kag sang dugo sang mga halad.

16Sila lamang amo ang magasulod sa akon Templo, magaalagad sa akon altar, kag magadumala sang pagsimba sa Templo.

17Kon magsulod sila sa alagyan pakadto sa nasulod nga pasiyuhan sang Templo, kinahanglan magbayu sila sing lino. Indi sila magbayu sang bisan ano nga nahimo sa delana kon nagaalagad sila sa nasulod nga pasiyuhan ukon sa Templo.

18Agod indi sila pagbalhason kinahanglan magsuksok sila sang lino nga mga turbante kag lino nga mga karsonsilyo, kag indi sila maggamit sing paha.

19Sa wala pa sila makakadto sa nagwa nga pasiyuhan sa diin yara ang mga tawo, kinahanglan ubahon anay nila ang mga bayu nga ila ginasuksok sa ila pag-alagad sa Templo kag ibilin ini sa balaan nga mga kwarto. Kinahanglan mag-ilis sila sing bayu agod nga ang ila balaan nga bayu indi makahalit sa mga tawo.

20“Ang mga pari indi dapat magpakiskis sang ila mga ulo ukon magpalaba sang ila buhok. Kinahanglan ang nagakabagay lang nga kalabaon.

21Ang mga pari indi dapat mag-inom sing bino kon manugsulod sila sa nasulod nga pasiyuhan.

22Ang pari indi magpangasawa sang isa ka babayi nga balo ukon ginbulagan. Kinahanglan ang iya pangasaw-on amo lamang ang birhen nga Israelinhon ukon ang balo sang isa ka pari.

23“Ang mga pari kinahanglan magtudlo sa akon mga tawo sang kinatuhay sang balaan kag sang indi balaan, sang matinlo kag sang indi matinlo.

24Kon may yara nga pag-inakusahay ang mga pari amo ang magahukom sang kaso suno sa akon mga kasugoan. Saulogon nila ang akon gintalana nga mga piesta suno sa akon mga kasugoan kag mga pagsulondan, kag pakabalaanon nila ang mga Adlaw nga Inugpahuway.

25“Ang pari indi magdagta sang iya kaugalingon paagi sa pagtandog sang isa ka bangkay, luas lamang kon ini iya amay ukon iloy, ukon isa sang iya mga kabataan, ukon utod nga lalaki, ukon utod nga babayi nga wala sing bana.

26Sa tapos sia makapaninlo liwat, dapat sia maghulat sing pito ka adlaw,

27dayon magsulod sia sa nasulod nga pasiyuhan sang Templo kag magdulot sing isa ka halad para sa iya pagpaninlo, agod makaalagad sia liwat sa Templo. Ako, ang Ginoo nga Gamhanan, amo ang naghambal sini.

28“Ang panublion sang mga pari nga akon ginhatag sa Israel amo ang pagkapari nga ila ipaalinton halin sa isa ka kaliwatan pakadto sa isa. Indi sila dapat magpanag-iya sing pagkabutang sa Israel. Ako lamang amo ang ila kinahanglan.

29Ang mga halad nga kalan-on kag mga halad tungod sa sala kag paglapas manginkalan-on sang mga pari, kag sila ang magabaton sang tanan nga pagkabutang sa Israel nga ginpain para sa akon.

30Ang mga pari magabaton sang labing maayo sang nahauna nga mga patubas kag sang tanan nga ginahalad sa akon. Sa tagsa ka pagluto sang mga tawo sing tinapay, ang nahauna nga tinapay nga maluto ihatag nila sa mga pari subong isa ka halad, kag ang akon bendisyon magapabilin sa ila mga panimalay.

31Ang mga pari indi dapat magkaon sang pispis ukon sapat nga napatay ukon ginpatay sang iban nga sapat.”

← Chapter 43 Jump to: Chapter 45 →