Ezekiel 5

Ilonggo (Maayong Balita nga Biblia (2012))

← Chapter 4 Jump to: Chapter 6 →

1Ang Ginoo nagsiling, “Tawo nga mamalatyon, kuha ka sing matalom nga espada kag gamita ini sa pagkiskis sang imo bungot kag sang tanan mo nga buhok. Dayon timbanga ini kag partidaha sa tatlo ka parti.

2Sunoga ang ikatlo nga bahin sini sa siudad kon tapos na ang pagkibon. Kuhaa pa gid ang isa sang tatlo ka bahin sini kag pang-utda sang imo espada samtang nagalibot ka sa gwa sang siudad. Isabwag sa kahanginan ang nabilin nga ikatlo ka bahin sini kag panglab-on ko ini sang akon espada.

3Ibilin ang pila ka nahot nga buhok kag putsa sa sidsid sang imo bayu.

4Dayon kuha ka liwat sing pila ka nahot sini kag ihaboy sa kalayo agod masunog. Gikan sini ang kalayo magalapnag sa bug-os nga Israel.”

5Ang Ginoo nga Gamhanan nagsiling, “Tan-awa ang Jerusalem. Ginbutang ko sia sa tunga sang kalibutan, kag ginalibutan sia sang mga kapungsoran.

6Pero ang Jerusalem nagbato sa akon mga sugo, kag nagpakita nga sia labi pa ka malauton sang sa iban nga mga pungsod, labi pa ka di-matinumanon sang sa mga pungsod sa palibot niya. Ang Jerusalem nagsikway sang akon mga sugo kag wala magtuman sang akon mga kasugoan.

7Karon, Jerusalem, pamati ka sa akon, ang Ginoo nga Gamhanan. Sa imo di-pagtuman sang akon mga kasugoan kag di-pagbantay sang akon mga sugo, madamo nga kagamo ang imo nahimo sang sa mga pungsod sa palibot nimo. Nagsunod ka sa mga pagsulondan sang iban nga mga pungsod.

8Gani, ako, ang Ginoo nga Gamhanan, nagasiling sa imo nga ako imo kaaway. Pagasilutan ko ikaw sa atubangan sang mga pungsod.

9Tungod sang tanan nga mga butang nga inyo ginahimo nga akon ginakaakigan, silutan ko ang Jerusalem sobra pa sang nahimo ko sang una kag indi ko na ini paghimuon liwat.

10Tungod sini, sa Jerusalem ang mga ginikanan magakaon sang ila mga kabataan, kag ang mga kabataan magakaon sang ila mga ginikanan. Silutan ko kamo, kag paalaplaagon sa bug-os nga kalibutan ang bisan sin-o nga mabilin nga buhi.

11“Gani, subong nga ako, ang buhi nga Dios—amo ini ang ginasiling sang Ginoo nga Gamhanan: tungod kay gindagtaan mo ang akon Templo sang tanan nga kalautan kag makangilil-ad nga mga butang nga imo ginhimo, pagasilutan ko ikaw nga wala sing luoyluoy.

12Ang ikatlo nga bahin sang imo mga tawo magakalamatay sa balatian kag gutom sa siudad. Ang ikatlo nga bahin pamatyon paagi sa mga espada sa gwa sang siudad, kag ang ikatlo pa gid nga bahin paalaplaagon ko bisan diin kag lagson ko sila sang espada.

13“Patilawon ko kamo sang gahom sang akon nagabalingaso nga kaakig tubtob maumpawan ako. Kon matabo ini, magakilala kamo nga ako, ang Ginoo, naghambal sa inyo sa daku nga kaakig tungod sang inyo pagkadi-matutom.

14Ang mga tawo sa mga kapungsoran sa palibot ninyo nga magaagi magahikay kag magapalayo sa inyo.

15“Kon magbalingaso ang akon kaakig sa inyo kag silutan ko kamo, ang tanan nga mga kapungsoran sa palibot ninyo magakahadlok gid. Tamayon kag hikayan nila kamo.

16Indi ko kamo paghatagan sing kalan-on kag gutomon kamo. Mabatyagan ninyo ang kahapdi sang gutom kaangay sang mataliwis nga mga baslay nga akon ginpadala sa paglaglag sa inyo.

17Padalhan ko kamo sing gutom kag mga sapat nga talunon sa pagpatay sang inyo mga kabataan, kag magakalamatay kamo sa balatian, paghingabot kag inaway. Ako, ang Ginoo, naghambal sini.”

← Chapter 4 Jump to: Chapter 6 →