Ezekiel 46

Ilonggo (Maayong Balita nga Biblia (2012))

← Chapter 45 Jump to: Chapter 47 →

1Ang Ginoo nga Gamhanan nagasiling, “Ang nasidlangan nga pwerta pakadto sa nasulod nga pasiyuhan kinahanglan takpan sa sulod sang anom ka adlaw nga inug-obra, pero paabrihan ini sa Adlaw nga Inugpahuway kag sa Piesta sang Lati.

2Ang nagagahom nga pangulo magahalin sa nagwa nga pasiyuhan pakadto sa entrada nga kwarto sang alagyan kag magatindog sa tupad sang mga haligi sang pwerta samtang ang mga pari nagadulot sang iya mga halad nga sinunog sing bug-os kag mga halad sa paghiambit. Dapat magasimba sia didto sa pwerta, dayon magabalik sia paggwa. Ang pwerta indi dapat pagtakpan tubtob sa gab-i.

3Sa tagsa ka Adlaw nga Inugpahuway kag sa tagsa ka Piesta sang Lati, kinahanglan ang tanan nga mga tawo magluhod kag magsimba man sa Ginoo sa atubangan sang pwerta.

4Sa Adlaw nga Inugpahuway ang pangulo magadala sa Ginoo sing anom ka mga kordero, kag isa ka karnero nga lalaki nga wala sing bisan ano nga depekto, subong mga halad nga sinunog.

5Kinahanglan magdulot sia sing halad nga kalan-on nga tunga sa sako upod sa isa ka karnero nga lalaki kag ang bisan ano nga luyag niya ihatag upod sa isa ka kordero. Sa tagsa ka tunga sa sako nga halad nga kalan-on magdala sia sing tatlo ka litro nga lana sang olivo.

6Sa pagsugod sang Piesta sang Lati magahalad sia sing isa ka torite nga baka, anom ka bilog nga kordero, kag isa ka karnero nga lalaki, nga wala sing mga bisan ano nga depekto.

7Ang halad nga kalan-on tunga sa sako upod sa isa ka toro nga baka kag isa ka karnero nga lalaki, kag ang bisan ano nga luyag niya ihatag upod sa isa ka kordero. Sa tagsa ka tunga sa sako nga halad nga kalan-on magdulot sia sang tatlo ka litro nga lana sang olivo.

8Ang pangulo kinahanglan maggwa sa entrada nga kwarto sang pwerta nga alagyan subong sang iya pagsulod.

9“Kon mag-abot ang mga tawo sa pagsimba sa Ginoo sa bisan ano nga piesta, ang mga nagasulod paagi sa naaminhan nga pwerta, magagwa paagi sa nabagatnan nga pwerta sa tapos sila makasimba. Ang mga nagasulod sa nabagatnan nga pwerta magagwa paagi sa naaminhan nga pwerta. Wala sing may magbalik paggwa paagi sa iya gin-agyan pasulod, kundi ang tagsatagsa maggwa sa pihak nga pwerta.

10Ang pangulo magasulod upod sa mga tawo kag magagwa upod man sa mga tawo.

11Sa mga adlaw sang piesta kag sa nagkalainlain nga mga piesta, ang halad nga kalan-on tunga sa sako nga harina para sa tagsa ka torite nga baka ukon karnero nga lalaki, kag ang bisan ano nga luyag ihatag sang manugsimba upod sa tagsa ka kordero. Ang tatlo ka litro nga lana sang olivo idulot upod sa tunga sa sako nga halad nga kalan-on.

12“Kon ang nagagahom nga pangulo luyag magdulot sang isa ka halad nga kinabubot-on sa Ginoo, isa ka halad nga sinunog ukon isa ka halad sa paghiambit, ang nasidlangan nga pwerta pakadto sa nasulod nga pasiyuhan pagaabrihan para sa iya. Himuon niya ini subong sang iya ginahimo sa Adlaw nga Inugpahuway, kag ang pwerta pagatakpan sa tapos sia makabalik paggwa.”

13Ang Ginoo nagasiling, “Kada aga ang kordero nga nagaedad sing isa ka tuig nga wala sing bisan ano nga depekto pagasunogon sing bug-os subong halad sa Ginoo. Ini nga halad kinahanglan himuon kada adlaw.

14Ang halad nga kalan-on nga mga duha ka kilo nga harina kag mga isa ka litro nga lana sang olivo nga isamo sa harina idulot kada aga. Ang mga pagsulondan sini nga halad sa Ginoo kinahanglan ipatuman sa walay katapusan.

15Ang kordero, ang harina, kag ang lana sang olivo kinahanglan ihalad sa Ginoo kada aga sa walay katapusan.”

16Ang Ginoo nga Gamhanan nagamando, “Kon ang nagagahom nga pangulo maghatag sang bisan diin nga bahin sang iya duta nga ginapanag-iyahan sang isa sang iya mga anak nga lalaki subong isa ka dulot, mangin-iya ini sang amo nga anak subong nga bahin sang pagkabutang sang iya panimalay.

17Pero kon ang nagagahom nga pangulo maghatag sang bisan diin nga bahin sang iya duta sa bisan sin-o nga nagaalagad sa iya, mangin-iya ini liwat sang pangulo kon mag-abot ang Tuig sang Paghilway. Iya ini pagkabutang, kag sia lamang kag ang iya mga anak nga lalaki ang makapanag-iya sini sa walay katubtoban.

18Ang nagagahom nga pangulo indi dapat magkuha sang bisan ano nga pagkabutang sang mga pumoluyo. Ang iya ihatag nga duta sa iya mga anak nga lalaki kuhaon niya sa duta nga iya parti, agod indi niya pagpiguson ang bisan sin-o sang akon mga tawo paagi sa pagkuha sang ila duta.”

19Dayon gindala ako sang tawo sa alagyan sang mga kwarto nga nagaatubang sa aminhan malapit sa pwerta sa nabagatnan nga bahin sang nasulod nga pasiyuhan. Amo ini ang balaan nga mga kwarto para sa mga pari. Gintudlo niya ang isa ka lugar sa nakatundan nga bahin sang mga kwarto

20kag nagsiling, “Amo ini ang lugar sa diin ang mga pari magalaga sang karne nga ginadulot subong mga halad tungod sa sala ukon paglapas, kag sa pagluto sang mga halad nga kalan-on, agod wala sing butang nga balaan nga dalhon sa nagwa nga pasiyuhan, sa diin mahalitan ang mga tawo.”

21Dayon gindala niya ako sa nagwa nga pasiyuhan kag ginpakita niya sa akon nga sa tagsa sang apat ka pamusod may magamay nga pasiyuhan, nga sesentay otso ka tapak ang kalabaon kag kwarentay otso ka tapak ang kasangkaron.

23Ang kada-isa sini nalibutan sing pader nga mga bato, kag may mga dapog sa tupad sang pader.

24Ang tawo nagsiling sa akon, “Amo ini ang mga kusina sa diin ang mga alagad sang Templo nagalaga sang mga halad nga ginadulot sang mga tawo.”

← Chapter 45 Jump to: Chapter 47 →