Ezekiel 28

Ilonggo (Maayong Balita nga Biblia (2012))

← Chapter 27 Jump to: Chapter 29 →

1Ang Ginoo naghambal sa akon,

2“Tawo nga mamalatyon, sugiri ang hari sang Tiro sang ginasiling ko sa iya, ako, ang Ginoo nga Gamhanan: Nanginbugalon ka kag nagasiling ka nga ikaw isa ka dios. Nagasiling ka nga ikaw kaangay sang isa ka dios nga nagapungko sa trono sa tunga sang kadagatan. Bisan ikaw isa ka tawo kag indi isa ka dios, pero nagapakadios ikaw.

3Nagahunahuna ka nga mas maalam pa ikaw sang sa kay Daniel, nga wala sing sekrito nga indi mo mahibal-an.

4Tungod sang imo kaalam kag abilidad nagmanggaranon ka kag nagdamo ang imo bulawan kag pilak.

5Paagi sa imo kaabtik sa negosyo nagmanggaranon ikaw, kag tungod sang imo manggad nagpabugal ka!

6“Gani karon, amo ini ang ginasiling ko, ako, ang Ginoo nga Gamhanan: Tungod kay nagahunahuna ka nga maalam ikaw subong sang isa ka dios,

7ipasalakay ko ikaw sa mapintas nga mga kaaway. Pagalaglagon nila ang tanan mo nga matahom nga mga pagkabutang nga imo naangkon paagi sa imo abilidad kag kaalam.

8Patyon nila ikaw kag itagbong sa tubion nga lulobngan.

9Kon mag-abot sila sa pagpatay sa imo, makasiling ka pa bala nga isa ikaw ka dios? Kon mag-atubang ka sa mga nagapatay sa imo, mangin-isa ikaw ka tawo kag indi isa ka dios.

10Mapatay ka subong sang isa ka ido sa kamot sang di-diosnon nga mga dumoluong. Ako, ang Ginoo nga Gamhanan, amo ang nagmando sini.”

11Ang Ginoo naghambal sa akon liwat,

12“Tawo nga mamalatyon, maglalaw ka tungod sa madangatan sang hari sang Tiro. Sugiri sia sang ginasiling ko, ako, ang Ginoo nga Gamhanan: Isa ikaw anay ka ehemplo sang pagkahimpit. Daw ano kaalam kag kagwapo sa imo sadto anay!

13Nag-estar ka sa Eden, sa katamnan sang Dios, kag nagsuksok sang tanan nga sahi sang malahalon nga mga alahas: mga rubi kag mga diamante, topasio, berilo, kornalina, haspe, sapiro, esmeralda, kag karbunklo. Napunihan ka sang bulawan. Ginhimo ini para sa imo sa adlaw sang pagtuga sa imo.

14Nagbutang ako didto sing isa ka makakulogmat nga anghel sa pagbantay sa imo. Nag-estar ikaw sa akon balaan nga bukid kag naglakat sa tunga sang nagaigpat-igpat nga mga alahas.

15Himpit ang imo pagginawi halin sang pagtuga sa imo tubtob nga naghimo ka sing malaut.

16Masako ka sa imo negosyo kag tungod sini nagpamintas ka kag nagpakasala. Gani gintabog ko ikaw gikan sa akon balaan nga bukid. Ang anghel nga nagbantay sa imo nagtabog sa imo gikan sa tunga sang nagaigpat-igpat nga mga alahas.

17Nagpabugal ka tungod sang imo kagwapo, kag tungod sang imo pagkabantog nagbinuang ka tungod sini. Ginhaboy ko ikaw sa duta, kag ginbayaan ko ikaw subong isa ka paandam sa iban nga mga hari.

18Naghimo ikaw sing kalautan sa imo negosyo sa bagay nga ang mga lugar nga imo ginasimbahan nadagtaan. Gani gintutdan ko ang siudad kag naupos ini. Ang tanan nga nagatan-aw sa imo nakakita nga ikaw nangin-abo.

19Nadula na ikaw sa walay katubtoban, kag ang tanan nga mga kapungsoran nga nakakilala sa imo ginkugmat, kag hinadlukan nga basi amo man ang ila madangatan.”

20Ang Ginoo nagsiling sa akon,

21“Tawo nga mamalatyon, pakamalauta ang siudad sang Sidon.

22Sugiri ang mga tawo didto sang akon ginasiling, ako, ang Ginoo nga Gamhanan: Sidon, ako ang imo kaaway. Ang mga tawo magadayaw sa akon tungod sang akon ginahimo sa imo. Magakilala sila nga ako amo ang Ginoo kon mapakita ang akon pagkabalaan paagi sa pagsilot sang imo mga pumoluyo.

23Padalhan ko ikaw sing mga balatian, kag pabahaon ko ang dugo sa imo mga kalsada. Pagasalakayon ka sa imo bug-os nga palibot, kag pamatyon ang imo mga pumoluyo. Dayon magakilala ka nga ako amo ang Ginoo.”

24Ang Ginoo nagsiling, “Ang mga kapungsoran sa palibot sang Israel nga nagtamay sa iya, indi na manginkaangay liwat sang mga tunok nga makahalit sa iya. Kag makilala nila nga ako amo ang Ginoo nga Gamhanan.”

25Ang Ginoo nga Gamhanan nagsiling, “Tipunon ko ang mga tawo sang Israel halin sa mga kapungsoran sa diin ginpaalaplaag ko sila, kag ang tanan nga mga pungsod magakilala nga ako balaan. Ang mga tawo sang Israel magaestar sa ila kaugalingon nga duta, ang duta nga ginhatag ko sa akon alagad nga si Jacob.

26Magaestar sila didto nga indi maano. Magapatindog sila sing mga balay kag magatanom sing mga ubas. Pagasilutan ko ang tanan nila nga mga kaingod nga nagtamay sa ila, kag ang Israel magaestar nga may kalinong. Dayon makilala nila nga ako, amo ang Ginoo nga ila Dios.”

← Chapter 27 Jump to: Chapter 29 →