Ezekiel 10

Ilonggo (Maayong Balita nga Biblia (2012))

← Chapter 9 Jump to: Chapter 11 →

1Dayon gintan-aw ko ang arko sa ibabaw sang mga ulo sang mga kerubin, kag sa ibabaw nila may yara nga daw trono nga nahimo sa sapiro.

2Ang Dios nagsiling sa tawo nga nagabayo sing lino, “Sulod ka sa gintung-an sang mga rueda sa idalom sang mga kerubin, maghakop ka sing mga baga, kag isabwag ini sa siudad.” Nakita ko nga naglakat sia.

3Ang mga kerubin nagatindog sa bagatnan nga bahin sang Templo sang iya pagsulod, kag may panganod nga nagpuno sang nasulod nga pasiyuhan.

4Ang masilaw nga kapawa nga nagapahayag sang presensya sang Ginoo nagpaibabaw halin sa mga kerubin pakadto sa pwertahan sang Templo. Dayon ang Templo napuno sang panganod kag ang pasiyuhan napuno sang kasilaw sang kasanag.

5Ang ginahod sang mga pakpak sang mga kerubin mabatian bisan sa nagwa nga bahin sang pasiyuhan. Subong ini katunog sang tingog sang Dios nga Makagagahom.

6Sang pagsugo sang Ginoo sa tawo nga nagabayo sing lino sa pagkuha sing kalayo sa gintung-an sang mga rueda nga yara sa idalom sang mga kerubin, ang tawo nagsulod kag nagtindog sa tupad sang isa sang mga rueda.

7Ang isa sang mga kerubin nga yadto didto sa tunga nila nag-untay sang iya kamot sa kalayo, nagkuha sing mga baga kag ginbutang ini sa mga kamot sang tawo nga nagabayo sing lino. Ginkuha sang tawo ang mga baga kag naglakat.

8Nakita ko nga ang tagsa ka kerubin may yara nga daw kamot sang tawo sa idalom sang tagsa nila ka mga pakpak.

9Nakita ko man nga may apat ka mga rueda nga palareho, isa sa tupad sang tagsa ka kerubin. Ang mga rueda nagaidlak kaangay sang malahalon nga mga bato, kag sa tagsa ka rueda, may isa pa gid ka rueda sa sulod sini.

11Kon ang mga kerubin maglakat bisan diin pakadto, wala ini nagaliso. Nagalakat sila sang dungan bisan diin ang luyag nila magkadto nga wala nagaliso.

12Ang ila mga lawas, mga likod, mga kamot, mga pakpak, kag mga rueda hil-ob sing mga mata.

13Kon nahanungod sa sini nga mga rueda nabatian ko nga gintawag ini, “Nagatiyog nga mga rueda.”

14Ang tagsa ka kerubin may apat ka mga guya. Ang nahauna nga guya iya sang baka, ang ikaduha iya sang tawo, ang ikatlo iya sang Leon, kag ang ikap-at iya sang agila.

15Amo man ini sila nga mga tinuga ang nakita ko sa higad sang Suba sang Kebar. Kon ang mga kerubin nagpaibabaw,

16kag maglakat, ang mga rueda nagaupod sa ila. Kon maghumlad sila sang ila mga pakpak sa paglupad, ang mga rueda nagaupod man sa ila.

17Kon magdulog ang mga kerubin, nagadulog ang mga rueda, kag kon maglupad ang mga kerubin ang mga rueda nagaupod man sa ila tungod kay ang mga kerubin nagagahom sa ila.

18Dayon ang masilaw nga kasanag nga nagapahayag sang presensya sang Ginoo nagsaylo halin sa pwertahan sang Templo pakadto sa ibabaw sang mga kerubin.

19Ginhumlad nila ang ila mga pakpak kag naglupad paibabaw halin sa duta samtang nagatan-aw ako, kag ang mga rueda nag-upod sa ila. Nagdulog sila sa nasidlangan nga pwerta sang Templo, kag ang masilaw nga kasanag yara sa ibabaw nila.

20Nakilala ko nga amo man gihapon ini nga mga kerubin ang nakita ko sa idalom sang Dios sang Israel sa Suba sang Kebar.

21Ang tagsa sa ila may apat ka mga guya, may apat ka mga pakpak, kag may kamot nga daw iya sang tawo sa idalom sang tagsa ka pakpak.

22Ang ila mga guya pareho gid sang mga guya nga akon nakita sa higad sang Suba sang Kebar. Ang tagsa ka kerubin nagpakadto sing tadlong sa ila ginapadulongan.

← Chapter 9 Jump to: Chapter 11 →