Ezekiel 11

Ilonggo (Maayong Balita nga Biblia (2012))

← Chapter 10 Jump to: Chapter 12 →

1Gin-alsa ako sang Espiritu sang Dios kag gindala sa nasidlangan nga pwerta sang Templo. Didto malapit sa pwerta nakita ko ang baynte singko ka mga lalaki lakip kay Jaazanias nga anak ni Azur kag kay Pelatias nga anak ni Benaya, duha ka mga pangulo sang pungsod.

2Ang Dios nagsiling sa akon, “Tawo nga mamalatyon, amo ini ang mga tawo nga nagapadihot sing mga kalainan kag nagahatag sang malaut nga laygay sa sini nga siudad.

3Nagasiling sila, ‘Sa indi madugay makapatindog kita liwat sing mga balay. Ang siudad kaangay sang lalagaan nga kawa kag kita kaangay sang karne sa sulod sini, pero makaapin ini sa aton sa kalayo bisan diutay lang.’

4Gani karon, tawo nga mamalatyon, magtagna ka batok sa ila.”

5Ang Espiritu sang Ginoo naggahom sa akon, kag ang Ginoo nagsugo sa akon sa paghatag sa mga tawo sini nga mensahe: “Mga tawo sang Israel, nahibal-an ko ang inyo ginasiling kag ang inyo ginaplano.

6Madamo nga mga tawo ang inyo ginpamatay diri sa siudad kag ang mga bangkay nagalalapta lang sa mga kalsada.

7“Gani, ako ang Ginoo nga Gamhanan, nagasiling sini sa inyo. Ini nga siudad mangin-isa gid man ka kawa nga lalagaan, pero ano ang karne? Ang karne amo ang mga bangkay nga inyo ginpamatay! Pero pagatabugon ko kamo paggwa sa siudad.

8Nahadlok bala kamo sa mga espada? Pagadalhon ko ang mga soldado nga may mga espada sa pagsalakay sa inyo.

9Kuhaon ko kamo sa siudad kag itugyan ko kamo sa mga dumoluong. Ginsilutan ko kamo sing kamatayon

10kag magakalamatay kamo sa inaway sa inyo kaugalingon nga pungsod. Dayon an tagsatagsa magakilala nga ako amo ang Ginoo.

11Ini nga siudad indi mag-apin sa inyo pareho sang pag-apin sang kawa sa karne nga yara sa sulod sini. Pagasilutan ko kamo bisan diin kamo sa duta sang Israel.

12Makilala ninyo nga ako amo ang Ginoo, kag samtang ginatuman ninyo ang mga kasugoan sang mga pungsod sa palibot, ginalapas ninyo ang akon mga kasugoan kag wala ninyo ginatuman ang akon mga sugo.”

13Samtang nagatagna ako, si Pelatias natumba kag napatay. Naghapa ako sa duta kag nagsinggit, “Abaw! O Ginoo nga Gamhanan! Pamatyon mo bala ang tagsatagsa nga nabilin sa Israel?”

14Ang Ginoo naghambal sa akon.

15Nagsiling sia, “Tawo nga mamalatyon, ang mga pumoluyo sa Jerusalem nagahambal nahanungod sa imo kag sa imo kasimanwa nga mga Israelinhon nga ginbihag. Nagasiling sila, ‘Ang mga bihag tama kalayo kag indi sila makasimba sa Ginoo. Ginhatag niya sa aton ang duta agod panag-iyahan.’

16“Karon, sugiri ang imo kaupod nga mga bihag sang akon ginasiling. Ako ang nagpadala sa ila sa pag-estar sa malayo nga mga pungsod kag ginpaalaplaag ko sila sa iban nga mga kapungsoran. Pero sa malip-ot lang nga tion, ako magaupod sa ila sa mga duta sa diin sila nagkadto.

17“Gani, sugiri sila nga ako, ang Ginoo nga Gamhanan, nagasiling nga pagatipunon ko sila halin sa mga kapungsoran sa diin ginpaalaplaag ko sila, kag iuli ko sa ila ang duta sang Israel.

18Sa ila pagbalik, kuhaon nila ang tanan nga mga kahigkuan, kag makangilil-ad nga mga diosdios nga ila makita.

19Pagahatagan ko sila sing bag-o nga tagipusoon kag bag-o nga panghunahuna. Kuhaon ko ang ila matig-a nga tagipusoon nga daw bato kag hatagan ko sila sing matinumanon nga tagipusoon.

20Dayon bantayan nila ang akon mga kasugoan kag tumanon nila sing matutom ang akon mga sugo. Sila mangin-akon mga tawo kag ako mangin-ila Dios.

21Pero silutan ko ang mga tawo nga nagahigugma sa pagsimba sang mahigko kag makangilil-ad nga mga diosdios. Pagasilutan ko sila tungod sang ila ginhimo.” Ang Ginoo nga Gamhanan naghambal sini.

22Ang mga kerubin naglupad, kag ang mga rueda nag-upod sa ila. Ang masilaw nga kasanag nga nagapahayag sang presensya sang Dios sang Israel yara sa ibabaw nila.

23Dayon ang masilaw nga kasanag naghalin sa siudad kag nagkadto sa bukid sa sidlangan sini.

24Sa akon palanan-awon gin-alsa ako sang Espiritu sang Dios kag gindala pabalik sa mga bihag sa Babilonia. Dayon ang palanan-awon nadula,

25kag ginsugiran ko ang mga bihag sang tanan nga ginpakita sa akon sang Ginoo.

← Chapter 10 Jump to: Chapter 12 →