Ezekiel 31

Ilonggo (Maayong Balita nga Biblia (2012))

← Chapter 30 Jump to: Chapter 32 →

1Sa nahauna nga adlaw sang ikatlo nga bulan sang ika-11 nga tuig sang kami ginbihag, ang Ginoo naghambal sa akon,

2“Tawo nga mamalatyon, singgana ang hari sang Ehipto kag ang iya mga tawo: Daw ano kagamhanan sa imo! Sa ano ko ikaw ipaanggid?

3Kaangay ikaw sang isa ka sedro sa Libano, nga may matahom kag magapa nga mga sanga, isa ka kahoy nga ang iya kataas lambot sa panganod.

4May tubig nga nagapatubo sini, kag may madalom nga tuboran nga nagapataas sini. Nagailig ini sa lugar nga ginatuboan sang kahoy kag nagalambot ini sa tanan nga mga kahoy sang kagulangan.

5Tungod kay bugana ang tubig sini nagtubo ini labaw sang sa iban nga mga kahoy. Ang iya mga sanga nagdabong kag naggapa.

6Ang tagsa ka sahi sang mga pispis nagpugad sa iya mga sanga, ang mga sapat nga talunon nagbata sa idalom sang iya mga sanga, kag ang mga kapungsoran sang kalibutan nagpasilong sa iya mga landong.

7Daw ano katahom sadto nga kahoy, tama kataas, kag magapa ang mga sanga. Ang iya mga gamot naglambot sa madalom nga mga tuboran.

8Wala sing sedro sa hardin sang Dios nga mapaanggid sini, wala sing kahoy nga abeto nga may mga sanga kaangay sini, wala sing kastanyo nga mapaanggid sa iya mga sanga. Wala sing kahoy sa hardin sang Dios nga makapareho sang iya katahom.

9Ginhimo ko ini nga matahom nga may magapa nga mga sanga. Amo ini ang makailila sa tanan nga mga kahoy sa Eden, ang hardin sang Dios.

10“Gani karon, ako, ang Ginoo nga Gamhanan, magasugid sa imo sang mahanabo sa sina nga kahoy nga magataas tubtob maglambot sa panganod. Samtang nagtaas ini nagdaku ang iya bugal,

11gani ginsikway ko ang kahoy kag itugyan ko ini sa pangulo nga dumoluong. Himuon niya sa kahoy ang nagakabagay sa kalautan sini.

12Ang mapintas nga mga dumoluong magapulod sini kag bayaan ini. Ang iya nagkalabali nga mga sanga, dalagku kag magagmay, nahulog sa tagsa ka bukid kag kapatagan sang pungsod. Ang tanan nga mga pungsod nga nag-estar sa idalom sang iya landong magahalin.

13Ang mga pispis magahapon sa natumba nga kahoy, kag ang mga sapat nga talunon magatasak sang iya mga sanga.

14Gani sugod karon, wala sing kahoy nga magtaas liwat, bisan bugana ang tubig, kag ang iya punta maglambot sa panganod. Ini tanan magakalamatay kaangay sang mga tawo nga mamalatyon, nga magaupod sa mga nagapanaog pakadto sa kalibutan sang mga patay.”

15Amo ini ang ginasiling sang Ginoo nga Gamhanan: “Sa adlaw nga ang kahoy magakadto sa kalibutan sang mga patay, tabunan ko ang mga tuboran subong tanda sang paglalaw. Punggan ko ang mga suba kag indi ko pagpailigon ang mga sapa. Tungod kay napatay ang kahoy, padulmon ko sa ibabaw sang Kabukiran sang Libano kag ang tanan nga kahoy sa kagulangan malayong.

16Kon ipadala ko ini paidalom sa kalibutan sang mga patay, ang hugpaas sang iya pagkapukan magapakurog sang mga kapungsoran. Ang tanan nga mga kahoy sang Eden, kag ang tanan nga pinili kag ginpatubigan sing bugana nga mga kahoy sang Libano nga nagkadto sa idalom sang kalibutan magakalipay sa pagkapukan sini.

17Nag-upod sila sa iya sa kalibutan sang mga patay sa pagbuylog sa mga napukan na. Kag ang tanan nga nag-estar sa idalom sang iya landong pagaaplaagon sa mga kapungsoran.

18“Ang kahoy amo ang hari sang Ehipto kag ang tanan niya nga mga ginsakpan. Wala sing kahoy sa Eden nga makatupong sini sa kataason kag kadakuon. Pero karon, magakadto ini sa kalibutan sang mga patay pareho sang mga kahoy sang Eden, kag magaupod sa mga di-diosnon kag sa mga nagkalamatay sa inaway. Ako amo ang naghambal sini,” siling sang Ginoo nga Gamhanan.

← Chapter 30 Jump to: Chapter 32 →