Ezekiel 39

Ilonggo (Maayong Balita nga Biblia (2012))

← Chapter 38 Jump to: Chapter 40 →

1Ang Ginoo nga Gamhanan nagsiling, “Tawo nga mamalatyon, pakamalauta ang Gog, ang pangulo nga manuggahom sang mga kapungsoran sang Mesec kag Tubal, kag singgana sia nga ako amo ang iya kaaway.

2Palisuon ko sia, kag tuytoyan halin sa malayo nga aminhan tubtob makaabot sia sa mga kabukiran sang Israel.

3Dayon tapihon ko ang pana sa iya wala nga kamot kag dagdagon ko ang mga baslay sa iya tuo nga kamot.

4Ang Gog kag ang iya mga hangaway kag ang mga kapungsoran nga nagaapin sa iya magakalamatay sa mga bukid sang Israel, kag ipakaon ko ang ila mga bangkay sa tanan nga mga pispis kag mga sapat nga mapintas.

5Magakalamatay sila sa latagon. Ako, ang Ginoo nga Gamhanan, amo ang naghambal sini.

6Sunogon ko ang duta sang Magog kag ang tanan nga kadutaan sa baybayon sa diin ang mga tawo nagaestar sing malinong, kag ang tagsatagsa magakilala nga ako amo ang Ginoo.

7Akon gid ipakilala sa akon mga tawo nga Israelinhon ang akon balaan nga ngalan kag indi ko na pagtugotan nga mahuy-an liwat ang akon ngalan. Dayon ang tanan nga mga kapungsoran makakilala nga ako, ang Ginoo, amo ang balaan nga Dios sang Israel.”

8Ang Ginoo nga Gamhanan nagsiling, “Ang adlaw nga akon ginasiling pat-od gid nga magaabot.

9Ang mga tawo nga nagaestar sa mga siudad sang Israel magagwa kag magatipon sang mga hinganiban nga ginbayaan agod igatong sa kalayo. Magadabok sila sing kalayo nga ang mga gatong mga taming, mga pana, mga baslay, mga batuta, kag mga bangkaw kag indi ini maurot sa sulod sang pito ka tuig.

10Indi na sila kinahanglan magtipon sing mga gatong sa latagon ukon magpamulod sang mga kahoy sa kagulangan, tungod kay may mga hinganiban nga binayaan nga sarang nila magatong. Ila kawatan ang mga nagpangawat sa ila kag ila panguhaan sang mga pagkabutang ang mga tawo nga nagkuha sang ila mga pagkabutang.” Ang Ginoo nga Gamhanan amo ang naghambal sini.

11Ang Ginoo nagsiling, “Kon mahanabo ini tanan, hatagan ko sing lulobngan ang Gog sa duta sang Israel, sa Kapatagan sang mga Nagapanglakaton, sa sidlangan sang Patay nga Dagat. Ang Gog kag ang tanan niya nga mga hangaway pagailubong didto, kag ang kapatagan pagatawgon ‘Ang Kapatagan sang mga Hangaway ni Gog.’

12Magalawig sing pito ka bulan ang paglubong sang mga Israelinhon sang mga bangkay agod matinluan liwat ang duta.

13Ang tagsatagsa sa duta magabulig sa paglubong sa ila, kag pasidunggan sila tungod sini sa adlaw sang akon pagdaog. Ako, ang Ginoo nga Gamhanan, amo ang naghambal sini.

14Sa tapos sang pito ka bulan, pagapilion ang mga tawo sa paglibot sa bug-os nga duta agod sa pagpangita sang mga bangkay kag ilubong, agod matinluan nila ang duta.

15Sa ila paglibot sa bug-os nga duta, kon makakita sila sing tul-an sang tawo, tandaan nila ini tubtob makaabot ang mga manuglubong kag ilubong nila ini sa Kapatagan sang mga Hangaway ni Gog.

16May isa ka banwa nga malapit nga ginhingalanan Ang Hangaway ni Gog. Gani ang duta magatinlo liwat.”

17Ang Ginoo nga Gamhanan nagsiling sa akon, “Tawo nga mamalatyon, tawga ang tanan nga mga kapispisan kag mga kasapatan sa pagpalapit halin sa tanan nga lugar sa pagkaon sang halad nga akon ginahanda para sa ila. Mangin-isa ka daku ini nga punsyon sa mga kabukiran sang Israel, sa diin makakaon sila sing karne kag makainom sing dugo.

18Pagakaunon nila ang mga bangkay sang mga soldado kag pagaimnon ang dugo sang mga pangulo sang duta, tanan sila pamatyon subong sang mga karnero nga lalaki ukon mga kordero, ukon mga kanding, ukon pinatambok nga mga baka.

19Kon pamatyon ko ini nga mga tawo kaangay sang mga halad, ang mga kapispisan kag mga kasapatan magapaayaw sing kaon sang ila mga tambok kag magainom sang ila dugo tubtob magkalahubog sila.

20Sa akon lamisa magapaayaw sila sing kaon sang mga kabayo kag sang mga nagasakay sini, sang mga soldado kag sang tanan nga mga hangaway. Ako, ang Ginoo nga Gamhanan, amo ang naghambal sini.”

21Ang Ginoo nagsiling, “Ipakita ko sa mga kapungsoran ang akon kadungganan kag ang paggamit ko sang akon gahom sa paghimo sang akon matarong nga mga paghukom.

22Kag sugod sadto ang mga Israelinhon magakilala nga ako amo ang Ginoo nga ila Dios.

23Kag ang mga kapungsoran makahibalo nga ang mga Israelinhon ginbihag tungod sang mga sala nga ginhimo nila batok sa akon. Ginbayaan ko sila, ginpalutos sa ila mga kaaway kag ginpabay-an ko nga magkalamatay sila tanan sa inaway.

24Ginsilutan ko sila suno sa ila pagkadi-matinlo kag pagkamalaut, kag ginbayaan ko sila.”

25Ang Ginoo nga Gamhanan nagsiling, “Pero karon magakaluoy ako sa mga kaliwat ni Jacob, ang mga tawo sang Israel, kag pauswagon ko sila liwat. Apinan ko ang akon balaan nga ngalan.

26Kon mag-estar na sila liwat sing malinong sa ila duta, nga wala na sila sing katalagman, malimtan nila ang ila mga kahuloy-an kag ang ila pagluib sa akon.

27Pabalikon ko sila halin sa tanan nga mga kapungsoran sang ila mga kaaway sa pagpakita sa madamo nga mga pungsod nga ako balaan.

28Dayon ang akon mga tawo magakilala nga ako ang Ginoo nga ila Dios, tungod kay ginpabihag ko sila kag karon ginatipon ko sila kag ginadala pabalik sa ila kaugalingon nga duta, nga wala gid sing isa sa ila nga nabilin.

29Ibubo ko ang akon Espiritu sa mga tawo sang Israel, kag indi ko na gid sila pagbayaan. Ako, ang Ginoo nga Gamhanan, amo ang naghambal sini.”

← Chapter 38 Jump to: Chapter 40 →