Ezekiel 26

Ilonggo (Maayong Balita nga Biblia (2012))

← Chapter 25 Jump to: Chapter 27 →

1Sa nahauna nga adlaw sang …bulan sang ika-11 nga tuig sang kami ginbihag, ang Ginoo naghambal sa akon,

2“Tawo nga mamalatyon, amo ini ang ginahinugyaw sang mga pumoluyo sa siudad sang Tiro. Nagasinggit sila, ‘Ang Jerusalem, ang aton kompetensya sa negosyo nalaglag na! Ang iya mga pwerta nagbukas na sing masangkad para sa aton, kag tungod sang iya pagkalutos magamanggaranon kita!’

3“Gani karon, amo ini ang akon ginasiling ako, ang Ginoo nga Gamhanan: Siudad sang Tiro, ako ang imo kaaway. Ipadala ko ang madamo nga mga pungsod sa pagsalakay sa imo, kag magaabot sila subong sang mga balod sa baybay.

4Gub-on nila ang imo mga pader, kag rumpagon ang imo mga tore. Dayon silhigon ko ang tanan nga mga yab-ok kag igang na lang ang mabilin.

5Ang mga mangingisda magabulad sang ila mga pukot sa sini, didto sa tunga sang dagat. Ako, ang Ginoo nga Gamhanan, naghambal sini. Ang mga kapungsoran magakuha sang mga pagkabutang sang Tiro,

6kag pamatyon nila sa espada ang mga pumoluyo sa iya mga kabanwahanan. Dayon ang Tiro magakilala nga ako amo ang Ginoo.”

7Ang Ginoo nga Gamhanan nagasiling, “Ipadala ko ang labing gamhanan nga hari sa tanan, nga amo si Haring Nabucodonosor nga hari sa Babilonia, sa pagsalakay sang Tiro. Magaabot sia halin sa aminhan nga may madamo nga hangaway, mga kabayo kag mga karwahi, kag mga soldado nga nagasakay sa kabayo.

8Ang mga pumoluyo sa kabanwahanan magakalamatay sa inaway. Ang mga kaaway magakutkot sing mga trinsera, mapatindog sing mga pamakod, kag magahimo sing mabakod nga pader batok sa imo.

9Bungkalon nila ang imo mga pader sang ila mga inugbungkal kag rumpagon nila ang imo mga tore paagi sang ila mga bara nga salsalon.

10Ang nagatap-ok nga yab-ok tungod sang ila madamo nga mga kabayo magatabon sa imo. Ang ginahod sang ila mga kabayo nga nagaguyod sang mga karo kag mga karwahi sa inaway magatay-og sang imo mga pader samtang nagaagi sila sa mga pwerta sang naguba nga siudad.

11Ang ila mga manugkabayo magadinaguso sa imo mga kalsada nga nagapamatay sang imo mga pumoluyo paagi sa mga espada. Ang imo mabakod nga mga haligi mapukan sa duta.

12Ang imo mga kaaway magapatuyang sang imo manggad kag mga inugbaligya. Pukanon nila ang imo mga pader kag gub-on ang imo matahom nga mga balay. Kuhaon nila ang mga bato kag mga kahoy, kag ang tanan nga mga ginub-an, kag ihaboy nila ini sa dagat.

13Pauntaton ko ang inyo pagkanta kag ang pagtukar sang inyo mga arpa.

14Ang igang lang ang ibilin ko sa diin ibulad sang mga mangingisda ang ila mga pukot. Ang siudad indi na gid pagpatindugon liwat. Ako, ang Ginoo nga Gamhanan, amo ang naghambal sini.”

15Ang Ginoo nga Gamhanan nagasiling sini sa siudad sang Tiro: “Kon ikaw malutos, ang mga tawo nga nagaestar sa baybayon pagakugmaton gid tungod sang mga pag-ugayong sang mga ginapamatay.

16Ang tanan nga mga hari sang mga kapungsoran sa kadagatan magapanaog sa ila mga trono. Ubahon nila ang ila mga kapa kag ang ila binordahan nga mga bayu kag magakurog nga nagapungko sa duta. Pagakugmaton sila tungod sang imo dinangatan kag indi sila makauntat sa pagkurog.

17Dayon magapanalambiton sila sini para sa imo: Ang bantog nga siudad nalaglag! Ang iya mga bapor indi na makit-an sa dagat. Ang mga pumoluyo sini nga siudad naggahom sa kadagatan, kag nagpakugmat sang mga pumoluyo sa baybayon.

18Karon, sa adlaw sang iya pagkapukan, ang mga isla nagakurog, kag ang ila mga pumoluyo ginkugmat sa amo nga kalaglagan.”

19Ang Ginoo nga Gamhanan nagasiling: “Himuon ko ikaw nga mamingaw subong sang nalaglag nga mga siudad sa diin wala sing nagaestar. Tabunan ko ikaw sang tubig gikan sa madalom nga dagat.

20Itagbong ko ikaw sa kalibutan sang mga patay agod manginkaupod ka sang mga tawo nga nagkabuhi sang una nga panahon. Paestaron ko ikaw sa sina nga kalibutan sa idalom sang duta, upod sa walay katapusan nga mga ginub-an, nga kaupod sang mga nagkalamatay. Tungod sini indi ka na pagpaestaron ukon makaupod sa duta sang mga buhi.

21Himuon ko ikaw nga makakulogmat nga talandaan, kag amo ini ang imo katapusan. Ang mga tawo magapangita sa imo pero indi gid ikaw makita.” Ang Ginoo nga Gamhanan, amo ang naghambal sini.

← Chapter 25 Jump to: Chapter 27 →