Ezekiel 17

Ilonggo (Maayong Balita nga Biblia (2012))

← Chapter 16 Jump to: Chapter 18 →

1Ang Ginoo naghambal sa akon,

2“Tawo nga mamalatyon, sugiri ang mga Israelinhon sang isa ka palaanggiran

3sa pagpahibalo sa ila nga ako, ang Ginoo nga Gamhanan nagasiling sini sa ila: May isa ka daku nga agila nga may malapad nga mga pakpak nga nahumlad kag may matahom nga mga bulbol. Naglupad ini pakadto sa mga Kabukiran sang Libano kag ginbali niya ang punta sang isa ka kahoy nga sedro.

4Gindala niya ini sa isa ka duta sang mga negosyante, kag ginbutang sa isa ka siudad nga sentro sang negosyo.

5Dayon nagkuha sia sing isa ka binhi halin sa duta sang Israel, kag gintanom ini sa isa ka maayo nga duta, sa diin may bugana nga tubig sa pagpatubo sini.

6Ang tanom nagtubo kag nanginmagapa kag nanginmadabong nga balagon sang ubas. Ang mga sanga nagtaas nga nagalambot sa agila kag ang tanom nagpanggamot sing madalom. Ang balagon may madamo nga mga sanga kag madabong nga mga dahon.

7“May isa pa ka daku nga agila nga may malapad nga mga pakpak kag madamol nga mga bulbol. Kag karon ang balagon nagpanggamot padulong sa iya, kag ang mga dahon sini nagpadulong sa iya sa paglaom nga bunyagan niya ini sing mas madamo nga mga tubig sang sa mga tubig nga yara sa hardin sa diin nagatubo ini.

8Pero ang balagon sang ubas natanom na sa isa ka maayo nga duta sa diin bugana ang tubig kag nagpanalingsing ini kag nagpamunga kag nanginmaayo nga balagon sang ubas.

9“Gani ako, ang Ginoo nga Gamhanan nagapamangkot: Magapadayon bala ini nga balagon sang ubas sa pagpamuhi kag pagtubo? Indi bala ini paggabuton sang nahauna nga agila, pang-ipuon ang iya mga bunga, pangbalion ang iya mga sanga, kag pabay-an ini nga malaya? Indi na kinahanglan ang daku nga kusog ukon ang isa ka gamhanan nga pungsod sa paggabot sini.

10Huo, natanom ini, pero magapadayon bala ini sa pagpamuhi kag pagtubo? Indi bala ini malaya kon huypon ini sang salatan? Indi bala ini malaya sa iya ginatuboan?”

11Ang Ginoo nagsiling sa akon,

12“Pamangkuta ining mabinatuon nga mga tawo kon bala nakahangop sila sang kahulogan sang palaanggiran. Singgana sila nga ang hari sang Babilonia nag-abot sa Jerusalem, ginkuha niya ang hari sang amo nga siudad kag ang mga opisyales sini kag gindala sila pa Babilonia.

13Nagkuha sia sing isa ka kaliwat sang panimalay sang hari, naghimo sia sing kasugtanan sa iya, kag ginpasumpa sia sa pag-unong sa iya. Ginbihag niya ang mga opisyales

14agod ang pungsod indi na magbakod liwat, kag masiguro nga matuman gid ang kasugtanan.

15Pero ang hari sang Juda nagbato kag nagpadala sing mga tinawo sa Ehipto sa pagkuha sing mga kabayo kag madamo nga mga hangaway. Magamadinalag-on bala sia? Maluwas bala sia paagi sa iya paghimo sini? Malapas bala niya ang kasugtanan nga indi sia masilutan?”

16Ang Ginoo nga Gamhanan nagasiling, “Subong nga ako ang Dios nga buhi, ini nga hari mapatay sa Babilonia, tungod kay ginlapas niya ang kasugtanan nga iya ginsumpaan sa hari sang Babilonia nga naghimo sa iya nga hari.

17Bisan ang gamhanan nga mga hangaway sang hari sang Ehipto indi makabulig sa iya sa pagpakig-away kon ang mga taga-Babilonia maghimo sing mga pamakod kag magkutkot sing mga trinsera agod sa pagpamatay sang madamo nga mga tawo.

18Ginlapas niya ang iya ginsumpaan nga kasugtanan. Ginhimo niya ini tanan kag karon indi sia makapalagyo.”

19Ang Ginoo nga Gamhanan nagasiling, “Subong nga ako ang Dios nga buhi, silutan ko ang nagalapas sang kasugtanan nga iya ginsumpaan nga pagatumanon sa akon ngalan.

20Iladlad ko ang lambat sa pagdakop sa iya. Dalhon ko sia sa Babilonia kag silutan sia didto, tungod kay indi sia matutom sa akon.

21Ang iya pinili nga mga soldado magakalamatay sa inaway, kag ang mga nabilin nga buhi magaalaplaag bisan diin. Dayon makilala ninyo nga ako, ang Ginoo, naghambal sini.”

22Amo ini ang ginasiling sang Ginoo nga Gamhanan: “Kuhaon ko ang punta sang isa ka mataas nga sedro, kag kutlon ko ang iya ugbos, itanom ko ini sa isa ka mataas nga bukid,

23sa pinakamataas nga bukid sang Israel. Magapananga ini kag magapamunga, kag mangin-isa ka matahom nga sedro. Ang tanan nga sahi sang mga pispis magaestar didto, kag magapasilong sa iya landong.

24Ang tanan nga mga kakahuyan sang duta magakilala nga ako amo ang Ginoo. Tapson ko ang mataas nga mga kahoy kag pataason ko ang manubo nga mga kahoy. Palayaon ko ang malagtom nga mga kahoy kag himuon ko nga magpanalingsing liwat ang laya nga mga kahoy. Ako, ang Ginoo, amo ang naghambal sini kag himuon ko ang akon ginsiling.”

← Chapter 16 Jump to: Chapter 18 →