Ezekiel 13

Ilonggo (Maayong Balita nga Biblia (2012))

← Chapter 12 Jump to: Chapter 14 →

1Ang Ginoo naghambal sa akon,

2“Tawo nga mamalatyon, magtagna ka batok sa mga propeta sang Israel nga nagahimuhimo sang ila kaugalingon nga mga tagna. Singgana sila nga magpamati sa ginasiling sang Ginoo.”

3Amo ini ang ginasiling sang Ginoo nga Gamhanan: “Ining buangbuang nga mga propeta tapos gid! Nagahimuhimo sila sang ila kaugalingon nga mga tagna kag mga palanan-awon.

4Mga tawo sang Israel, ang inyo mga propeta kaangay sang mga singgalong nga wala sing pulos nga nagaestar sa mga ginub-an sang siudad.

5Wala nila ginabantayi ang mga lugar sa diin ang mga pader narumpag, ukon nagakaayo sini. Gani ang Israel indi maapinan kon mag-abot ang inaway sa adlaw sang Ginoo.

6Ang ila mga palanan-awon indi matuod kag butig ang ila mga tagna. Nagasiling sila, ‘Amo ini ang ginasiling sang Ginoo,’ pero wala ako magpadala sa ila. Apang nagapaabot sila nga matuman ang ila ginasiling!

7Ako nagasiling sa ila: ‘Inang mga palanan-awon nga inyo nakita indi matuod kag butig ang mga tagna nga inyo ginasiling. Nagasiling kamo nga akon ina mga pulong, pero wala ako maghambal sina!”

8Gani ang Ginoo nga Gamhanan nagasiling sa ila, “Butig ang inyo ginahambal, kag indi matuod ang inyo mga palanan-awon. Gani ako batok sa inyo.

9Kamo nga mga propeta nga may mga palanan-awon nga indi matuod kag nagatagna sing mga binutig madali ko na lang kamo silutan. Kon magtipon ang akon mga tawo sa pagpamat-od wala kamo didto. Ang inyo mga ngalan indi pag-isulat sa listahan sang mga tawo sang Israel. Indi gid kamo makabalik sa inyo duta. Makilala ninyo nga ako amo ang Ginoo nga Gamhanan.

10“Ang mga propeta nagapatalang sang akon mga tawo paagi sa pagsiling nga maayo ang tanan. Pero wala gid sing maayo! Ang akon mga tawo nagpatindog sang pader nga indi mabakod, kag dayon ang mga propeta nag-abot kag ginkapulkapolan ini sing lunang.

11Singgana ang mga propeta nga ini nga pader mapukan, kay magapadala ako sing mabunok nga ulan. Ang ulan nga yelo nga daw mga bato magatupa sa sini kag huypon ini sang mabaskog nga hangin.

12Ang pader matumba, kag ang tagsatagsa magapamangkot kon ano ang nahimo sang lunang nga inyo ginkapol.”

13Karon amo ini ang ginasiling sang Ginoo nga Gamhanan: “Sa akon kaakig ipadala ko ang mabaskog nga hangin, mabunok nga ulan, kag mga ulan nga yelo nga daw mga bato sa pagguba sang pader.

14Gub-on ko ang pader nga ila ginkapulkapolan sang lunang kag wasdakon ini, agod makita ang iya mga sadsaran. Magakalamatay kamo nga napilpilan sini. Dayon ang tagsatagsa magakilala nga ako amo ang Ginoo.

15“Ang pader kag ang mga nagkapulkapol sini makatilaw sang akon kaakig. Dayon sugiran ko kamo, ‘Wala na ang pader, kag subong man ang mga nagkapulkapol sini,

16yadtong mga propeta nga nagpasalig sa Jerusalem nga ang tanan maayo, bisan pa nga ang tanan indi maayo!” Ang Ginoo nga Gamhanan amo ang naghambal sini.

17Ang Ginoo nagsiling, “Karon, tawo nga mamalatyon, tan-awa ang mga babayi nga nagapanagna sa tunga sang imo mga tawo. Magtagna ka batok sa ila,

18kag sugiri sila sang ginasiling sang Ginoo nga Gamhanan: “Kamo nga mga babayi tapos gid! Nagatahi kamo sing mga hamil sa butkon kag nagahimo sing mga belo sa pagganyat sang tagsatagsa agod magamhan ninyo ang kabuhi sang mga tawo. Luyag ninyo nga magamhan ang kabuhi ukon kamatayon sang akon mga tawo agod inyo ini gamiton para sa inyo kaugalingon nga kaayuhan.

19Ginapakahuy-an ninyo ako sa atubang sang akon mga tawo agod makakuha kamo sing pila ka hakop nga sebada kag pila ka bilog nga tinapay. Ginapamatay ninyo ang mga tawo nga indi dapat mapatay kag ginabuhi ninyo ang mga tawo nga indi dapat magkabuhi. Gani nagasugid kamo sing mga binutig sa akon mga tawo, kag nagapati sila sa inyo.”

20Karon amo ini ang ginasiling sang Ginoo nga Gamhanan: “Naakig ako sa mga hamil sa butkon nga ginagamit ninyo sa paggahom sang kabuhi ukon kamatayon. Lalason ko ini sa inyo mga butkon, kag hilwayon ko ang mga tawo nga inyo ginatinguhaan nga magamhan.

21Lalason ko ang inyo mga belo kag hilwayon ko ang akon mga tawo gikan sa inyo gahom kag indi na ninyo sila magamhan liwat. Dayon makilala ninyo nga ako amo ang Ginoo.

22“Paagi sa inyo mga binutig ginapaluya ninyo ang matarong nga mga tawo nga indi ko luyag nga masakitan. Indi kamo luyag nga maluwas ang malaut nga mga tawo paagi sa pagbiya sang ila mga kalautan.

23Gani karon, ang inyo di-matuod nga palanan-awon kag binutig nga mga tagna tapos na. Luwason ko ang akon mga tawo gikan sa inyo gahom, agod inyo makilala nga ako amo ang Ginoo.”

← Chapter 12 Jump to: Chapter 14 →