Ezekiel 3

Ilonggo (Maayong Balita nga Biblia (2012))

← Chapter 2 Jump to: Chapter 4 →

1Ang Dios nagsiling, “Tawo nga mamalatyon, kauna ining linukot nga tulon-an. Dayon lakat kag hambal ka sa mga tawo sang Israel.”

2Gani ginnganga ko ang akon baba, kag ginhatag niya sa akon ang linukot nga tulon-an agod akon kaunon.

3Nagsiling sia, “Tawo nga mamalatyon, kauna ining linukot nga tulon-an nga ginahatag ko sa imo, kag busga ang imo tiyan sini.” Ginkaon ko ini, kag matam-is ini kaangay sang dugos.

4Dayon ang Dios nagsiling, “Tawo nga mamalatyon, kadto ka sa mga tawo sang Israel, kag sugiri sila sang bisan ano nga isiling ko sa imo.

5Wala ko ikaw ginapadala sa isa ka pungsod nga ang ila hambal lain kag mabudlay hangpon, kundi ginapadala ko ikaw sa mga Israelinhon.

6Kon ginpadala ko ikaw sa dalagku nga mga pungsod nga ang ila hambal mabudlay hangpon, magapamati sila sa imo.

7Pero wala sing mga tawo sang Israel nga luyag magpamati, kay indi gani sila magpamati sa akon. Tanan sila mga matig-a sing ulo kag mabinatuon.

8Karon himuon ko ikaw nga bat-ulan kag matig-a sing tagipusoon kaangay sa ila.

9Himuon ko ikaw nga subong katig-a sa bisan ano nga bato, subong katig-a sang diamante. Indi ka magkahadlok sa sinang mabinatuon nga mga tawo.”

10Ang Dios nagsiling pa gid, “Tawo nga mamalatyon, pamati ka sing maayo kag dumdoma ang tanan nga ginasiling ko sa imo.

11Dayon kadto ka sa imo mga kasimanwa nga ginbihag kag sugiri sila sang ginasiling ko. Magpamati man sila sa imo ukon indi isiling mo, ‘Amo ini ang mga pulong sang Ginoo nga Gamhanan.”

12Dayon ang Espiritu sang Dios nag-alsa sa akon, kag nabatian ko sa akon likod ang isa ka tingog nga nagadaguhob sing mabaskog nga nagasiling, “Dayawon ang himaya sang Ginoo sa langit!”

13Nabatian ko ang mga pakpak sang mga tinuga nga nagasag-iranay sa kahanginan, kag ang ginahod sang mga rueda daw ginahod sang linog.

14Gingamhan ako sang Ginoo kag samtang ginadala ako sang iya Espiritu, nagbatyag ako sang kainit kag naakig.

15Gani nakaabot ako sa Tel-abib, sa tupad sang Suba sang Kebar, sa diin ang mga bihag nagaestar kag sa sulod sang pito ka adlaw nagpabilin ako didto nga naurongan tungod sang akon nakita kag nabatian.

16Sa tapos ang pito ka adlaw, ang Ginoo naghambal sa akon.

17Nagsiling sia, “Tawo nga mamalatyon, himuon ko ikaw nga manugbantay para sa pungsod sang Israel. Isugid mo sa ila ang mga paandam nga ginahatag ko sa imo.

18Kon magsiling ako nga ang malaut nga tawo dapat mapatay, pero wala mo sia pagpaandami sa pagbaylo sang iya pagginawi agod nga maluwas sia, mapatay sia nga sa gihapon makasasala, kag ikaw ang may salabton sang iya kamatayon.

19Kon ikaw magpaandam sa malaut nga tawo, kag indi sia mag-untat sa pagpakasala, mapatay sia nga sa gihapon makasasala, pero maluwas mo ang imo kaugalingon.

20“Kon ang matarong nga tawo maghimo sing malaut, kag ibutang ko sia sa katalagman, mapatay sia kon indi mo sia pagpaandaman. Mapatay sia tungod sang iya mga sala, kag indi ko pagdumdomon ang maayo niya nga hinimuan. Ikaw ang akon pagasukton sang iya kamatayon.

21Kon ikaw magpaandam sa matarong nga tawo nga indi magpakasala, kag magpamati sia sa imo kag indi magpakasala, magakabuhi sia kag maluwas mo ang imo kaugalingon.”

22Nabatyagan ko ang gahom sang Ginoo, kag nabatian ko sia nga nagasiling sa akon, “Tindog ka kag magkadto sa kapatagan. Didto may ihambal ako sa imo.”

23Gani nagkadto ako sa kapatagan, kag didto nakita ko ang himaya sang Ginoo, pareho sang nakita ko sa ubay sang Suba sang Kebar. Naghapa ako sa duta,

24pero ang Espiritu sang Dios nagsulod sa akon kag ginpatindog ako. Ang Ginoo nagsiling sa akon, “Pauli ka kag magpanirado sa imo balay.

25O tawo nga mamalatyon, pagagapuson ka sang mga lubid, kag indi ka makagwa kag makapakig-upod sa mga tawo.

26Magaapa ikaw agod indi ka makapaandam sa sining mabinatuon nga mga tawo.

27Dayon kon ako maghambal sa imo liwat kag iuli ko sa imo ang gahom sa paghambal, sugiri sila sang ginasiling ko, ang Ginoo nga Gamhanan. Ang iban sa ila magapamati, pero ang iban indi magsapak sa imo, tungod kay sila isa ka pungsod nga mabinatuon.”

← Chapter 2 Jump to: Chapter 4 →