Ezekiel 36

Ilonggo (Maayong Balita nga Biblia (2012))

← Chapter 35 Jump to: Chapter 37 →

1Ang Ginoo nagsiling, “Tawo nga mamalatyon, hambal ka sa mga kabukiran sang Israel kag singgana sila sa pagpamati sa akon mensahe, ako,

2ang Ginoo nga Gamhanan: Ang mga kaaway sang Israel nagpabugal kag nagsiling, ‘Karon ang dumaan nga mga kabakuloran amon na!’

3“Gani, magtagna ka, kag ipahibalo kon ano ang ginasiling ko, ako, ang Ginoo nga Gamhanan. Sang ang kaingod nga mga kapungsoran nagbihag kag nagkuha sang mga pagkabutang sang mga kabukiran sang Israel, ang tagsatagsa nagyaguta sang Israel.

4Gani karon, pamatii ang ginasiling ko, ako, ang Ginoo nga Gamhanan, sa mga kabukiran kag sa mga kabakuloran, sa mga kasapaan kag sa mga kapatagan, sa mga lugar nga nagkalaguba, kag sa mga siudad nga binayaan nga ginkuhaan sang mga pagkabutang kag ginyaguta sang tanan nga mga kapungsoran sa palibot.

5“Ako, ang Ginoo nga Gamhanan, naghambal sa akon nagabalingaso nga kaakig batok sa mga kapungsoran sa palibot, kag labi na gid sa Edom. Gin-agaw nila ang akon duta nga may paghinugyaw kag pagyaguta kag ginpanag-iyahan ang mga palahalban sini.

6“Gani, magtagna ka sa duta sang Israel. Singgana ang mga kabukiran, mga kabakuloran, mga kasapaan, kag mga kapatagan, nga ako, ang Ginoo nga Gamhanan, nagahambal sa akon kaimon kag kaakig tungod sang pagyaguta kag pagpakahuya sang mga kapungsoran sa ila.

7Ako, ang Ginoo nga Gamhanan, nagasumpa nga ang mga kapungsoran sa palibot mahuy-an.

8Pero sa kabukiran sang Israel ang mga kahoy magapanalingsing kag magapamunga para sa inyo, akon mga katawhan nga Israelinhon. Sa indi madugay magapauli kamo.

9Ako nagaupod sa inyo, kag pat-uron ko nga ang inyo duta maarado liwat kag matamnan.

10Padamuon ko kamo. Magaestar kamo sa mga siudad kag patindugon ninyo liwat ang tanan nga mga nagkalaguba.

11Padamuon ko ang mga tawo kag mga kasapatan. Manginmadamo kamo sang sa una, kag magadamo ang inyo mga kabataan. Paestaron ko kamo didto pareho sang inyo pag-estar sang una, kag pauswagon ko kamo labi pa sang sa una. Dayon makilala ninyo nga ako amo ang Ginoo.

12Akon mga tawo nga Israelinhon, dalhon ko kamo pabalik sa pag-estar sa duta. Mangin-inyo ini kaugalingon nga duta, kag indi na gid magutoman liwat ang inyo mga kabataan.

13“Ako, ang Ginoo nga Gamhanan, nagasiling: Ang mga tawo nagatawag sang duta nga manugkaon sing mga tawo, kag nagasiling nga nagapangawat ini sang mga kabataan sang pungsod.

14Pero sugod karon indi na ini manugkaon sing mga tawo kag nagapangawat sang inyo mga kabataan. Ako, ang Ginoo nga Gamhanan, amo ang naghambal sini.

15Ang duta indi na makabati sang pagyaguta sa iya sang mga kapungsoran kag indi na makakita sang paghikay sa iya sang mga katawhan. Ang duta indi na magpangawat sang mga kabataan sang pungsod. Ako, ang Ginoo nga Gamhanan, amo ang naghambal sini.”

16Ang Ginoo naghambal sa akon,

17“Tawo nga mamalatyon, sang nagaestar ang mga Israelinhon sa ila duta, gindagtaan nila ini paagi sa ila pagkabuhi kag pagginawi. Ginkabig ko ang ila pagginawi subong kahigko sang pamulanon sang isa ka babayi.

18Ginpatilaw ko sila sang akon nagabalingaso nga kaakig tungod sang ila pagpamatay sa duta, kag tungod sang mga diosdios nga paagi sini gindagtaan nila ang duta.

19Ginkondenar ko sila tungod sang ila pagkabuhi kag pagginawi, kag ginpaalaplaag ko sila sa iban nga mga kapungsoran.

20Pero bisan diin sila magkadto ginpakahuy-an nila ang akon balaan nga ngalan, tungod kay ang mga tawo nagasiling, ‘Ini mga tawo sang Ginoo, pero dapat sila maghalin sa iya duta.’

21Tungod sini nagkabalaka ako sa akon balaan nga ngalan, kay ang mga Israelinhon nagpakahuya sini bisan diin sila magkadto.

22“Gani karon, sugiri ang mga Israelinhon sang ginasiling ko para sa ila, ako ang Ginoo nga Gamhanan: Ang akon pagahimuon indi para sa inyo nga mga Israelinhon, kundi tungod sa akon balaan nga ngalan nga inyo ginpakahuy-an sa tagsa ka pungsod sa diin kamo nagkadto.

23Kon pamatud-an ko sa mga kapungsoran ang pagkabalaan sang akon gamhanan nga ngalan, ang ngalan nga inyo ginpakahuy-an sa tunga nila, dayon makilala nila nga ako amo ang Ginoo. Ako, ang Ginoo nga Gamhanan, amo ang naghambal sini. Gamiton ko kamo sa pagpakita sa mga kapungsoran nga ako balaan.

24Kuhaon ko kamo sa tagsa ka pungsod kag duta, kag pabalikon ko kamo sa inyo kaugalingon nga duta.

25Wisikan ko kamo sang matinlo nga tubig kag tinloan ko kamo sa tanan ninyo nga mga diosdios kag sa tagsatagsa nga nagdagta sa inyo.

26Hatagan ko kamo sing bag-o nga tagipusoon kag ibutang ko sa inyo ang bag-o nga hunahuna. Kuhaon ko sa inyo ang matig-a nga tagipusoon kag hatagan ko kamo sing tagipusoon nga matinumanon.

27Ibutang ko sa inyo ang akon Espiritu agod tumanon ninyo ang akon mga kasugoan kag himuon ang tanan nga mga sugo nga ginhatag ko sa inyo.

28Dayon magaestar kamo sa duta nga akon ginhatag sa inyo mga katigulangan. Kamo mangin-akon mga tawo, kag ako mangin-inyo Dios.

29Luwason ko kamo sa tanan nga nagadagta sa inyo. Manduan ko ang mga trigo nga magdamo, agod indi na kamo paggutomon.

30Padamuon ko ang mga patubas sang inyo mga prutas kag mga uma, agod wala na sing tiggulotom nga magapakahuya sa inyo sa tunga sang mga kapungsoran.

31Madumdoman ninyo ang inyo malaut nga pagginawi kag mga sayop nga inyo nahimo, kag magakangil-ad kamo sa inyo kaugalingon tungod sang inyo mga sala kag mga kalautan.

32O Israel, luyag ko nga mahibaluan ninyo nga ini tanan wala ko ginahimo tungod sa inyo. Luyag ko nga mabatyagan ninyo ang kahuloy-an kag pagtamay tungod sang inyo ginahimo. Ako, ang Ginoo nga Gamhanan, amo ang naghambal sini.”

33Ang Ginoo nga Gamhanan nagasiling, “Kon matinluan ko kamo sa tanan ninyo nga mga sala, paestaron ko kamo liwat sa inyo mga siudad kag tugotan ko kamo sa pagpatindog liwat sang mga naguba.

34Ang tagsatagsa nga nagaagi anay sa inyo kaumhan nakakita kon daw ano kasiot ini, pero tugotan ko kamo sa pagpanguma sini liwat.

35Ang tagsatagsa magasiling nga ini nga duta sang una masiot, pero karon daw Katamnan na sang Eden, kag ang mga siudad nga sang una ginlaglag, kag ginkuhaan sang mga pagkabutang, kag wala gid makaayo, karon ginpalibutan na sing mga pader kag may mga pumoluyo na.

36Dayon ang nabilin nga mga kapungsoran sa palibot magakilala nga ako, ang Ginoo, nagapatindog liwat sang naguba nga mga siudad kag nagapanguma liwat sang masiot nga mga kaumhan. Ako, ang Ginoo, nagsiling nga himuon ko ini, kag himuon ko gid.”

37Ang Ginoo nga Gamhanan nagasiling, “Pagapapangayuon ko liwat ang mga Israelinhon sang akon bulig. Padamuon ko sila kaangay sang isa ka panong sang mga karnero.

38Ang mga siudad nga karon nagkalaguba mapuno sing mga pumoluyo subong nga ang Jerusalem sang una puno sing mga karnero nga dulot subong mga halad sa adlaw sang piesta. Dayon makilala nila nga ako amo ang Ginoo.”

← Chapter 35 Jump to: Chapter 37 →