Ezekiel 48

Ilonggo (Maayong Balita nga Biblia (2012))

← Chapter 47 Jump to:

1Ang naaminhan nga dulonan sang duta nagapadulong sa sidlangan halin sa Dagat sang Mediteraneo pakadto sa siudad sang Hetlon, sa Alagyan sang Hamat, sa Siudad sang Enon, pakadto sa dulonan sa gintung-an sang ginharian sang Damasco kag ginharian sang Hamat. Ang masunod nga mga tribo magabaton kada-isa sing isa ka parti sang duta nga ang dulonan halin sa sidlangan kag nagapadulong sa nakatundan tubtob sa dagat sang Mediteraneo kag halin sa aminhan pakadto sa bagatnan. Amo ini ang ila pagpasunod: Dan Aser Neftali Manases Efraim Ruben Juda

8Ang madason nga bahin sang duta, halin sa sidlangan pa nakatundan amo ang bahin sang duta nga nahalad sa Dios. Ang kasangkaron sini desi-sais ka kilometro kag ang kalabaon sini halin sa sidlangan pa nakatundan pareho man sang ginhatag sa mga tribo. Ang Templo ibutang sa tunga sini.

9Ang sentro nga bahin sini nga duta nga ginhalad sa Ginoo may kalabaon nga desi-sais ka kilometro kag ang kasangkaron dose ka kilometro.

10Ang mga pari may parti sining balaan nga duta. Halin sa nasidlangan tubtob sa nakatundan nga bahin, ang takos sang ila parti desi-sais ka kilometro kag halin sa naaminhan tubtob sa nabagatnan nga bahin, ang takos mga anom ka kilometro. Ang Templo sang Ginoo ibutang sa tunga sini.

11Ining balaan nga lugar mangin-iya sang mga pari nga mga kaliwat ni Sadoc. Nag-alagad sila sa akon sing matutom kag wala mag-upod sa iban nga mga Israelinhon sa paghimo sing malaut, pareho sang ginhimo sang iban nga mga Levita.

12Gani magaangkon sila sang pinasahi nga lugar nga madason sa lugar nga iya sang mga Levita, kag manginlabing balaan ini sa tanan.

13Ang mga Levita magaangkon man sang duta nga madason sa iya sang mga pari. Ang kalabaon sini desi-sais ka kilometro halin sa sidlangan pakadto sa nakatundan kag ang kasangkaron anom ka kilometro halin sa naaminhan pakadto sa nabagatnan.

14Ang duta nga ginhalad sa Ginoo amo ang labing maayo sa tanan, kag wala sing bahin sini nga ibaligya ukon ibaylo, ukon sayluhon sa kay bisan sin-o. Balaan ini kag iya ini sang Ginoo.

15Ang bahin sang pinasahi nga duta nga nabilin, nga ang kalabaon desi-sais ka kilometro kag ang kasangkaron mga tatlo ka kilometro indi balaan, pero pagagamiton ini sang mga tawo. Sarang sila makaestar didto kag makagamit sang duta. Ang siudad ibutang sa tunga sini,

16kag mangin 2,520 ka yarda nga kwadrado ini sa tagsa ka kilid.

17Sa bug-os nga palibot sang siudad sa tagsa ka kilid may bakante nga lugar nga 140 ka yarda ang kasangkaron.

18Ang nabilin nga duta sa tapos mapatindog ang siudad sa katambi sang balaan nga lugar sa nabagatnan, anom ka kilometro ang kalabaon kag tatlo ka kilometro ang kasangkaron sa sidlangan kag anom ka kilometro ang kalabaon kag tatlo ka kilometro ang kasangkaron sa nakatundan. Pagagamiton ini nga palangumhan sang mga tawo nga nagaestar sa siudad.

19Ang bisan sin-o nga nagaestar sa siudad, bisan sa diin sia nga tribo maghalin, sarang makapanguma sina nga duta.

20Gani ang bug-os nga kalaparon sang ginpain nga duta, desi-sais ka kilometro nga kwadrado. Ang lugar para sa siudad nalakip na sa sini.

21Ang nabilin nga duta sa nasidlangan kag sa nakatundan sini nga lugar sa diin yara ang Templo, ang duta sang mga pari, ang duta sang mga Levita kag ang siudad, iya sang nagagahom nga pangulo. Nagalambot ini halin sa sidlangan pakadto sa nasidlangan nga dulonan halin sa nakatundan pakadto sa Dagat sang Mediteraneo, kag nagapadulong sa naaminhan malapit sa bahin nga iya ni Juda kag sa nabagatnan malapit sa bahin nga iya ni Benjamin.

23Sa nabagatnan sining pinasahi nga bahin, ang kada-isa sang nabilin nga mga tribo magabaton sing isa ka parti sang duta nga ang dulonan nagapadulong sa Dagat sang Mediteraneo sa nakatundan nga dulonan halin sa nasidlangan nga dulonan, kag halin sa aminhan pakadto sa bagatnan. Amo ini ang ila pagpasunod: Benjamin Simeon Isacar Zabulon Gad

28Sa nabagatnan nga kilid sang bahin nga ginhatag sa tribo ni Gad, ang dulonan nagapadulong sa nabagatnan-nakatundan halin sa Tamar pakadto sa mga tubig sang Kades, kag dayon pakadto sa naaminhan-nakatundan nga nagatambi sa dulonan sang Ehipto pakadto sa Dagat sang Mediteraneo.

29Ang Ginoo nga Gamhanan nagsiling, “Amo ini ang pagpartida sang duta sa nagkalainlain nga mga tribo sang Israel agod ila ini panag-iyahan.”

30May dose ka mga alagyan pasulod sa siudad sang Jerusalem. Ang tagsa sang apat ka pader 2,520 ka yarda ang kalabaon, kag may tatlo ini ka mga pwerta, ang tagsa ka pwerta ginhingalanan sa tagsa ka tribo. Ang mga pwerta sa naaminhan nga pader ginhingalanan sa kay Ruben, Juda, kag Levi. Ang mga pwerta sa nasidlangan nga pader ginhingalanan sa kay Jose, Benjamin, kag Dan. Ang mga pwerta sa nabagatnan nga pader ginhingalanan sa kay Simeon, Isacar, kag Zabulon. Ang mga pwerta sa nakatundan nga pader ginhingalanan sa kay Gad, Aser, kag Neftali.

35Ang bug-os nga kalabaon sang pader sa palibot sang siudad 10,080 ka yarda. Ang ngalan sang siudad halin sadto tubtob sa ulihi amo ini: “Ang Ginoo Yari Diri!”

← Chapter 47 Jump to: