Ezekiel 8

Ilonggo (Maayong Balita nga Biblia (2012))

← Chapter 7 Jump to: Chapter 9 →

1Sa ikalima nga adlaw sang ikan-om nga bulan sang ikan-om nga tuig sang pagbihag sa amon, ang mga pangulo sang mga bihag halin sa Juda yadto didto sa akon balay nga nagapungko upod sa akon. Sa hinali ang gahom sang Ginoo nga Gamhanan nag-abot sa akon.

2Dayon nagtangla ako kag nakita ko ang isa ka palanan-awon nga daw dagway sang tawo. Halin sa iya hawak paidalom daw kalayo, kag halin sa iya hawak paibabaw nagaidlak subong sang napahining nga bronsi.

3Gin-untay niya ang daw kamot kag gindakop niya ako sa buhok. Dayon sa sini nga palanan-awon gin-alsa ako sang Espiritu sang Dios sa kahawaan, kag gindala ako sa Jerusalem. Gindala niya ako sa nasulod nga alagyan sang naaminhan nga pwerta sang Templo, sa diin may isa ka diosdios nga ginakaakigan sang Dios.

4Didto nakita ko ang masilaw nga kasanag nga nagapahayag sang presensya sang Dios sang Israel subong sang nakita ko sang didto ako sa higad sang Suba sang Kebar.

5Ang Dios nagsiling sa akon, “Tawo nga mamalatyon, tulok ka sa aminhan.” Nagtulok ako, kag didto malapit sa altar sa alagyan pakadto sa pwerta nakita ko ang diosdios nga ginakaakigan sang Dios.

6Ang Dios nagsiling sa akon, “Tawo nga mamalatyon, nakita mo bala ang ila ginahimo? Tan-awa ang mga kangil-aran nga ginahimo diri sang mga tawo sang Israel. Ginatabog nila ako palayo gikan sa akon balaan nga lugar. Makita pa gid nimo ang labi pa ka makahuloya nga mga butang sang sa sini.”

7Gindala niya ako sa pwerta sang nagwa nga pasiyuhan kag ginpakita niya sa akon ang buho sang pader.

8Nagsiling sia, “Tawo nga mamalatyon, kutkot ka diri sa pader.” Nagkutkot ako, kag nakita ko ang isa ka pwertahan.

9Ginsingganan niya ako, “Sulod ka kag tan-awa ang mga kalautan kag mga kangil-aran nga ila ginhimo didto.”

10Gani nagsulod ako kag nagtan-aw. Ang mga pader puno sing mga larawan sang mga man-og, kag iban nga mga sapat nga di-matinlo, kag iban pa gid nga mga butang nga ginasimba sang mga Israelinhon.

11Setenta ang mga pangulo sang Israel ang yadto didto lakip kay Jaazanias nga anak ni Safan. Ang kada-isa nagauyat sing insensario, kag ang aso nagatub-ok halin sa insyenso.

12Ang Dios nagpamangkot sa akon, “Tawo nga mamalatyon, nakita mo bala ang ginahimo sang mga pangulo sang Israel sa tago lamang’? Tanan sila nagasimba sa kwarto nga puno sang mga imahen. Ang ila rason amo ini: ‘Ang Ginoo indi makakita sa aton! Ang Ginoo nagsikway sang pungsod.’”

13Dayon ginsingganan ako sang Ginoo, “Makita mo sila nga nagahimo sing mga makangilil-ad nga mga butang nga sobra pa sina.”

14Gani gindala niya ako sa naaminhan nga pwerta sang Templo kag ginpakita sa akon ang mga babayi nga nagahibi tungod sang pagkapatay sang dios nga si Tamus.

15Nagpamangkot sia, “Tawo nga mamalatyon, nakita mo bala ina? Makakita pa ikaw sang mga makangilil-ad nga mga butang nga sobra pa sina.”

16Gani gindala niya ako sa nasulod nga pasiyuhan sang Templo. Didto malapit sa pwerta sang santuaryo, sa gintung-an sang altar kag sang alagyan, may mga baynte singko ka mga lalaki. Nagatalikod sila sa santuaryo, kag nagaluhod nga nagaatubang sa sidlangan, nga nagasimba sa nagabutlak nga adlaw.

17Ang Ginoo nagsiling sa akon, “Tawo nga mamalatyon, nakita mo bala ina? Ang mga tawo sang Juda indi ayawan sa paghimo sang tanan nga mga kangil-aran nga imo nakita diri kag sa pagpalapta sang kinagamo sa bug-os nga pungsod. Ang lain pa gid kay nagakadto sila diri sa Templo kag nagahimo sini nga mga butang sa pagpaakig pa gid sa akon. Tan-awa kon daw ano ang ila pagpasipala sa akon!

18Matilawan nila ang akon nagabalingaso nga kaakig. Indi ako magpatawad ukon magkaluoy sa ila. Magapangamuyo sila sing mabaskog sa akon, pero indi ako magpamati sa ila.”

← Chapter 7 Jump to: Chapter 9 →