Proverbs 10

Ilokano (Ti Biblia (1973))

← Chapter 9 Jump to: Chapter 11 →

1Dagiti proverbios ni Salomon. Ti masirib nga anac paragsakenna ni amana; ngem ti maag nga anac isu ti babantot ni inana.

2Dagiti gamgameng ti kinadakes awan mamaayda; ngem ti kinalinteg mangispal manipud ken patay.

3Ni Jehova dinanto ituloc a ti cararua ti nalinteg mabisinan; ngem iwalinnanto ti calicagum ti nadangkes.

4Pumanglaw ti agtrabajo a naliway ti imana; ngem ti ima ti nasalucag mamabacnang.

5Ti agurnong no calgaw masirib nga inanac; ngem ti maturog no panagani inanac a mangibabain.

6Dagiti bendicion agsaadda iti olo ti nalinteg, ngem ti kinauyong apputenna ti ngiwat ti nadangkes.

7Ti pacalaglagipan ti nalinteg nagasat; ngem ti nagan ti nadangkes aglungsotto.

8Ti masirib iti pusona awatennanto dagiti bilbilin; ngem ti natanattat a maag mapasagto.

9Ti magna a sililinteg magna a sitatalged; ngem ti mamadakes cadagiti daldalanna maammoanto.

10Ti agkidkidday cadagiti matana mamataud iti ladingit; ngem ti natanattat a maag mapasagto.

11Ti ngiwat ti nalinteg ubbog ti biag; ngem ti kinauyong abbonganna ti ngiwat ti nadangkes.

12Ti gura riingenna ti ringgor; ngem ti ayat abbonganna amin a salsalungasing.

13Cadagiti bibig ti addaan kinasaririt masaracan ti kinasirib; ngem ti pang-or maipaay iti bucot ti awanan pannacaawat.

14Dagiti masirib a tattao agurnongda iti pannacaammo; ngem ti ngiwat ti maag isu ti agdama a pacadadaelan.

15Ti sanicua ti nabacnang a tao isu ti natibker nga ilina: ti pacadadaelan ti napanglaw isu ti kinapanglawna.

16Ti kinamanagtrabajo ti nalinteg agduyos iti biag; ti kinarang-ay ti nadangkes agduyos iti basol.

17Daydiay adda iti dalan ti biag icascasona ti pammagbaga; ngem ti mangbaybay-an iti pannacatubngar agbiddut.

18Ti mangilimed iti gura naulbod dagiti bibigna; ti agsao iti pammadpadakes maag.

19Cadagiti adu a sasao saan nga agcurang ti pannacasalungasing; ngem ti manengngel cadagiti bibigna agaramid a sisisirib.

20Ti dila ti nalinteg cas pirac a napili: ti puso ti nadangkes bassit ti pategna.

21Dagiti bibbibig dagiti nalinteg adu dagiti mataraonanda; ngem dagiti maag matmatayda iti caawan ti pannacaawatda.

22Ti bendicion ni Jehova ti mangpabacnang; ket saanna nga anayan iti ladingit.

23Iti maag cas la panangayayamna ti panangaramidna iti kinadakes; ket casta met ti sirib iti tao a mannacaawat.

24Ti buteng ti nadangkes, dumtengto kencuana; ket ti tarigagay ti nalinteg maitedto.

25No macalabas ti alipugpog, ti nadangkes awanen; ngem ti nalinteg isu ti agnanayon a pacaibatayan.

26Cas suca cadagiti ngipen, ken cas asuc cadagiti mata, casta ti nasadut cadagiti mangibaon kencuana.

27Ti panagbuteng ken ni Jehova nayunanna dagiti al-aldaw; ngem dagiti tawtawen ti nadangkes mapaababadanto.

28Ti inanama ti nalinteg kinaragsacto; ngem ti namnama ti nadangkes mapucawto.

29Ti dalan ni Jehova maysa a sarikedked cadagiti nalinteg; ngem isu ti pacadadaelan cadagiti agaramid iti kinadakes.

30Ti nalinteg dinto maisina; ngem ti nadangkes dinto agtalinaed ditoy daga.

31Ti ngiwat ti nalinteg agyesngaw iti sirib; ngem ti naulpit a dila mapulsotto,

32Dagiti bibig ti nalinteg ammoda ti macaay-ayo; ngem ti ngiwat ti nadangkes agsao iti kinaulpit.

← Chapter 9 Jump to: Chapter 11 →