Proverbs 17

Ilokano (Ti Biblia (1973))

← Chapter 16 Jump to: Chapter 18 →

1Nasaysayaat ti sangcasacmul a kilabban ket cacuycuyogna ti kinatalna, ngem ti balay a napno iti panagramrambac a buyugen ti riri.

2Ti adipen a nanacman ti cababalinna iturayannanto ti anac a mangibabain, ket maibingayto iti tawiden dagiti agcacabsat.

3Ti pagguguran agservi iti pirac, ken ti horno iti balitoc; ngem ni Jehova suutenna dagiti puspuso.

4Ti managdacdakes imdenganna dagiti nadangkes a bibig; ket ti naulbod ipangagna ti dila a naranggas.

5Siasinoman a mangrabrabac iti napanglaw, umsienna ti Namarsua kencuana; ket ti agraasac iti kinadacsangasat ti sabali saanto a di-madusa.

6Ti annac dagiti annac isuda dagiti balangat dagiti lallacay; ket ti dayaw dagiti annac dagiti dadackelda.

7Ti nadaeg a sarita saan a maipaay iti maag; adadda manen a saan a maipaay dagiti naulbod a bibig iti principe.

8Ti pannocsoc cas napateg a bato cadagiti matmata ti tao nga agicut; uray sadinoman a turongenna, rumang-ay.

9Ti mangabbong iti salungasing birukenna ti ayat; ngem ti mangdagdagullit iti maysa a panggep, mapaadayu dagiti nadecket a gagayyem.

10Ti panangtubngar sumrec a naununeg iti maysa nga addaan pannacaawat ngem ti sangagasut a baot iti maysa a maag.

11Ti dakes a tao birbirukenna laeng ti panagsukir; iti casta ti nadawel a babaonen maibaonto a bumusor kencuana.

12Nasaysayaat a masarac ti oso a babai a natacawan cadagiti annacna ngem iti maysa a tao a maag iti kinamaagna.

13Siasinoman a mangisupapac ti dakes iti imbag, ti dakes dinto pumanaw iti balayna.

14Ti pannacairugi ti riri cas la no ti maysa ibuangna ti danum; gapuna lisiam ti susic, iti sacbay ti riribuc.

15Ti mangalangon iti nadangkes, ken ti mangirurumen iti nalinteg, isuda a dua agpadpadada a macarimon ken ni Jehova.

16Apay adda aya iti ima ti maag pateg a panggatangna iti kinasirib, idinto nga awan kencuana ti pannacaawat?

17Ti gayyem agayat iti amin a tiempo; ket ti cabsat nayanac a maipaay a casalisal.

18Ti tao nga awanan pannacaawat iyunnatna ti imana, ket agbalin a talged iti saclang ti caarrubana.

19Ayatenna ti panagsalungasing ti agayat iti ringgor: ket ti mangitol-o iti ruanganna birukenna ti pannacadadael.

20Ti naiwawa ti pusona awan imbag a masaracna; ket ti addaan naulpit a dila matnag iti ranggas.

21Ti agputot iti maag pagladladingitannanto; ken ti ama ti maag awan ragsacna.

22Ti naragsac a puso naimbag nga agas; ngem ti siduducot nga espiritu magmaganna ti tultulang.

23Ti nadangkes a tao awatenna ti pannocsoc nga aggapu iti barucong, a mangkillo cadagiti daldalan ti kinajusticia.

24Ti kinasirib adda iti saclang ti addaan pannacaawat; ngem dagiti mata ti maag addada cadagiti pungto ti daga.

25Ti maag nga anac isu ti liday ken amana, ken pait iti nangipasngay kencuana.

26Casta met ti panangdusa iti nalinteg, saan a naimbag, uray ti panangdanar cadagiti natacneng gapu ti kinalintegda.

27Ti mangmedmed cadagiti saona addaan pannacaammo; ket ti nalamiis ti nakemna tao a mannacaawat.

28Uray pay ti maag, no agulimec, maibilang a masirib; no pagcaemenna dagiti bibigna, maibilang a manakem.

← Chapter 16 Jump to: Chapter 18 →