Proverbs 16

Ilokano (Ti Biblia (1973))

← Chapter 15 Jump to: Chapter 17 →

1Dagiti pakinakem ti puso biang ti tao; ngem ti sungbat ti dila biang ni Jehova.

2Amin dagiti daldalan ti maysa a tao nadalusda cadagiti matana met laeng; ngem ni Jehova gantingenna dagiti espiritu.

3Icumitmo dagiti ar-aramidmo ken ni Jehova, ket dagiti pangpanggepmo mapasingkedandanto.

4Ni Jehova inaramidna tunggal banag iti pacaipaayanna; wen, uray dagiti nadangkes a maipaay iti aldaw ti ranggas.

5Isu-amin a natangsit ti pusona macarimon ken ni Jehova; uray ti ima ken ima agpinnetpetda, isu saanto a di madusa.

6Gapu iti caasi ken kinapudno mapacawan ti kinadakes; ket gapu iti panagbuteng ken ni Jehova dagiti tattao panawanda ti dakes.

7No dagiti daldalan ti maysa a tao macaayayoda ken ni Jehova, pakicappiaenna kencuana uray dagiti cabcabusorna.

8Nasaysayaat ti bassit, a cacuyogna ti kinalinteg, ngem ti adu a masapulan a cacanunong ti kinakillo.

9Ti puso ti tao dardarepdepenna ti dalanna, ngem ni Jehova ti mangiturong cadagiti addangna.

10Ti nadiosan a panangikeddeng adda cadagiti bibig ti ari; ti ngiwatna saanto nga agsalungasing iti panangipato.

11Ti apag-isu a titimbengan ken cacatian cucua ida ni Jehova; amin dagiti panimbeng iti supot aramidna.

12Maysa a macarimon cadagiti ar-ari ti panagaramid iti kinadangkes; ta ti trono maipasdec babaen ti kinalinteg.

13Dagiti sililinteg a bibig isuda dagiti macaayayo cadagiti ar-ari; ket ayayatenda ti agsao iti nalinteg.

14Ti rungsot ti maysa nga ari cas cadagiti babaonen ni patay; ngem ti masirib a tao pagtalnaennanto.

15Iti lawag ti langa ti ari adda biag; ket ti paraburna cas ulep ti maududi a tudo.

16Anian a kinasaysayaat ti pananggun-od iti kinasirib ngem iti balitoc! Wen, ti pananggun-od iti pannacaawat adadda a pilien ngem iti pirac.

17Ti calsada ti nalinteg isu ti ipapanawna iti dakes; ti mangsalimetmet iti dalanna salacnibanna ti cararuana.

18Ti kinatangsit umununa ngem ti pannacadadael, ket ti napalangguad nga espiritu casacbayan ti pannacatnag.

19Nasaysayaat ti kinapacumbaba ti espiritu cadagiti napanglaw, ngem ti pannakibingay iti sinamsam cadagiti natangsit.

20Ti mangicancano iti sao masaracannanto ti imbag; ket siasinoman nga agcammatalec ken ni Jehova, isu ti naragsac.

21Ti masirib ti pusona managanto iti manakem; ket ti kinasam-it dagiti bibig degdeganna ti pannacasursuro.

22Ti pannacaawat isu ti ubbog ti biag iti tao nga agicut; ngem ti pacatubngaran dagiti maag isu ti kinamaagda.

23Ti puso ti masirib isurona ti ngiwatna; ket nayonanna ti pannacasursuro dagiti bibigna.

24Dagiti nacaay-ayo a sasao arigda la rara, nasam-itda iti cararua, ket salun-at cadagiti tultulang.

25Adda dalan a cas la nalinteg iti maysa a tao, ngem ti panungpalanna daldalan ni patay.

26Ti ganas ti agtrabajo a tao agtrabajo a gapu kencuana; ta ti ngiwatna ti mangdagdag.

27Ti tao nga awan cais-iscanna sigsigpenna ti ranggas; ket cadagiti bibigna adda bumarbara nga apuy.

28Ti naulpit a tao agiracurac iti ringgor; ti managarasaas mapaadayuna dagiti nadecket a gagayyem.

29Ti tao a nauyong masulisugna ti caarrubana, ken iturongna iti dalan a saan a naimbag.

30Daydiay agkidem tapno agpakinakem cadagiti nadangkes a banbanag; ken mangem-em cadagiti bibigna mangpaltuad iti dakes.

31Ti ubanan nga olo balangat ti kinadayag; no masaracanto iti dalan ti kinalinteg.

32Ti nabannayat nga agpungtot nasaysayaat ngem ti nabileg; ket ti macatengngel iti espirituna, nasaysayaat ngem ti mangparmec iti maysa a pagilian.

33Ti gasat maipisoc iti saclot; ngem ti dagup ti pannacaikeddengna biang ni Jehova.

← Chapter 15 Jump to: Chapter 17 →