Proverbs 6

Ilokano (Ti Biblia (1973))

← Chapter 5 Jump to: Chapter 7 →

1Anacco, no nagbalinca a talged iti caarrubam, no inyunnatmo dagiti im-imam a maipaay ti maysa a gangannaet;

2Nasiloancan cadagiti sasao ta ngiwatmo, natiliwcan cadagiti sasao ta ngiwatmo.

3Aramidem daytoy ita, anacco, ket ispalem ta biangmo met laeng, idinto a dimtengcan iti ima ti caarrubam: inca, agpacumbabaca, ket ud-udam ti caarrubam;

4Dica paturogen dagiti matam, ken dica met pagridepen dagiti calub ti matam;

5Lumapsutca a cas ti kigaw iti ima ti mangnganup, ken cas la tumatayab iti ima ti mannilo.

6Inca ken coton, sica a nasadut; utobem dagiti daldalanna, ket sumiribca:

7Isu nga idinto nga awan pangulona, mangaywan man, wenno agturay,

8Saganaenna ti canenna iti calgaw, agurnong iti taraonna iti panagani.

9Casano ti cabayag ti panagturogmo, O sadut? Caano ti ibabangonmonto ita turogmo?

10Ala pay bassit a turog, bassit a ridep, bassit a panagdalikepkep dagiti im-ima tapno macaturogca:

11Iti casta dumtengto ti kinapanglawmo a cas mannanacaw, ken ti pannacasapulmo unay a cas nagtagiigam a tao,

12Awan cais-iscanna a tao, tao ti kinadangkes, daydiay magna a siuulpit ti ngiwatna;

13Nga agkiddakidday cadagiti matana, nga agsao cadagiti sacana, nga agsenas cadagiti ramramayna;

14Nga iti pusona adda kinaulpit, isu a segsegpenna a cancanayon ti dakes, nga agiwara iti panagririri.

15Gapuna ti pacarigatanna dumtengto a kellaat; makellaatto a madadael, ket iti dayta awanto ti pamuspusanen.

16Adda innem a banag a guraen ni Jehova; wen, pito dagiti macarimon kencuana.

17Natangsit a matmata, naulbod a dila, ken im-ima a mangibuyat iti dara nga awan basolna;

18Puso nga agpacpakinakem cadagiti nadangkes a panggepen, sacsaca a nacarting a tumaray iti panangranggas,

19Natiri a sacsi nga agbalicas iti ulbod, ken ti agmula iti riri cadagiti agcacabsat.

20Anacco, salimetmetam dagiti bilbilin ni amam, ket dica baybay-an ti linteg ni inam:

21Igalutmo ida a cancanayon ita pusom; iyuccormo ida ita tengngedmo.

22No magnaca, idalannacanto; no maturogca, agbantayto kenca; ket no macariingca, makisaritanto kenca.

23Ta ti pagbilinan isu ti pagsilawan; ket ti linteg isu ti silaw; ket dagiti panangtubngar ti sursuro isuda ti dalan ti biag:

24Tapno saluadandaca iti dakes a babai; iti pasablog ti dila ti gangannaet.

25Dica garteman ti sayaatna ita pusom; dica met ituloc nga alaennaca cadagiti calub ti matana.

26Ta maipuon iti maysa a balangcantis ti lalaki pagpatinggaannanto ti sangcapisi a tinapay; ket ti makicamalala a babai anupenna ti napateg a biag.

27Mabalin aya ti maysa a tao ti agsaclut iti apuy, ket saan a mauram dagiti pagan-anayna?

28Wenno adda macabalin a magna iti rabaw dagiti nabara a beggang, ket saan a masinit dagiti sacsacana?

29Casta ti sumrec iti asawa ti caarrubana; siasinoman a mangtignay kencuana saanto a di madusa.

30Dagiti tattao saanda nga umsien ti mannanacaw, no agtacaw tapno agpennec, no mabisin:

31Ngem no masalamaan, isublinanto ti maminpito; itednanto amin a sanicta iti balayna.

32Ti makicamalala iti maysa a babai awan ti pannacaawatna: daydiay agaramid iti casta cayatna a dadaelen ti cararuana met laeng.

33Sugsugat ken pannacaibabain ti magun-odnanto; ket ti pannacauy-uyawna dinto mapunasan.

34Ta ni imon isu ti kinarungsot ti lalaki; ket dinanto iliclic iti aldaw ti pammales.

35Dinanto taliawen ti aniaman a pangsubbot; dinto met agtalna a malinglingay, uray iccam iti adu a sagsagut.

← Chapter 5 Jump to: Chapter 7 →