Proverbs 8

Ilokano (Ti Biblia (1973))

← Chapter 7 Jump to: Chapter 9 →

1Saan aya nga agpucpuccaw ni sirib, ken agtimtimec ni pannacaawat?

2Iti tapaw dagiti natayag a disso nga asideg iti dalan, nga pagtutugmucan dagiti dandana, isu agtatacder.

3Iti denna dagiti ruruangan, iti pagsercan ti ili, iti pagsercan cadagiti ruruangan, isu agpuccaw a sipipigsa:

4Cadacayo, O tattao, umayabac; ket ti timecco maipaay cadagiti annac dagiti tattao.

5O dacayo a nanengneng, awatenyo ti kinamanakem; ket, dacayo a maag, agmannacaawat cadi ta pusoyo.

6Denggenyo, ta agsaoac cadagiti mangnibinibi a banbanag; ken ti panaglucat dagiti bibigco nalintegto a banag.

7Ta ti ngiwatco agbalicasto iti kinapudno; ket ti kinadangkes isu ti macarimon cadagiti bibigco.

8Amin dagiti sasao ti ngiwatco addada iti kinalinteg; awan aniaman a kiwer wenno naulpit cadacuada.

9Biigda a nabatad iti macaawat, ken nalintegda cadagiti macasarac iti pannacaammo.

10Awatenyo ti pannursuroc, a saan ketdi a ti pirac; ken ti pannacaammo, a nangnangrona ngem ti balitoc a napili.

11Ta ti sirib napatpateg ngem dagiti rubrubi; ket amin dagiti cucua a mabalin a tarigagayan saanda a maipadpad kencuana.

12Siac ni sirib pinagbalinco ni kinamanakem a pagtaengac, ken sarakec da pannacaammo ken kinaannad.

13Ti panagbuteng ken ni Jehova isu ti pananggura iti dakes: tangsit, cuspag, ken ti dakes a dalan, ken ti naulpit a ngiwat, guraec.

14Ti patigmaan biangco, ken naimbag a pannacaammo: siac ti pannacaawat; adda caniac ti pannacabalin.

15Gapu caniac agari dagiti ar-ari, ket dagiti piprincipe agikeddengda ti kinalinteg.

16Gapu caniac agturay dagiti piprincipe, ken dagiti natacneng, wen, amin dagiti oc-ocom ditoy daga.

17Ayatec dagiti agayat caniac; ket dagiti mangbiruc a sigaganetget caniac masaracandacto.

18Kinabacnang ken dayaw addada caniac; wen, ti napaut a kinabacnang ken kinalinteg.

19Ti bungac nasaysayaat ngem balitoc, wen, ngem iti nasudi a balitoc, ket ti pataudec nasaysayaat ngem pirac a napili.

20Magnaac iti dalan ti kinalinteg, iti tengnga dagiti dandana ti kinajusticia;

21Tapno dagiti agayat caniac mapagtawidco iti sanicua, ken tapno punoec dagiti paggamenganda.

22Ni Jehova inicutannac idi pangrugian ti dalanna, idi casacbayan dagiti ar-aramidna idi ugma.

23Naipatacderac nanipud kinaagnanayon, nanipud idi punganay, idi awan pay toy daga.

24Idi awan pay dagiti yuyeng, napaaddaacon; idi awan pay ub-ubbog nga aglaplapusanan iti danum.

25Idi di pay naisaad dagiti banbantay, immun-una ngem dagiti turturod napaaddaacon;

26Idi a dina pay la inaramid ti daga, ken dagiti taytay-ac, wenno ti punganay ti tapuc ti lubong.

27Idi impasdecna dagiti langlangit, addaac idiay: idi binukelna ti wangawangan ti yuyeng,

28Idi pinatibkerna dagiti tangtangatang iti ngato, idi napapigsa dagiti ub-ubbog ti yuyeng,

29Idi iniccanna ti baybay iti beddengna, tapno dagiti dandanum dida salungasingen ti panagbilinna, idi inugisanna dagiti pagsaadan toy daga;

30Idin addaac iti sibayna a cas mamangolo nga agobra; ket siac ti pagrag-oanna, nga inaldaw siraragsacac a canayon iti sangona,

31Siraragsacac iti pagnaedan a dagana; ket pagrag-oac ti pannakiadda cadagiti annac dagiti tao.

32Ita ngarud, annacco, dumngegcayo caniac; ta bendito dagiti mangsalimetmet cadagiti daldalanco.

33Denggenyo ti pannursuro, ket sumiribcayo, ken dicayo coma agkedked kencuana.

34Bendito ti tao a dumngeg caniac, nga agpuyat nga inaldaw cadagiti ruanganco, nga agdadaan iti asideg dagiti rikep dagiti ridawco.

35Ta siasinoman a macasarac caniac masaracanna ti biag, ken magun-odnanto ti parabur ni Jehova.

36Ngem ti agbasol a maibusor caniac padacsenna ti cararuana met laeng: amin dagiti gumurgura caniac ayatenda ni patay.

← Chapter 7 Jump to: Chapter 9 →