Proverbs 21

Ilokano (Ti Biblia (1973))

← Chapter 20 Jump to: Chapter 22 →

1Ti puso ti ari adda iti ima ni Jehova cas cadagiti pagayusan ti danum; iturongna iti sadinoman a pagayatanna.

2Tunggal dalan ti tao nalinteg cadagiti matana met laeng; ngem ni Jehova gantingenna dagiti puspuso.

3Ti panagaramid iti kinalinteg ken kinajusticia adadda a pacaayaywan ni Jehova ngem ti daton.

4Ti nangato a panagkitkita, ken ti natangsit a puso, uray pay ti pagsilawan silawan ti nadangkes, basol.

5Dagiti pampanunot ti nagaget agduyosda laeng iti panagrang-ay, ngem amin a naganat gumanat laeng nga agpanglaw.

6Ti pananggun-od cadagiti gamgameng gapu iti naulbod a dila isu ti alingasaw a pagalallicubengen dagiti agbiruc iti patay.

7Ti kinauyong dagiti nadangkes mangisagadto cadacuada, gapu ta madida nga agaramid iti kinalinteg.

8Ti dalan ti nacargaan iti babac napalalo a nagkillo; ngem no maipapan iti nadalus, ti aramidna nalinteg.

9Nasaysayaat ti agnaed iti suli ti toctoc ti balay, ngem ti pannakinaed iti mannakiringgor a babai iti nalawa a balay.

10Ti cararua ti nadangkes tarigagayanna ti dakes: ti caarrubana saan a macasarac iti parabur cadagiti matana.

11No madusa ti managuyaw, mapasirib ti nanengneng; ket no ti masirib maisuro, awatenna ti pannacaammo.

12Ti nalinteg a tao ototobenna ti balay ti nadangkes, no casano ti pannacaitublac dagiti nadangkes iti pannacarbada.

13Siasinoman a mangapput cadagiti lapayagna iti ickis ti napanglaw, isu umkisto met, ngem dinto maipangag.

14Ti sagut a nalimed pagtalnaenna ti pungtot; ket ti maysa a sagut iti saclot epepenna ti napigsa a rungsot.

15Rag-o iti nalinteg ti panagaramidna iti kinalinteg, ngem maysa a pannacadadael cadagiti agar-aramid iti kinadangkes.

16Ti tao a mayawawan iti dalan ti pannacaawat agtungpalto iti tallaong dagiti natay,

17Ti agayat iti panagayayam napanglawto a tao: ti agayat iti arac ken lana saanto a nabacnang.

18Ti nadangkes isu ti subbot ti nalinteg; ket ti mangliliput maisandi iti nalinteg.

19Nasaysayaat ti agnaed iti daga a langalang, ngem iti pannakinaed iti babai a mannakiringgor ken naalipunget.

20Adda napateg a gameng ken lana iti balay ti masirib; ngem ti maag a tao alimunenna ida.

21Ti mangsursurot iti kinalinteg ken kinamanagayat masaracanna ti biag, kinalinteg, ken dayaw.

22Ti masirib a tao ulienna ti ili ti napigsa, ket deppesenna ti bileg ti kinatalgedna.

23Siasinoman a mangsalimetmet iti ngiwat ken dilana salacnibanna ti cararuana cadagiti ducducot.

24Ti natangsit ken napalangguad a tao, managuyaw ti naganna; agaramid iti kinacuspag ti kinatangsit.

25Ti calicagum ti nasadut mamapatay kencuana; ta dagiti im-imana madida nga agbannog.

26Adda agagum a narawet nga agmalmalem; ngem ti nalinteg mangted ken di-agmedmed.

27Ti daton ti nadangkes maysa a kinarimon; adadda pay no ipaayna a sidadangkes ti panunotna!

28Ti natiri a sacsi mapucawto; ngem ti tao a macangngeg agsaonto tapno agtalinaed.

29Ti nadangkes a tao irupangetna ti rupana; ngem no ti nalinteg, patibkerenna dagiti daldalanna.

30Awan ti kinasirib wenno pannacaawat wenno patigmaan a maicaniwas ken ni Jehova.

31Ti cabayo maisagana a maipaay iti aldaw ti gubat ngem ti balligi biang ni Jehova.

← Chapter 20 Jump to: Chapter 22 →