Proverbs 28

Ilokano (Ti Biblia (1973))

← Chapter 27 Jump to: Chapter 29 →

1Dagiti nadangkes agtalawda idinto nga awan ti tao a mangcamat, ngem dagiti nalinteg situturedda a cas leon.

2Gapu iti kinasalungasing ti daga adu dagiti agturayna; ngem gapu cadagiti tao nga addaan pannacaawat ken pannacaammo ti casasaadna agnanayonto.

3Ti macurcurangan a tao a mamarigat cadagiti napanglaw cas la mangikisap a tudo nga awan tiddaenna a taraon.

4Dagiti mangbaybay-a iti linteg ipadpadayawda dagiti nadangkes; ngem dagiti mangsalimetmet iti linteg makisuppiatda cadacuada.

5Dagiti dakes a tattao dida maawatan ti kinalinteg; ngem dagiti mangbiruc ken Jehova maawatanda amin a banbanag.

6Nasaysayaat ti napanglaw a magna iti kinasingpetna, ngem ti naulpit cadagiti dalanna, nupay nabacnang.

7Ti mangsalimetmet iti linteg anac a masirib: ngem ti makicuyog cadagiti nabuclis ibabainna ni amana.

8Ti mangnayon iti cucuana gapu iti panagpaanac ken panagpatubo, iyurnonganna daydiay nadongngo cadagiti napanglaw.

9Ti di mangyallingag iti lapayagna iti panangdengngegna iti linteg, uray pay ti cararagna macarimon.

10Ti mangiturong cadagiti nalinteg iti dakes a dalan, matnagto met laeng iti palab-ogna; ngem dagiti napnoan-imbag agtawiddanto iti imbag.

11Ti nabacnang a tao masirib iti bucodna a panangipagarup; ngem ti napanglaw a mannacaawat ubogenna.

12No agballigi ti nalinteg, adda dackel a dayag; ngem no ngumato dagiti nadangkes, dagiti tattao aglemmengda.

13Ti mangabbong cadagiti salungasingna dinto rumang-ay; ngem ti mangipudno ken mangbaybay-an cadacuada maragpatnanto ti caasi.

14Nagasat ti tao a sibubuteng a cancanayon iti dakes ngem ti mangipatangken iti pusona matuangto iti pacadadaelan.

15Cas leon nga aguga, ken oso nga agsawar, casta ti nadangkes nga agturay iti napanglaw nga umili.

16Ti principe nga agcurang iti pannacaawat dackel met a mamarigat; ngem ti manggura iti kinaagum mapaatiddugnanto dagiti aldawna.

17Ti tao a mapabaclayan ti dara ti siasinoman a tao aglemmengto iti dariwangwang; awan coma ti mangigawid kencuana.

18Ti magna a sililinteg maispalto; ngem ti naulpit cadagiti dalanna matuangto a dagus.

19Ti mangtrabajo iti dagana addaanto ti naruay a taraon; ngem ti sumurot cadagiti ubbaw a tattao naananayto ti kinapanglawna.

20Ti matalec a tao aglaplapusananto cadagiti bendicion; ngem ti sigaganat a bumacnang saanto a di madusa.

21Ti panamagduduma cadagiti tattao saan a nasayaat; saan met a nasayaat a sumalungasing ti maysa a tao gapu iti sangcasacmol a taraon.

22Ti dakes ti matana gumanat iti panagbacnang, ket dina ammo a ti pannacacurang dumtengto kencuana.

23Ti mangtubngar iti tao adadunto a parabur ti masaracanna iti calpasanna, ngem ti mangpasablog babaen ti dilana.

24Ti tacawanna ni amana wenno ni inana, ket cunana, Saan a caniwas, isu ti cadua ti mangdadael.

25Ti narawet ti espirituna paltuadenna ti ringgor: ngem ti agcammatalec ken ni Jehova mapalucmegto.

26Ti agcammatalec iti pusona met laeng maag; ngem uray siasino a magna a nainsiriban maispalto.

27Ti mangted iti napanglaw dinto macurangan; ngem ti mangilinged cadagiti matana adunto ti pannacailunodna.

28No macangato dagiti nadangkes, aglemmeng dagiti tattao; ngem no mapucawda, umadu dagiti nalinteg.

← Chapter 27 Jump to: Chapter 29 →