Proverbs 26

Ilokano (Ti Biblia (1973))

← Chapter 25 Jump to: Chapter 27 →

1Cas nieve iti calgaw, ken cas tudo iti panagani, casta a ti dayaw saan a mayarnged iti maag.

2Cas iti billit-tuleng iti panagtawtawatawna, cas iti salsallapingaw iti panagtayabna, casta ti lunod nga awan gapgapuna saan nga agdisso.

3Ti baot maipaay iti cabayo, ti freno iti asno, ket ti pang-or iti bucot dagiti maag.

4Dica makisungbat iti maag a cas iti kinamaagna, di la ket ta maipadpadca met kencuana.

5Sungbatam ti maag cas maiparbeng iti kinamaagna, tapno saan nga agsirib cadagiti matana met laeng.

6Ti mangibaon iti maysa a pacdaar a maipaiggem iti maag. Pucolanna ti sacana met laeng, ken inumenna ti pacairurumenan.

7Dagiti sacsaca ti pilay agbibitin a silulupoy: casta ti pangngarig iti ngiwat dagiti maag.

8Cas ti maysa a mangigalut iti bato iti palatibong, casta ti mangipaay iti dayaw iti maag.

9Cas maysa a siit a maisalugsug iti ima ti nabartec, casta ti pangngarig iti ngiwat dagiti maag.

10Cas ti pumapana a sugatenna amin, casta ti manangdan iti maag ken ti manangdan cadagiti lumabas.

11Cas iti aso nga agsubli iti saruana, casta ti maag a mangsunot iti kinamaagna.

12Makitam ti maysa a tao a masirib cadagiti matana met laeng? Adadda ti namnama iti maysa a maag ngem iti daydiay.

13Ti nasadut cunana, Adda leon idiay dalan; adda leon cadagiti lanlansangan.

14Cas iti panagpuspus ti rikep ti ruangan iti nacaisigoanna, casta ti aramiden tay nasadut idiay iddana.

15Ti nasadut ilumlumna ti imana iti pinggan, ket isu mautuyan iti panangidanonna iti ngiwatna.

16Ti nasadut nasirsirib cadagiti matana met laeng ngem cadagiti pito a tattao a macaammo a sumungbat.

17Ti lumabas ket macapungtot iti ringgor nga awan bibiangna, cas itay mangtiliw iti aso a lapayagenna.

18Cas itay mauyong nga agipurruac iti aluten, panpana, ken patay;

19Casta ti tao a mangallilaw iti caarrubana, ket cunana, Saanac aya nga agrabrabac laeng ita?

20Gapu ti caawan ti pagsungrod maiddep ti apuy; ket no awan ti agdaydayengdeng, agsardeng ti riri.

21Cas ti uging parayrayenna dagiti beggang, ken ti sungrod iti apuy; casta ti mannakiriri a tao parayrayenna ti ringgor.

22Dagiti sasao ti agdaydayengdeng arigda la naimas a cancanen, ket dumanonda iti caungan a paset.

23Dagiti bibig a tarabitab ken ti nadangkes a puso arigda la bacca a damili a nacalupcupan iti lati ti pirac.

24Ti gumurgura mangallilaw cadagiti bibigna; ngem penpenenna ti ulbod iti unegna:

25No nasayaat ti panagsaona, saanmo a patpatien; ta adda pito a macarimon idiay pusona:

26Nupay ti gurana abbonganna iti kinasicap, ti kinadangkesna maiparangarangto a sibabatad iti saclang ti gimong.

27Siasinoman a mangcali iti palab-og isu matnagto idiay; ket ti mangitulatid iti bato, agsublinto daydiay a mangladdit kencuana.

28Ti naulbod a dila guraenna ti nadanarna; ket ti napasablog a ngiwat mamataud iti pannacadadael.

← Chapter 25 Jump to: Chapter 27 →