Proverbs 14

Ilokano (Ti Biblia (1973))

← Chapter 13 Jump to: Chapter 15 →

1Amin a masirib a babai bangonenna ti balayna; ngem ti maag purienna cadagiti im-imana met laeng.

2Ti magna iti kinalintegna agbuteng ken ni Jehova; ngem ti nadangkesan cadagiti dalanna isu umsienna.

3Iti ngiwat ti maag adda pagbaot a maipaay iti tangsitna; ngem dagiti bibig dagiti masirib mangsalacnib cadacuada.

4Iti yan nga awan dagiti vacvaca, nadalus ti colloob; ngem adu ti pagrang-ayan gapu iti bileg ti vaca.

5Ti matalec a sacsi dinto agtiri; ngem ti naulbod a sacsi agyesngaw cadagiti tiri.

6Ti managuyaw birukenna ti sirib, ket awan; ngem ti pannacaammo nalaca iti addaan pannacaawat.

7Inca iti sangoanan ti maag a tao, ket dicanto maimatangan kencuana dagiti bibig ti pannacaammo.

8Ti sirib ti manakem isu ti pannacaawatna iti dalanna; ngem ti kinamaag dagiti maag pannacallilaw.

9Ti daton iti salungasing ababienna dagiti maag; ngem cadagiti nalinteg adda naimbag a nakem.

10Ti puso ammona ti bucudna a kinapait; ket ti gangannaet saan a maibiang iti ragsacna.

11Ti balay ti nadangkes mapadsonto; ngem ti calapaw ti nalinteg rumangpayanto.

12Adda dalan a cas la nalinteg iti maysa a tao; ngem ti tungpalna daldalan ni patay.

13Uray iti panagcatawa ti puso agladingit; ket ti tungpal ti ragsac isu ti babantot.

14Ti sumanud iti pusona mabsugto cadagiti bucudna a dalan; ket ti naimbag a tao mapnecto gapu kencuana met laeng.

15Ti nanengneng patienna amin a sao; ngem ti manakem a tao matmatanna a nalaing ti papananna.

16Ti masirib a tao agbuteng, ket umadayu iti dakes; ngem ti maag iparangna ti kinatangsitna, ket agtaltalec.

17Ti nadaras nga agpungtot minamaagto ti panagaramidna; ket ti tao a nadangkes ti sigsigpenna magurgura.

18Ti nanengneng agtawid iti kinamaag; ngem dagiti manakem mabalangatanda iti pannacaammo.

19Dagiti managdacdakes agrucnoyda iti saclang dagiti naimbag; ken dagiti nadangkes, cadagiti ruangan dagiti nalinteg.

20Ti napanglaw manggurgura uray iti caarrubana met laeng; ngem ti nabacnang adu dagiti gagayyemna.

21Ti mangumsi iti caarrubana macabasol; ngem ti adda caasina cadagiti napanglaw, isu ti naragsac.

22Saanda aya a bumiddut dagiti agpakinakem iti dakes? Ngem ti caasi ken pudno maipaaydanto iti agpakinakem iti naimbag.

23Iti amin a trabajo adda gungunaen; ngem ti sarsarita dagiti bibbibig agturong laeng iti kinapanglaw.

24Ti balangat dagiti masirib isu dagiti kinabacnangda; ngem ti kinamaag dagiti maag kinamaag laeng.

25Ti napudno a sacsi mangispal cadagiti cararua; ngem ti agyesngaw cadagiti ul-ulbod mangallilaw.

26Iti panagbuteng ken ni Jehova adda napigsa a panagtalec; ket dagiti annacna addaandanto ayan a pagcamanganda.

27Ti panagbuteng ken ni Jehova isu ti ubbog ti biag; tapno ti tao liclicanna dagiti pangsilo ni patay.

28Ti dayag ti ari adda iti kinaadu ti umili; ngem ti pacarbaan ti principe adda iti kinakirang ti umili.

29Ti nabannayat a macapungtot dackel ti pannacaawatna; ngem ti nadarasudos ti espirituna itantan-ocna ti kinamaag.

30Ti natalna a puso isu ti biag ti lasag; ngem ti agum isu ti panagtumoy dagiti tultulang.

31Ti mamarigat iti napanglaw laisenna ti Namarsua kencuana; ngem ti addaan caasi iti macurangan padayawanna.

32Ti nadangkes maipadso iti dakes a panagcucuana; ngem ti nalinteg adda pagcamanganna iti ipapatayna.

33Ni sirib agintec iti puso ti addaan pannacaawat; ngem ti adda iti caungan dagiti maag maibunannag.

34Ti kinalinteg itan-ocna ti nacion; ngem ti basol pacaumsian ti aniaman nga umili.

35Ti parabur ti ari agturong iti adipen a nainsiriban ti aramidna; ngem ti pungtotna agturongto iti mangibabain.

← Chapter 13 Jump to: Chapter 15 →