Proverbs 15

Ilokano (Ti Biblia (1973))

← Chapter 14 Jump to: Chapter 16 →

1Ti naalumamay a sungbat pagbawingenna ti pungtot; ngem ti macapaladingit a sao pataudenna ti unget.

2Ti dila ti masirib iyesngawna ti pannacaammo nga apag-isu; ngem ti ngiwat dagiti maag agibuyat iti kinamaag.

3Dagiti mata ni Jehova addada iti amin a yan, a sisisiput cadagiti dakes ken naimbag.

4Ti nanacman a dila isu maysa a cayo ti biag; ngem ti kinaulpit kencuana pacadudugan ti espiritu.

5Ti maag umsienna ti panangisuro ni amana; ngem ti mangipateg iti panagtubngar gun-odenna ti kinamanakem.

6Iti balay ti nalinteg adda adu a gameng; ngem cadagiti maunnudan ti nadangkes isu ni ducot.

7Dagiti bibig ti masirib agiwaras ti pannacaammo; ngem ti puso ti maag saanna nga aramiden ti casta.

8Ti daton ti nadangkes macarimon ken ni Jehova; ngem ti cararag ti nalinteg isu ti macaay-ayo kencuana.

9Ti dalan ti nadangkes macarimon ken ni Jehova; ngem ayatenna ti sumurot iti kinalinteg.

10Adda dusa a nasaem iti mangbaybay-an iti dalan; ket ti gumura iti panangtubngar matayto.

11Da Tanem ken Dadael addada iti saclang ni Jehova: ket adadda pay dagiti puspuso dagiti annac dagiti tattao!

12Ti managumsi dina pagayatan ti matubngar; dinto mapan cadagiti masirib.

13Ti naragsac a puso paisemenna ti rupa; ngem gapu ti ladingit ti puso madudog ti espiritu.

14Ti puso ti addaan pannacaawat birukenna ti pannacaammo; ngem ti ngiwat dagiti maag agtaraon iti kinamaag.

15Amin nga al-aldaw ti naparigat dakesda; ngem ti siraragsac ti pusona cancanayon a daya kencuana.

16Nasaysayaat ti bassit, a cacuyogna ti panagbuteng ken ni Jehova, ngem ti dackel a gameng ket ducot ti cacanunongna.

17Nasaysayaat ti pangaldaw a natnateng, nga addaan ayat, ngem ti napalucmeg a vaca ket gura ti cacuyogna.

18Ti managpungtot a tao pataudenna ti riri; ngem ti nabannayat nga agpungtot epepenna ti ringgor.

19Ti dalan ti nasadut cas la alad a siit; ngem ti dalan ti nalinteg calsada a dackel.

20Ti masirib nga anac paragsakenna ni amana; ngem ti maag a tao laisenna ni inana.

21Ti kinamaag pacaragsacan ti awanan sirib; ngem ti tao a mannacaawat lintegenna ti pannagnana.

22No awan ti balacad, dagiti gandat mawasda; ngem iti caadu dagiti mamalacad mapatibkerda.

23Ti tao adda ragsacna iti sungbat ti ngiwatna; ket ti maysa a sao iti maitutop a tiempo, anian a nagsayaat!

24Iti masirib ti dalan ti biag agpangato, tapno mapanawanna ti tanem iti baba.

25Ni Jehova parutennanto ti balay ti natangsit; ngem ipasdecnanto ti paginggaan ti babai a balo.

26Dagiti dakes a pacpakinakem macarimonda ken ni Jehova; ngem dagiti nacaay-ayo a sasao nadalusda.

27Ti narawet iti gungunaen paringgorenna ti balayna met laeng; ngem ti manggura cadagiti pannucsuc, agbiagto.

28Ti puso ti nalinteg panunutenna ti isusungbatna; ngem ti ngiwat ti nadangkes agibuyat cadagiti dakes a banbanag.

29Ni Jehova adayu cadagiti nadangkes; ngem ipangagna ti cararag dagiti nalinteg.

30Ti silnag dagiti mata paragsakenna ti puso; ken dagiti naimbag a damdamag palucmegenda dagiti tultulang.

31Ti lapayag a mangipangag iti panangtubngar ti biag makipagtaengto cadagiti masirib.

32Ti mangpaid iti pannacaisuro laisenna ti cararuana met laeng; ngem ti mangipangag iti panangtubngar gun-odenna iti pannacaawat.

33Ti panagbuteng ken ni Jehova sursuro ti sirib; ket umun-una ti kinapacumbaba ngem ti dayaw.

← Chapter 14 Jump to: Chapter 16 →