Proverbs 4

Ilokano (Ti Biblia (1973))

← Chapter 3 Jump to: Chapter 5 →

1Denggenyo, annacco, ti panangisuro ti maysa nga ama, ket imatanganyo tapno maammoanyo iti pannacaawat:

2Ta iccancayo iti naimbag a sursuro; dicayo baybay-an ti lintegco.

3Ta maysaac idi nga anac ni amac, nadungdungngo ken cacaisuna nga ayayaten ni inac.

4Ket insursuronac, ken kinunana caniac; agtalinaed cadi ita pusom dagiti sasaoc; salimetmetam dagiti bilbilinco, ket agbiagca;

5Gun-odem ti sirib, gun-odem ti pannacaawat; dica aglipat, dica met agligsay cadagiti sasao ti ngiwatco;

6Dica baybay-an, ket isu ti mangsalacnibto kenca; ayatem ket saluadannacanto.

7Ti sirib isu ti cangronaan a banag, gun-odem ngarud ti sirib; wen, cadagiti amin a gungun-odem gun-odem ti pannacaawat.

8Itantan-ocmo, ket isu ipangatonacanto; ipannacanto iti kinadayaw, intono isu aracupem.

9Iccannanto ta olom iti balangat ti saniata; balangat ti kinapintas ti iyawatnanto kenca.

10Denggem, O anacco, ket awatem dagiti panagsaoc ket dagiti tawen ti panagbiagmo adudanto.

11Insurocan iti dalan ti sirib; inturongcan cadagiti dana ti kinalinteg.

12Intono magnaca, dagiti addangmo saandanto a masingsinged; ket no agatrayca, dicanto maitibcol.

13Irutem a petpetan ni sursuro; dica palubosan: salimetmetam; ta isu ti biagmo.

14Dica sumrec iti dana dagiti nadangkes, ket dica umasac iti dalan dagiti dakes a tattao.

15Liclicam, dica lumasat kencuana; sumiasica kencuana, ket magnacan.

16Ta dida maturog, no saanda pay a macaaramid iti dakes; ket ti turogda umadayo, no awan ti mapadsoda.

17Ta tinapay ti kinadangkes ti canenda, ket arac ti kinauyong ti inumenda.

18Ngem ti dana ti nalinteg cas iti annaraar ti agsapa, a rumaniag a rumaniag agingga iti napaypayso nga aldaw.

19Ti dalan ti nadangkes cas iti kinasipnget: dida ammo no ania ti pacaitibcolanda.

20Anacco, imdengam dagiti saoc; iyallingagmo ta lapayagmo cadagiti panagsaoc.

21Dica paluspusan ida a pumanaw cadagita matam; salimetmetam ida iti tengnga ta pusom.

22Ta isuda ti biag cadagiti macasarac cadacuada, ket salun-at iti amin a lasagda.

23Igagam ta pusom iti amin a regtam; ta aggapu kencuana dagiti pagbanagan ti biag.

24Iwalinmo kenca ti nabassawang a ngiwat, ken dagiti nagulib a bibig yadayom kenca.

25Dagiti matam cumitada cadi nga aglinteg laeng, ket dagita calub ti matam sililinteg cadi ti turongda dita sangoanam.

26Palanasem ti pagnaan dagita sacsacam, ket dagiti amin a daldalanmo nasimpada coma.

27Dica sumiasi iti macanawan wenno iti macatigid: ilisim dagiti sacsacam iti dakes.

← Chapter 3 Jump to: Chapter 5 →