Proverbs 3

Ilokano (Ti Biblia (1973))

← Chapter 2 Jump to: Chapter 4 →

1Anacco, dica lipaten ti lintegco ngem salimetmetam coma dita pusom dagiti bilbilinco:

2Ta inayondanto kenca ti caatiddug dagiti aldaw, ken tawtawen ti panagbiag, ken ti talna.

3Da kinamanagayat ken pudno didaca coma baybay-an: yuccormo ida ita tengngedmo; isuratmo ida iti tapi ta pusom:

4Iti casta masaracamto ti parabur ken naimbag a pannacaawat iti imatang ti Dios ken ti tao.

5Agtalecca ken ni Jehova iti amin a pusom, ket dica agtal-ged iti pannacaawatmo met laeng:

6Cadagiti amin a dalanmo isu ti bigbigem, ket isu iturongnanto dagiti desdesmo.

7Saanca coma a masirib cadagita matam met laeng; agbutengca ken Jehova, ket pagtalawam ti dakes:

8Isunto ti salun-at ta pusegmo, ken pata cadagita tultulangmo.

9Pagdayawmo ti cucuam ken Jehova, ken dagiti umuna a bungbunga ti amin a maapitmo:

10Iti casta dagiti sarusarmo mapnodanto a sipupusec, ket dagiti baldem agliplippiasdanto iti baro nga arac.

11Anacco, dica laisen ti pammagbaga ni Jehova; dica met mauma iti panangtubngarna;

12Ta ti ayayaten ni Jehova tubngarenna; cas met laeng maysa nga ama iti anacna a pagayayatanna.

13Naragsac ti tao a macasarac iti sirib, ken ti tao a macaala iti pannacaawat.

14Ta ti pannacagun-od kencuana nasaysayaat ngem pannacagun-od iti pirac, ket ti magunguna kencuana nasaysayaat ngem balitoc a nasudi.

15Napatpateg ngem dagiti rubis: ket awan cadagiti banbanag a mabalinmo a tarigagayan ti mayasping kencuana.

16Ti caatiddug dagiti al-aldaw adda iti imana a canawan; iti imana a catigid adda dagiti kinabacnang ken dayaw.

17Dagiti dalanna dalan ida a nacay-ayo, ket amin a danana natalna.

18Isu ti cayo ti biag cadagiti cumpet kencuana: ket naragsac ti siasinoman a mangsalimetmet kencuana.

19Ni Jehova iti siribna binangonna ti daga; iti pannacaawat pinatacderna dagiti langlangit,

20Iti pannacaammona dagiti yuyeng nagungatda, ket dagiti tangatang nagtedtedda iti linnaaw.

21Anacco, dida cadi pumanaw cadagita matam; salimetmetam ti natarnaw a kinasirib ken kinaannad:

22Iti casta isudanto ti biag ita cararuam, ken saniata ita tengngedmo.

23Iti casta magnacanto iti dalanmo a sitatalged, ket ti sacam dinto maitibcol.

24Intono agiddaca, dicanto agbuteng: wen, agiddacanto, ket ti turogmo nasam-itto.

25Dica agbuteng iti kellaat a pagbutngan, casta met iti pannacarebbec dagiti nadangkes, intono dumteng:

26Ta ni Jehova isunto ti catalecmo, ket saluadannanto ta sacam iti pannacatiliwna.

27Dica medmedan ti imbag cadagiti carbenganna, no adda ita imam iti pannacabalin a mangaramid.

28Dica cunaen iti caarrubam, Incan, ket baliwam ti umay, ket intono bigat ti panangtedco: no adda kenca ita iti biangmo.

29Dica panggepen ti dakes a maibusor iti caarrubam nga agbiag a sitatalna iti sibaymo.

30Dica caringgor ti maysa a tao nga awan gapuna, no awan ti ranggas nga inaramidna kenca.

31Dica apalan ti tao a nauyong, ket dica pilien ti uray ania cadagiti daldalanna.

32Ta ti naulpit maysa a macarimon ken Jehova; Ngem ti pannakipagayamna adda cadagiti nalinteg.

33Ti panangilunod ni Jehova adda iti balay dagiti nadangkes; ngem bendicionanna ti pagnaedan dagiti nalinteg.

34Pudno nga umsienna dagiti managumsi; ngem itdenna ti parabur iti napacumbaba.

35Ti masirib tawidennanto ti dayaw; ngem ti bain isunto ti magunguna dagiti maag.

← Chapter 2 Jump to: Chapter 4 →