Proverbs 24

Ilokano (Ti Biblia (1973))

← Chapter 23 Jump to: Chapter 25 →

1Dica apalan dagiti dakes a tattao; dica met esman ti makicaddua cadacuada:

2Ta ti pusoda adadalenda ti panangparigat, ket cadagiti bibigda agsaoda iti rangranggas.

3Gapu iti kinasirib mapatacder ti balay; ket gapu iti pannacaawat mapasingkedan;

4Ket gapu iti pannacaammo mapnodanto dagiti silsiled iti amin a napateg ken nacay-ayo a kinabacnang.

5Ti masirib a tao napigsa; wen, ti tao a mannacaammo degdeganna ti bilegna.

6Ta gapu iti nasirib a panangidalan aramidento ti pannakigubatmo; ket ti pannacaispal adda iti kinaadu dagiti cabalanbalacad.

7Ti kinasirib nangato unay iti maag: dina inganga ti ngiwatna iti ruangan.

8Ti agpakinakem nga agaramid iti dakes, dagiti tattao naganendanto iti managranggas.

9Ti panunot ti kinamaag basol; ket ti managuyaw macarimon cadagiti tattao.

10No cumapsutca iti aldaw ti pagpaglan, ti pigsam bassit.

11Ispalem dagiti maipan ken patay, ket dagidiay a maisagana a mapapatay kitaem ta igawidmo ida.

12No cunam, Adtoy, dicami naammoam daytoy; saan aya nga isisipen ti mangganting cadagiti puspuso? Ket ti mangsalimetmet ita cararuam, dina aya ammo? Ket dinanto aya isupapac iti tunggal tao ti caanatop ti aramidna?

13Anacco, manganca iti diro, ta naimbag; ken dagiti tedted ti rara, isuda a nasam-it ita panagnanammo:

14Iti casta maammoam a ti kinasirib adda dita cararuam; no nasaracamon, daydiay, addanto ngarud gunguna, ket ti inanamam dinto matungdayen.

15Dica siblocan, O nadangkes a tao, ti balay ti nalinteg; dica racraken ti paginanaanna:

16Ta ti nalinteg a tao uray matuang a maminpito, ket bumangon manen; ngem dagiti nadangkes rebbeken ida ti kinadacsangasat.

17Dica agrag-o no mapasag ti cabusormo, ken saan coma a maragsacan ta pusom no isu marbec;

18Di la ket ta makita ni Jehova, ket saan a maayayo, ket ipanawna kencuana ti pungtotna.

19Dica agalimuteng a gapu cadagiti managdacdakes: dica met apalan dagiti nadangkes:

20Ta awanto ti gunguna iti dakes a tao; ti pagsilawan ti nadangkes maiddepto.

21Anacco, agbutengca ken ni Jehova ken iti ari; ket dica makicuyog cadagiti managbalbaliw:

22Ta ti kinadacsangasatda tumpuarto a pettat; ket ti pannacadadael nga agtaud cadacuada a dua, asino ti macaammo?

23Dagitoy sasao met ti masirib; ti panangidumduma cadagiti tattao iti panangocom saan a naimbag.

24Ti agcuna iti nadangkes, Sica nalintegca; ilunodto dagiti inilin-ili, ket dagiti nasnacion guraendanto:

25Ngem cadagiti mangtubngar kencuana addanto rag-o, ket ti naimbag a gasat umayto cadacuada.

26Agcanna dagiti bibig daydiay mangipaay iti nalinteg a sungbat.

27Iwayatmo ti aramidmo iti ruar, ket saganaem a maipaay kenca iti away; ket calpasanna bangonemto ti balaymo.

28Saanca nga agsacsi iti maibusor iti caarrubam nga awan gapgapuna; ket dica mangallilaw babaen cadagiti bibigmo.

29Dica cunaen, aramidecto kencuana cas ti inaramidna caniac; isupapacconto iti tao ti mayanatop iti aramidna.

30Limmabasac ti ticub ti nasadut, ken iti asideg ti inuvasan ti awanan pannacaawat;

31Ket, adtoy isu-amin nagtuboanen ti sisiit, ket ti rabawna nacumotanen iti calunay, ket ti cabiti a bacudna nargaayen.

32Idi a casta minatmatac, ket inot-otobco a nalaing; nakitac, ket nacaalaac iti sursuro:

33Bassit pay a pannaturog, bassit a ridep, bassit a panagkepkep dagiti ima tapno maturog;

34Iti casta umayto ti kinapanglawmo a cas mannanacaw, ken ti panagkirangmo a cas nagtagiigam a tao.

← Chapter 23 Jump to: Chapter 25 →