Proverbs 20

Ilokano (Ti Biblia (1973))

← Chapter 19 Jump to: Chapter 21 →

1Ti arac managrabrabac, ti naingel nga inumen managringringgor; ket siasinoman a mailaw-an kencuana saan a masirib.

2Ti pangkigtot ti ari cas panaguga ti leon; ti manggargari kencuana nga agpungtot macabasol iti biagna met laeng.

3Maysa a pacaidayawan ti maysa a tao ti icacayacayna iti ringgor; ngem amin a maag makiririnto.

4Ti nasadut saanto nga agarado gapu iti lam-ec; makilimosto ngarud no panagani, ket awanto ti mapaaddana.

5Ti patigmaan iti puso ti tao cas nauneg a danum; ngem ti tao a mannacaawat maaonnanto.

6Cadagiti caaduan a tattao tunggal maysa iwarnacna ti kinamanagayatna met laeng; ngem iti mapagtalcan a tao siasino ti macasarac?

7Ti nalinteg a tao a magna iti kinamatalecna, benditodanto dagiti annacna iti calpasanna.

8Ti ari nga agtugaw iti trono ti pangocoman wacnitanna babaen cadagiti matana ti amin a dakes.

9Siasino ti macaisao, dinalusacon ti pusoc, sidadalusac iti basolco?

10Dagiti agduduma a timbengan ken agduduma a sucatan, isuda agpapadada a macarimon ken ni Jehova.

11Uray ti ubing ipacaammona ti bagina cadagiti cababalinna, no nadalus man ti aramidna, wenno nalinteg.

12Ti macangngeg a lapayag, ken ti macakita a mata, agpadpadada nga inaramid ni Jehova.

13Dica ayaten ti turog, di la ket ta pumanglawca; luctam dagita matam, ket mapneccanto iti taraon.

14Dakes, dakes, cuna ti gumatang; ngem intono nacapanawen, agpasindayagen.

15Adda balitoc ken naruay a rubi; ngem dagiti bibig ti pannacaammo napategda nga alicamen.

16Alaem ti pagan-anay ti mangpatalged iti di-amammo, ket cas salda igawidmo ti mangpatalged cadagiti gangannaet.

17Ti tinapay ti kinaulbod nasam-it iti tao; ngem calpasanna ti ngiwatna mapnonto iti rinet.

18Amin a gandat pasingkedan ti panangpatigmaan; ket babaen ti nasirib a pannacaiturong makigubatca.

19Ti managipadamag nga agidanondanon agipalgac cadagiti palpalimed; dica ngarud makicuycuyog iti daydiay manginganga unay cadagiti bibigna.

20Siasinoman a mangilunod ken amana wenno inana, ti pagsilawanna maiddepto iti cangisitan ti sipnget.

21Ti tawid magun-od a nadaras iti damdamona; ngem ti panungpalanna saanto a nagasat.

22Dica cunaen, ibalesconto ti dakes; agpannurayca ken ni Jehova, ket isalacannacanto.

23Dagiti agduduma a timbengan macarimonda ken ni Jehova; ket ti naulbod a timbengan saan a nasayaat.

24Dagiti panagtignay ti tao cucua ni Jehova; casano ngarud ita ti pannacaawat ti tao iti dalanna?

25Maysa a pangsilo iti tao ti panagcuna a sidadaras, isu naidaton; ket iti calpasan ti panagcari agduadua.

26Ti masirib nga ari itaepna dagiti nadangkes, ket iparabawna cadacuada ti pilid a pagbayo.

27Ti espiritu ti tao pagsilawan ni Jehova, a mangsukisuc cadagiti amin a caungan a paspaset.

28Ti kinamanagayat ken kinapudno salacnibanda ti ari; ket ti tronona saranayen ti kinamanagayat.

29Ti dayaw dagiti agtutubo a lallaki isu ti kinapigsada; ket ti kinapintas dagiti lallacay isu ti olo nga ubanan.

30Dagiti saplit a sumugat ugasanda ti dakes; ket dagiti dandanog sucnorenda dagiti caungan a paspaset.

← Chapter 19 Jump to: Chapter 21 →