Proverbs 2

Ilokano (Ti Biblia (1973))

← Chapter 1 Jump to: Chapter 3 →

1Anacco, no awatemto dagiti saoc, ket ipenpenmo kenca dagiti bilinco;

2Iti casta iyallingagmo ta lapayagmo iti kinasirib, ken icapetmo ita pusom iti panacaawat;

3Wen, awagam ti kinasaririt; ket idir-im ta timecmo a maipaay iti pannacaawat;

4No isu birukem a cas pirac, ken tontonem a cas nalmeng a gamgameng:

5Iti casta maawatamto ti panagbuteng ken ni Jehova, ken masaracamto ti pannacaammo iti Dios.

6Ta ni Jehova mangted iti sirib; agtaud iti ngiwatna ti pannacaammo ken pannacaawat:

7Ipenpenna iti natarnaw a sirib a maipaay iti nalinteg; isu ti calasag dagiti magna iti kinaimbag,

8Tapno mabantayanna dagiti dandana ti kinajusticia, ken masalacnibanna ti dalan dagiti sasantona.

9Iti casta maawatamto ti kinalinteg ken kinajusticia, ken ti kinaagpapada, wen, tunggal naimbag a dana.

10Ta ti sirib sumrecto dita pusom, ket ti pannacaammo macaay-ayonto ita cararuam;

11Ti kinaannad salluadannacanto; ti pannacaawat igaganacanto:

12Tapno ilisidaca iti dalan ti dakes, cadagiti tattao nga agsao cadagiti naulpit a banbanag;

13Isuda a mangbaybay-an cadagiti dana ti kinalinteg, tapno magnada cadagiti dalan ti kinasipnget;

14Isuda a maragsacan nga agaramid iti dakes, ken marayray-aw iti kinaulpit ti dakes;

15Isuda a nakillo cadagiti dalanda, ken sisusungitda cadagiti desdesda:

16Tapno ilisidaca iti gangannaet a babai, wen, iti gangannaet a mangpasablog babaen cadagiti saona;

17A baybay-anna ti gayyem ti kinabalasangna, ken lipatenna ti tulag ti Diosna:

18Ta ti balayna agirig ken patay, ket dagiti desdesna agturongda cadagiti natay;

19Siasinoman a mapan kencuana dida agsublin, dida met magun-odanen dagiti dandana ti biag:

20Tapno macapagnaca iti dalan dagiti naimbag a tattao, ken mataginayonmo dagiti dandana dagiti nalinteg.

21Ta ti nalinteg agtalinaedto ditoy daga, ket ti napnoan-imbag agtaengto kencuana.

22Ngem dagiti nadangkes magudasdanto ditoy daga, ket dagiti nagulib maparutdanto kencuana.

← Chapter 1 Jump to: Chapter 3 →