Proverbs 25

Ilokano (Ti Biblia (1973))

← Chapter 24 Jump to: Chapter 26 →

1Dagitoy met proverbios ida ni Salomon, a sinacar dagiti tattao ni Ezequias nga ari ti Juda.

2Dayaw ti Dios ti panangilimed iti maysa a banag; ngem dayaw dagiti ar-ari ti panangsukimatda iti maysa a banag.

3Cas iti cangato dagiti langlangit ken iti cauneg ti daga, casta a saan a masukimat ti puso dagiti ar-ari.

4No maiccat ti lati ti pirac, rumsuanto ti aruaten a maipaay ti agtuntunaw:

5No maiccat ti nadangkes iti saclang ti ari, ti tronona mapasingkedanto iti kinalinteg.

6Dica itantan-oc ti bagim iti sangoanan ti ari, ket dica agtacder iti ayan dagiti natan-oc a tattao:

7Ta nasaysayaat a macunanto kenca, ngumatoca ditoy, ngem ti pannacaipababamto iti sangoanan ti principe, isu a nakita dagiti matam.

8Dica agdarasudos a makiringgor, di la ket ta dicanto ammo ti aramidem iti tungpalna, intono ti caarrubam mapabainannacan

9Isusicmo ti calintegan iti caarrubam met laeng, ket dica ipalgac ti palimed ti sabali;

10Di la ket ta ti macangngeg ababiennaca, ket ti pannacaibabainmo saan a mapunasen.

11Ti sao a maitutop ti pannacaisaona cas la mansanas a balitoc a nabungon iti iniket a pirac.

12Cas aritos a balitoc, ken alajas a nasudi a balitoc, casta ti masirib a mangtubngar iti natulnog a lapayag.

13Cas iti lamiis ti nieve iti panagani, casta ti matalec a baonen iti nangibaon kencuana; ta palamiisanna ti cararua dagiti apapona.

14Cas ululep ken angin nga awan tudona, casta ti mangipasindayag a siulbod cadagiti sagsagutna.

15Iti napaut a panagitured mauyotan ti agturay, ti nalucneng a dila burakenna ti tulang.

16Nacasaracca aya ti diro? canem laeng ti umanay kenca, di la ket ta mabsugca unay, ket isaruam.

17Ta sacam manmano coma ti caaddana iti balay ti caarrubam, di la ket ta mauma kenca, ket guraennaca.

18Ti tao nga agsacsi iti ulbod a maibusor iti caarrubana isu ti pang-or, campilan, ken natirad a pana.

19Ti panagtalec iti tao a di matalec iti tiempo ti pagducotan cas napusi a ngipen, ken saca a nagtungngalib.

20Cas iti maysa a mangocsob iti pagananayna iti tiempo a nalam-ec, ken cas masucaan a soda, casta ti mangicanta cadagiti cancanta iti maysa a puso a sibabantut.

21No mabisin ti cabusormo, iccam iti taraon a canenna; ket no mawaw iccam iti danum nga inumenna:

22Ta iti casta gabsoonam ti beggang ti apuy iti olona, ket ni Jehova gungunaannacanto.

23Ti angin nga amian iparangna ti tudo: casta ti aramiden ti managtanabutob a dila iparangna ti naunget a langa.

24Nasaysayaat ti agnaed iti maysa a suli ti toctoc ti balay, ngem ti pannakinaed iti mannakiringgor a babai iti nalawa a balay.

25Cas nalamiis a danum iti mawaw a cararua, casta dagiti naimbag a damdamag nga aggapu iti adayu a daga.

26Cas nakibur a burayoc ken nabungsot nga ubbog, Casta ti nalinteg a tao nga agsanud iti sangoanan ti nadangkes.

27Saan a nasayaat ti pannangan iti adu a diro: casta met iti tao ti panagbirucda iti dayawda met laeng nacas-ang.

28Daydiay a ti espirituna awanan panangtengngel cas maysa nga ili a margaay ken awan bacudna.

← Chapter 24 Jump to: Chapter 26 →