Proverbs 30

Ilokano (Ti Biblia (1973))

← Chapter 29 Jump to: Chapter 31 →

1Dagiti sasao ni Agur nga anac ni Jakeh; ti mammadto. Ti lalaki cunana ken Ithiel, cada Ithiel ken Ucal:

2Pudno a siac naduduegac ngem iti siasinoman a tao, ket awan caniac ti pannacaawat ti tao;

3Ken diac sinursuro ti kinasirib, awan met caniac ti pannacaammo ti Casantoan.

4Siasino ti immuli sadi langit, ket immulog? Siasino ti nangacup iti angin cadagiti petpetpetna? Siasino ti nangabbeng cadagiti dandanum iti pagan-anayna? Siasino ti nangbangon cadagiti amin a pungto ti daga? Ania ti naganna, ket ania ti nagan ti anacna, no ammom?

5Tunggal sao ti Dios napadasen: isu ti calasag cadagiti cumamang kencuana.

6Dica nayonan dagiti sasaona, di la ket ta tubngarennaca, ket masaracanca a mangulbod.

7Dua a banag ti dinawatco kenca; dinac cadi paayen ta diac pay mapatay:

8Iyadayum caniac ti kinapasaw ken ululbod; dica cadi itden caniac ti kinapanglaw wenno ti kinabacnang; taraonannac iti taraon a mayanatup caniac:

9Di la ket ta aglaplapusananac, ket ilibacca, ken cunaec, siasino ni Jehova? Wenno di la ket ta pumanglawac, ket agtacawac, ken aramatec a sibabassawang ti nagan ti Diosco.

10Dica parpardayaen ti adipen iti apona, di la ket ta ilunodnaca, ket matiliwnaca a nacabasol.

11Adda caputotan nga ilunodda ti amada, ken dida benditoan ti inada.

12Adda caputotan a nadalusda cadagiti matada met laeng, ket nupay casta dida mabuggoan iti kinarugitda.

13Adda caputotan, O anian a nagtangsit dagiti matada! Ket dagiti calub ti matada agbucbukirad.

14Adda caputotan a dagiti ngipenda casda la camcampilan, ket dagiti sangida casda la im-immuco, tapno lamutenda dagiti napanglaw ditoy daga, ken dagiti nacurapay cadagiti tattao.

15Ti alimatec adda dua nga annacna a babbai, nga agicickis, mangtedca, mangtedca. Adda tallo a banag nga uray caanoman dida mapmapnec wen, uppat a dida cunaen, Umanayen:

16Ni Tanem; ken ti lupes nga aanacan; ti daga a di mapmapnec iti danum; ken ti apuy a dina cunaen, Umanayen.

17Ti mata a mangrabrabac ken amana, ken umsienna ti agtulnog ken inana, dagiti wac ti lobong sippitendanto nga iruar, ket dagiti urbon nga aguila sidaendanto.

18Adda tallo a banag a nacascasdaaw unay caniac, wen, uppat a diac ammo:

19Ti dalan ti aguila iti tangatang; ti dalan ti uleg iti rabaw iti bato; ti dalan ti sasacayan iti tengnga ti taaw; ken ti dalan ti lalaki iti balasang.

20Castoy ti dalan ti babai a makicamalala; mangan, ammusayanna ti ngiwatna, ket cunana, Awan kinadangkes nga inaramidco.

21Tallo a banag ti pagkintayegan toy daga, ken uppat, a dina mabalin nga ibturen:

22Gapu iti maysa nga adipen no isu agari; ken ti maysa a maag no mabsog iti taraon;

23Gapu iti nacaluclucsao a babai no maasawaan; ken ti maysa a adipen a balasang no agtawid iti apona a babai.

24Adda uppat a kita a babassitda ditoy daga, ngem napalaloda a nagsirib:

25Dagiti cotcoton saanda nga umili a napigsa, nupay casta paaddaenda ti taraonda iti calgaw;

26Dagiti conconejo nacapuyda laeng a bonggoy, nupay casta aramidenda dagiti balbalayda cadagiti batbato;

27Dagiti duddudon awan arida, nupay casta agasacda la amin a pinangenpangen;

28Ti alutiit cumebkeb cadagiti sacsacana, nupay casta adda cadagiti palacio dagiti ari.

29Adda tallo a kita a nalimbongda cadagiti pannagnada, wen, uppat ket di a nalimbongda iti panagpapanda:

30Ti leon, a capigsaan cadagiti an-animal, ket dina pagtuckiadan ti siasinoman;

31Ti aso a paganup; ti calding a bulog castamet; ken ti ari nga awan ti macabalin nga umalsa kencuana.

32No minamaag ti inaramidmo a panangitan-ocmo ita bagim met laeng, wenno, nagpanggepca iti dakes, iyappotmo ta imam ita ngiwatmo.

33Ta ti panangbatir iti gatas pataudenna ti mantequilla, ket ti panangtiritir iti agong pagdaringongoenna; casta met ti manggargari iti pungtot pataudenna ti ringgor.

← Chapter 29 Jump to: Chapter 31 →