Proverbs 18

Ilokano (Ti Biblia (1973))

← Chapter 17 Jump to: Chapter 19 →

1Ti suminsina birukenna ti tarigagayanna met laeng, ket carungsotna ti amin a natarnaw a kinasirib.

2Ti maag awanan rag-o iti pannacaawat, no saan laeng a ti panangipadlaw ti pusona.

3No dumteng ti nadangkes, dita dumteng met ti uyaw, ket iti panangibabain cumuyog ti umsi.

4Dagiti sasao ti ngiwat ti tao arigda cadagiti adalem a dandanum; ti ubbog ti sirib cas agayus a baresbes.

5Ti pammadayaw iti kinatao ti nadangkes saan a nasayaat, uray ti panangkillo iti nalinteg iti panangocom.

6Dagiti bibig ti maag sumrecda iti susic, ket ti ngiwatna agayab cadagiti sapsaplit.

7Ti ngiwat ti maag isu ti pacadadaelanna, ket dagiti bibigna isuda ti pangsilo ti cararuana.

8Dagiti sasao ti managarasaas arigda la sangcasacmul a naimas, ken dumanonda cadagiti caungan a paspaset.

9Casta met daydiay naliway iti aramidna isu ti cabsat ti managdadael.

10Ti nagan ni Jehova nabileg a sarikedked; ti nalinteg agcamang kencuana, ket maisalacan.

11Ti sanicua ti nabacnang a tao isu ti nabileg nga ilina, ket cas natayag a bacud iti panangipagarupna.

12Iti casacbayan ti pannacadadael, ti puso ti tao agpalangguad; ket iti casacbayan ti kinadayaw adda ni kinapacumbaba.

13Ti sumungbat a di pay dumngeg nga umuna, kinamaag ken pacaibabainanna.

14Ti espiritu ti tao ibturennanto ti kinacapsutna; ngem iti naducot nga espiritu siasino ti macaanus?

15Ti puso ti masirib gun-odenna ti pannacaammo; ket ti lapayag ti masirib agsapul iti pannacaammo.

16Ti sagut ti tao mangipaay kencuana iti pagnaan, ket yegna iti saclang dagiti naindaclan a tattao.

17Ti mangsalacnib iti calinteganna nga umuna cas la nalinteg; ngem ti caarrubana umay ket palutputenna.

18Ti panaggiginnasangasat pagsardengenna dagiti susic, ket bingbingayenna cadagiti nabileg.

19Ti cabsat a nadangranan narigrigat a gun-oden ngem ti napigsa a pagilian; ket dagiti cacasta a riri casda la balunet ti castillo.

20Ti tian ti tao mapunnonto iti bunga ti ngiwatna; iti mapatanor dagiti bibigna mapnecto.

21Patay ken biag addada iti pannacabalin ti dila; ket dagiti agayat kencuana canendanto ti bungana.

22Siasinoman a macasarac iti asawa a babai macasarac iti naimbag a banag, ken magun-odna ti parabur ni Jehova.

23Ti napanglaw agpacpacaasi, ngem ti nabacnang sumungbat a sigugubsang.

24Ti tao a mannakigayyem la unay pacadadaelanna met laeng; ngem adda gayyem a nadecdecket ngem cabsat.

← Chapter 17 Jump to: Chapter 19 →