Proverbs 19

Ilokano (Ti Biblia (1973))

← Chapter 18 Jump to: Chapter 20 →

1Nasaysayaat ti napanglaw a magna iti kinalinteg ngem ti naulpit cadagiti bibigna ken maag.

2Casta met, a ti cararua nga awan ammo saan a naimbag; ken ti agdarasudos cadagiti sacsacana bumasol.

3Ti kinamaag ti tao caracarenna ti dalanna; ket ti pusona agtanabutub a maicaniwas ken Jehova.

4Ti sanicua paaduenna dagiti gagayyem; ngem ti napanglaw maisina iti gayyemna.

5Ti natiri a sacsi saanto a di madusa; ket ti agyesngaw cadagiti ulbod dinto macalapsut.

6Adu dagiti agdawatto iti caasi ti managparabur a tao; ket amin a tao sigagayyem iti mangted cadagiti sagsagut.

7Amin dagiti cacabsat ti napanglaw gumurada kencuana: adadda pay nga umadayu dagiti gagayyemna kencuana! Agsasao a surutenna ida ngem awandan.

8Ti manggun-od iti kinasirib ayatenna ti cararuana met laeng, ti mangsalimetmet iti pannacaawat macasaracto iti imbag.

9Ti natiri a sacsi saanto a di madusa; ket ti agyesngaw cadagiti ulbod mapucawto.

10Ti nanam-ay a biag saan a mainugot iti maag; adadda manen a saan a ti maysa nga adipen iturayanna dagiti piprincipe.

11Ti kinamanagpanunot ti tao pagbalinenna a nabannayat nga agpungtot; ket ti dayawna ti panangpalabesna iti caniwas.

12Ti rungsot ti ari cas la uga ti maysa a leon; ngem ti paraburna cas la linnaaw nga agdisso iti root.

13Ti maag nga anac isu ti kinadangsangasat ni amana; ket dagiti ringringgor ti babai nga asawa isuda ti casla cancanayon a panagtedted.

14Balay ken kinabacnang tawiden ida cadagiti amma; ngem ti manakem a babai nga asawa aggapu ken ni Jehova.

15Ti kinasadut mangiturong iti nargaan a turog; ket ti cararua a nasadut agsagabanto iti bisin.

16Ti mangsalimetmet iti bilin salimetmetanna ti cararuana; ngem ti sililiway cadagiti dalanna matayto.

17Ti addaan caasi cadagiti napanglaw pabuludanna ni Jehova; ket ti naimbag nga aramidna bayadannanto nga isubli kencuana.

18Dusaem ni anacmo, idinto nga adda inanama; ngem dica igaed ta pusom iti pannacadadaelna.

19Ti tao a dackel ti rungsotna baclayennanto ti dusa; ta no ispalem, masapul nga ispalem manen.

20Ipangagmo ti patigmaan, ket awatem ti pannacaisuro, tapno masiribca intono camaudianan.

21Adu a pakinakem ti adda iti puso ti maysa a tao; ngem ti patigmaan ni Jehova, dayta agnayonto.

22Ti mamagbalin iti maysa a tao a pagrayoan isu ti kinamanagayatna; ngem nasaysayaat ti napanglaw a tao ngem iti managulbod.

23Ti panagbuteng ken ni Jehova agturong iti biag; ket ti addaan iti daytoy agtaengto a sipepennec; isu saanto a sarungcaran ti dakes.

24Ti nasadut ilumlumna ti imana iti pinggan, ket dinanto maidanon manen iti ngiwatna.

25Danarem ti managuyaw, ket ti nanengneng masursuronanto iti kinanacman; ken tubngarem ti adda pannacaawatna, ket maawatannanto ti pannacaammo.

26Ti nadawel ken amana ken pagtalawenna ni inana, inanac a mangibabain ken pacaumsian.

27Sardayam, anacco, ti dumngeg iti pannursuro ket isu laeng ti pacayawawanam cadagiti sasao ti pannacaammo.

28Ti awan cais-iscanna a sacsi rabrabngisenna ti kinajusticia; ket ti ngiwat ti kinadangkes agalimon iti kinadakes.

29Sisasaganan ti panangocom cadagiti managuyaw, ken sapsaplit iti bucot dagiti maag.

← Chapter 18 Jump to: Chapter 20 →