Ezekiel 11

Mien Bible (Thai Script) © Thailand Bible Society, 2007

← Chapter 10 Jump to: Chapter 12 →

1เฒี้ยว เญย สีง ลี่ง โป้ว เยีย ฝาว, ต้อ เยีย มี่ง เถา หฒั่ง เฒี้ยว เญย เปย๊า เญย ตง ปูง แก้ง, เซ ฮวิน มี่ง ตง ปูง วั้ว เต้า แก้ง. เปียะ แก้ง วั้ว นอม ต๋อง ม่าย หญี่ เหฒียบ ฮม์ ล่าน เมี่ยน. เยีย ปวัด เยียม นิ่น บัว บุด๋ง ม่าย แปะ ฝีง เญย เปย๊ย เฒ้ย, เซ อัดซู เญย ตอน, ยาอาซันยา, เหธา เบไนยา เญย ตอน, เปลาทียา.

2เฒี้ยว ก๊อง บั๋ว เยีย, “ป้าม เมี่ยน อ้า! น้าย เต๋ย เมี่ยน เซ เยียม น้าย นอม ฒี่ง ต๊า เอ๊าะ เญย หฒะเอ๋ย หย่า ธ่าง ล่าง โหฒว หว่าย สี่.

3นิ่น บัว ก๊อง, ‘ก๊ม เปย๊า เญย เฒี่ยง โห่ ไม้ แก้ง เถา ฟัด. น้าย นอม ฒี่ง เป๊ย นอม แธง. เยีย บัว เป๊ย แธง กะญั์ว เญย อ๊อ.’

4ป้าม เมี่ยน อ้า! เม่ย อ๋อย หฒุ โต่ว หว่า ก๊อง นิ่น บัว. กุ๊น โต่ว หว่า อ๊ะ.”

5เฒี้ยว เญย สีง ลี่ง เหฌี่ย ต้าย เยียม เยีย หย่า ก๊อง บั๋ว เยีย, “เม่ย อ๋อย หฒุ ก๊อง, ‘ เฒี้ยว ฮนั้ง น้าย ก๊อง, อิสะลาเอน เญย เฒ้ย-ฟุน อ้า! เม่ย บัว ฮนั้ง หน่าย ฮนั้ม, มป่า เยีย ฮิ้ว ตุ๊ ม่าย หาย หญู่ง เยียม เม่ย บัว เญย เฮญี้ยว.

6เม่ย บัว เยียม น้าย นอม ฒี่ง ไต๋ เมี่ยน ด่ง หน่าย ธั้ม หย่า กวั่ง หฒุ ไต๋ ไต่ เญย เมี่ยน เญย เซย ปวั๊ง จาย-ห่อง.’

7“เหว่ย น้าย เฒี้ยว ทิน-ฮู่ง ฮนั้ง น้าย นอ ก๊อง, ‘เม่ย บัว ไต๋ ไต่ กวั่ง ฒี่ง กะญั์ว เญย เมี่ยน เซ เป๋น อ๊อ. น้าย นอม ฒี่ง เป๋น แธง. มป่า เยีย อ๋อย ปุน เม่ย บัว เยียม หน่าย กะญั์ว หฒุ ต้อ ธ้วด มี่ง.

8เม่ย บัว กั้ม เหฑีย หฑุ ด๊าว, เยีย ฯฒฯ ปุน เม่ย บัว หฒุ หฑุ ด๊าว ไต๋.’ น้าย เซ เฒี้ยว ทิน-ฮู่ง ก๊อง เญย หว่า.

9‘เยีย อ๋อย เยียม น้าย นอม ฒี่ง กะญั์ว ต้อ เม่ย บัว ธ้วด ต้าย จิว ปุน กั้น ฝีง เมี่ยน หย่า เซี้ยม ตี่ง เม่ย บัว เญย ฒุ์ย.

10เม่ย บัว ฯฒฯ หฒุ หฑุ ด๊าว ไต๋. เยีย ฒู้ง อ๋อย เยียม อิสะลาเอน เญย กั๊บ-จ๋าย ตี่ง เม่ย บัว เญย ฒุ์ย. เม่ย บัว ฯฒฯ ฮิ้ว ตุ๊ เยีย เซ เฒี้ยว.

11น้าย นอม ฒี่ง เซ ไม้ เฒ์ย เม่ย บัว เญย แธง. เม่ย บัว หย่า ไม้ เฒ์ย น้าย นอม แธง เญย อ๊อ. เยีย อ๋อย เยียม อิสะลาเอน เญย กั๊บ-จ๋าย ตี่ง เม่ย บัว เญย ฒุ์ย.

12เม่ย บัว ฯฒฯ ฮิ้ว ตุ๊ เยีย เซ เฒี้ยว, เหว่ย หฒุ เม่ย บัว ไม้ เอย เจี๊ยน เยีย เญย เล์ย-หลัด หย่า ไม้ เอย เยีย เญย เล์ย. เม่ย บัว กัน เว่ย ก๋อม วั้ว เต๋ย กั๊วะ เญย แปะ ฝีง เญย เล์ย.’”

13ต๋อย เยีย โต่ว เจี๊ยน หว่า เญย เฒี่ยง โห่, เบไนยา เญย ตอน, ปาลาทียา ไต่ หมี่ อ๊ะ. เยีย ฯฒฯ บ๊าบ เหฌี่ย เดา เห่ว เฉีย โฮล เญย, “เฒี้ยว ทิน-ฮู่ง อ้า! โค้ว อ๊ะ. เม่ย หฒะเก้ง อ๋อย เหมียด เหฑ่ง เหฒ่ง เหฌี่ย เญย อิสะลาเอน เมี่ยน ไฟ?”

14เยีย แอ๋ง ตุ๊ ฒิบ เฒี้ยว เญย หว่า ก๊อง,

15“ป้าม เมี่ยน อ้า! เม่ย เญย ก๋อ-โย์ว, เม่ย เญย เธียน-เธะ, เม่ย เญย เหยียด ฒู้ง หฒุ กว๊าด มี่ง เญย จวั่ง ฝีง อิสะลาเอน เมี่ยน, เซ เยลูซาเลม เญย เมี่ยน, ก๊อง, ‘นิ่น บัว เล่ย เฒี้ยว โก. น้าย เต๋ย เดา เหธย ปุน เยีย บัว เป๋น เยีย บัว เญย ป่วน อ๊ะ.’

16“เหว่ย น้าย เม่ย อ๋อย หฒุ ก๊อง บั๋ว นิ่น บัว, ‘เฒี้ยว ทิน-ฮู่ง ฮนั้ง น้าย ก๊อง. ไม้ กุ๊น เยีย เฒาะ อิสะลาเอน เมี่ยน ซุ้ย มี่ง โก เญย กั๊วะ เญย เมี่ยน บุด๋ง, หย่า ไม้ กุ๊น เยีย ปุน นิ่น บัว หฑาน มี่ง หม่าน กั๊วะ บุด๋ง, เยีย หย่า อ๋อย เยียม นิ่น บัว มี่ง เยียม เญย กั๊วะ โหฒว หธาม นิ่น บัว เญย สีง ติ่น.’

17“เหว่ย น้าย อ๋อย หฒุ ก๊อง, ‘เฒี้ยว ทิน-ฮู่ง ฮนั้ง น้าย ก๊อง, “เยีย อ๋อย เยียม หม่าน ฝีง บุด๋ง เซียว ฒุ้น เม่ย บัว, หย่า เยียม เม่ย บัว หฒุ มี่ง เยียม หฑาน เญย กั๊วะ ต้อ เม่ย บัว กั๊บ ฒุ้น ต้าย, แอ๋ง เฒาะ อิสะลาเอน เต่ย-ปูง จิว ปุน เม่ย บัว.”’

18“นิ่น บัว ตุ๊ หฑวน ต้าย เยียม เจี๊ยน วั้ว หฒั่น, นิ่น บัว ฯฒฯ เฒาะ เหยียด ฒู้ง กั้ม เฑี้ย เญย, โหยว เญย เอ๊าะ สี่ กวั่ง เหฑ่ง.

19เยีย อ๋อย ปุน นิ่น บัว ม่าย ดุ ติ่ว เฮญี้ยว หย่า ปุน นิ่น บัว ม่าย เซียง-ลี่ง ว่วน. เยีย อ๋อย เฒาะ ฆอย ฮนั้ง หละเปย๊ย แหง่ง เญย เฮญี้ยว แอ๋ง ปุน เมา เญย, หมวัง หว่า เญย เฮญี้ยว,

20เหว่ย ปุน นิ่น บัว กัน เยีย เญย เล์ย-หลัด หย่า เอย เยีย เญย เล์ย โหฒว. นิ่น บัว ฯฒฯ โหฒว เยีย เญย แปะ ฝีง. เยีย หย่า อ๋อย โหฒว นิ่น บัว เญย ทิน-ฮู่ง.

21มป่า ขูง ม่าย เฮญี้ยว กัน นิ่น บัว กั้ม เฑี้ย ไห่, โหยว ไห่ เญย วั้ว เต๋ย กะน้าย, หฒิว นิ่น บัว โหฒว เญย เยีย อ๋อย วิ่น ปุน นิ่น บัว.” น้าย เซ เฒี้ยว ทิน-ฮู่ง ก๊อง เญย หว่า.

22วั้ว เต๋ย เคลูบิม ยัง ฆอย ด๊าด. วั้ว เต๋ย เยี่ยน หย่า เยียม นิ่น บัว เญย กะเฮลน. อิสะลาเอน เญย ทิน-ฮู่ง เญย ฌัง-หล่าง หย่า เยียม นิ่น บัว กู้ หงว่าย.

23เฒี้ยว เญย ฌัง-หล่าง เยียม ฒี่ง บุด๋ง ฝาว, ตี้ง เจี๊ยน ฒี่ง เญย ตง ปูง แหมง วั้ว นอม บง กู้ หงว่าย.

24สีง ลี่ง ต้อ เยีย ฝาว. เยียม หล่าว ย่าง เญย สี่ กะญั์ว, ทิน-ฮู่ง เญย สีง ลี่ง ต้อ เยีย มี่ง บาบีโลน, เถา หฒุ กว๊าด มี่ง เญย เมี่ยน วั้ว. เยีย ปวัด ลิ์ว เญย หล่าว ย่าง สี่ ฯฒฯ หมิด หมี่ อ๊ะ.

25เยีย ฯฒฯ เฒาะ เฒี้ยว ปุน เยีย ปวัด เญย เหยียด ฒู้ง สี่ ก๊อง บั๋ว หฒุ กว๊าด มี่ง เญย เมี่ยน หมวัง.

← Chapter 10 Jump to: Chapter 12 →