Ezekiel 5

Mien Bible (Thai Script) © Thailand Bible Society, 2007

← Chapter 4 Jump to: Chapter 6 →

1เฒี้ยว ก๊อง, “ป้าม เมี่ยน อ้า! เม่ย อ๋อย หฒุ เฒาะ ฒูง หฑุ ด๊าว ไหล่ เญย. อ๋อย หฒุ หล่ง ฮนั้ง จั๊บ บะเปยย หฒั่ง เญย เถย-โต เถย เม่ย เญย บะเปยย เหธา ซยาม. หล่ง ทิน-แป้ง ตั๊ง เฑียง บะเปยย เหธา ซยาม ปุน ฆอย.

2ฒั้ว เว่ย ก๋อม ฒี่ง เญย ฮนอย-เหญียะ ปวั๊ง, เม่ย อ๋อย หฒุ เฒาะ บะเปยย เหธา ซยาม ปัว โก๊ว เญย เหยียด โก๊ว เยียม ฒี่ง บุด๋ง หล่ง โต์ว ปั๊ว. เฒาะ ปัว โก๊ว เญย เหยียด โก๊ว เยียม ฒี่ง กะเหญี่ย หล่ง หฑุ ด๊าว ฮงะ บะเปยย ฮวีง ก๋อม ฒี่ง. แอ๋ง เฒาะ ปัว โก๊ว เญย เหยียด โก๊ว ฟ้าด ปุน หฑยาว ป่วน หฑาน มี่ง. เยีย ฯฒฯ แปง หฑุ ด๊าว หฒุ่น เจี๊ยน มี่ง.

3เม่ย หย่า อ๋อย หฒุ เฒาะ อี เหฒีย ติ้ว น้าย เต๋ย บะเปยย ญัด เจี๊ยน ลุย-จั๊วะ.

4เยียม น้าย เต๋ย บะเปยย กะญั์ว แอ๋ง เฒาะ อี เหฒีย ติ้ว ฒอย เปียะ โต์ว ปั๊ว. เยียม หน่าย ม่าย โต์ว อ๋อย ธ้วด ต้าย มี่ง ก๋อม อิสะลาเอน เญย เหยียด ฒู้ง เฒ้ย-ฟุน.

5“เฒี้ยว ทิน-ฮู่ง ฮนั้ง น้าย ก๊อง. ‘น้าย เซ เยลูซาเลม ฒี่ง. เยีย เหลียบ น้าย นอม ฒี่ง เยียม หม่าน กั๊วะ เมี่ยน บุด๋ง หย่า ม่าย เหฒีย นอม กั๊วะ เว่ย ก๋อม.

6มป่า เยลูซาเลม แหง่ง เยีย เญย เล์ย เก้า ธั้ม เจี๋ย กั้น กั๊วะ เมี่ยน. นิ่น หย่า แหง่ง เยีย เญย เล์ย-หลัด เก้า ธั้ม เว่ย ก๋อม เญย กั๊วะ, เหว่ย หฒุ นิ่น เฆ่ม เยีย เญย เล์ย หย่า ไม้ กัน เยีย เญย เล์ย-หลัด.’

7“หลาย น้าย, เฒี้ยว ทิน-ฮู่ง ก๊อง, เม่ย โหฒว หลุ่น เก้า ธั้ม เว่ย ก๋อม เม่ย วั้ว เต๋ย กั๊วะ. เม่ย ไม้ เอย เยีย เญย เล์ย หย่า ไม้ กัน เยีย เญย เล์ย-หลัด, ขูง เอย เจี๊ยน เว่ย ก๋อม วั้ว เต๋ย กั๊วะ เญย เล์ย โหฒว ฮนั้ง.

8“เหว่ย น้าย เฒี้ยว ทิน-ฮู่ง ก๊อง, ‘หมั่ง ม่าะ! เยีย, เซ เยีย กั้น, อ๋อย เหธา เม่ย ต๋อย-เตก. เยีย อ๋อย ตอง เจี๊ยน หม่าน กั๊วะ เมี่ยน เยียม เม่ย บุด๋ง ปุน เม่ย หฒุ ตี่ง ฒุ์ย.

9หลาย เม่ย โหฒว เญย เหยียด ฒู้ง กั้ม เฑี้ย เญย สี่, เยีย อ๋อย เยียม เม่ย บุด๋ง โหฒว ปุน เม่ย ฮนั้ง เยีย ไม้ โหฒว เจี๋ย. เยีย เหยียด ลิ์ว หย่า ไม้ แอ๋ง ฮนั้ง น้าย นอ โหฒว.

10เยียม เม่ย บุด๋ง เตี๋ย หม่า อ๋อย หญั่น กั้น เญย ตอน-เจว๊ย, ตอน-เจว๊ย หย่า อ๋อย หญั่น กั้น เญย เตี๋ย หม่า. เยีย อ๋อย ตี่ง เม่ย เญย ฒุ์ย. หาย เต้า เยียม เม่ย บุด๋ง ตุ๊ แหม่ง ธ้วด, เยีย อ๋อย ปุน ฟ้าด หฑาน มี่ง เปยย ปูง.’

11เหว่ย น้าย เฒี้ยว ทิน-ฮู่ง ก๊อง, ‘เยีย เฒี้ยง เจี๊ยน เยีย กั้น เญย แหม่ง โฮ้ว หว่า, เหว่ย หฒุ เม่ย หล่ง เหยียด ฒู้ง กั้ม เฑี้ย เญย กะน้าย เหธา เหยียด ฒู้ง โหยว ไห่ เญย สี่ ปุน เยีย เญย สีง ติ่น ม่าย หวุย, เยีย อ๋อย ปุน เม่ย เญย เมี่ยน โสว โหฒะ เหฑ่ง. เยีย เญย มฒีง ฒู้ง ไม้ ค้อ-ฟิ เม่ย. เยีย หย่า ไม้ ค้อ-เลี่ยน เม่ย.

12เม่ย เญย แปะ ฝีง ปัว โก๊ว เญย เหยียด โก๊ว อ๋อย หฒุ ววน-แป่ง ไต่ หย่า เยียม เม่ย บุด๋ง หฒุ หง่อ หฮนาง ไต่. ปัว โก๊ว เญย เหยียด โก๊ว อ๋อย เยียม เม่ย เว่ย ก๋อม เญย ต๋อง หฒุ หฑุ ด๊าว ไต๋ ไต่. ปัว โก๊ว เญย เหยียด โก๊ว เยีย อ๋อย ปุน ฟ้าด หฑาน มี่ง เถา ลู่ง เดี๊ย นอมๆ ต๋อง. เยีย หย่า อ๋อย แปง ธ้วด เยีย เญย หฑุ ด๊าว หฒุ่น นิ่น บัว.

13“‘ฮนั้ง หน่าย เยีย เญย กะเฉีย ฯฒฯ ฟิว. เยีย เฉีย เจี์ย, โน์ว เญย เจ๊า เยีย โหฒว ปุน นิ่น บัว เถา ต้าว, เถา เยีย เฮญี้ยว ฆาย อ๊ะ. เยีย เญย กะเฉีย โหฒว ปุน นิ่น บัว เถา ฟิว มี่ง, นิ่น บัว ฯฒฯ ฮิ้ว ตุ๊ เยีย, เฒี้ยว, ก๊อง ลิ์ว เญย หว่า เซ เหว่ย หฒุ เยีย แฑง เจี๊ยน นิ่น บัว.

14“‘ไม้ ตาน บัวะ น้าย. เยีย อ๋อย ปุน เม่ย หฒุ ป่าย ฮวาง, ปุน ฮวีง ก๋อม เญย กั๊วะ เญย เมี่ยน เหธา เจี๋ย เจ๊า เญย เมี่ยน หมั่ง เผีย.

15เยีย เฉีย เจี์ย โน์ว เจี๊ยน ตี่ง เม่ย เญย ฒุ์ย เฮนี้ย เญย เฒี่ยง โห่, เม่ย ฯฒฯ หฒุ ฮวีง ก๋อม เญย กั๊วะ เญย เมี่ยน หมั่ง เผีย, ฮว้วด เม่ย, หย่า ต๊น หฒุ นิ่น บัว, แฮะ นิ่น บัว กั้ม เหฑีย. น้าย เซ เยีย, เฒี้ยว, ก๊อง ลิ์ว อ๊ะ.

16วั้ว หฒั่น เยีย อ๋อย ปุน เม่ย หฒุ หง่อ หฮนาง, หฒุ เหมียด, ฮนั้ง ป๊วน ฟอง-ธัง มี่ง เหมียด เม่ย บัว นอ. เยีย อ๋อย ปุน เม่ย บัว กุ๊น โหฒว กุ๊น หง่อ เถา เม่ย บัว เขา เญย ล่าง หฒิ ตั๋ง เหฑ่ง.

17เยีย อ๋อย ปุน เม่ย บัว หง่อ, ปุน เฮยี่ย ฒ่อย ต้าย ห่อย เม่ย บัว. เหมียด เม่ย บัว เญย ฝุเจว๊ย. เม่ย บัว อ๋อย หฒุ ววน-แป่ง, หฒุ ไต๋ ไต่, ฑย้าม เหลี่ยว ธ้วด เญย สี่. เยีย อ๋อย ปุน เม่ย บัว หฒุ หฑุ ด๊าว ไต๋. น้าย เซ เยีย, เฒี้ยว, ก๊อง ลิ์ว อ๊ะ.’”

← Chapter 4 Jump to: Chapter 6 →