Ezekiel 22

Mien Bible (Thai Script) © Thailand Bible Society, 2007

← Chapter 21 Jump to: Chapter 23 →

1เยีย แอ๋ง ตุ๊ ฒิบ เฒี้ยว เญย หว่า ก๊อง,

2“ป้าม เมี่ยน อ้า! เม่ย อ๋อย เซี้ยม เญย ไฟ? เม่ย อ๋อย เซี้ยม น้าย นอม ม่าย ฑย้าม กั๊วะ ปวั๊ง เญย ฒี่ง ไฟ? ฮนั้ง หน่าย เม่ย อ๋อย หฒุ ก๊อง เหฑ่ง ปุน น้าย นอม ฒี่ง เญย เมี่ยน ฮิ้ว ตุ๊ นิ่น บัว โหฒว เญย เหยียด ฒู้ง กั้ม เฑี้ย เญย สี่.

3เม่ย อ๋อย หฒุ ก๊อง, ‘เฒี้ยว ทิน-ฮู่ง ฮนั้ง น้าย ก๊อง, “น้าย นอม ฒี่ง เญย เมี่ยน ม่าย ไต๋ เมี่ยน ปุน ฑย้าม เหลี่ยว ธ้วด เญย สี่ ปวั๊ง ฒี่ง กะญั์ว. นิ่น บัว หย่า โหฒว หมิ่ว-ฝัง ปุน กั้น ม่าย หวุย ฯฒฯ ปุน ฒี่ง หฒุ เหมียด เญย เฒี่ยง โห่ เถา.

4หลาย เม่ย บัว ไต๋ เมี่ยน ปุน ฑย้าม เหลี่ยว ธ้วด, เม่ย บัว ฯฒฯ ม่าย ฒุ์ย. เม่ย บัว โหฒว เญย หมิ่ว-ฝัง ปุน กั้น ม่าย หวุย, ปุน ฒี่ง เซ้ด เมว์ย เญย ฮนอย-เหญียะ เถา ฟัด, หย่า ปุน เหว่ย น้าย นอม ฒี่ง ตี่ง เหฒียง เญย หฮญัง-ต้าว เถา อ๊ะ. ฮนั้ง หน่าย เยีย อ๋อย ปุน น้าย นอม ฒี่ง หฒุ หม่าน กั๊วะ หมั่ง เผีย หย่า หฒุ หม่าน ฝีง ฮว้วด.

5เม่ง เต้า ด๊อด, เหธว หลุ่น เญย ฒี่ง อ้า! เยียม โก เยียม ฟัด เญย เมี่ยน อ๋อย ฮว้วด เม่ย.

6“‘“หมั่ง ม่าะ! เยียม เม่ย กะญั์ว โหฒว โฮล เญย อิสะลาเอน เมี่ยน หล่ง กั้น เญย หลี่ง ไต๋ เมี่ยน, ปุน ฑย้าม เหลี่ยว ธ้วด.

7เยียม เม่ย บุด๋ง, เมี่ยน หมั่ง เผีย เตี๋ย หม่า. นิ่น บัว เหฒย เยียม นิ่น บัว บุด๋ง เญย กั้น ฝีง เมี่ยน หย่า เควย กู้ ฮั่น ฝุเจว๊ย เหธา เอ๊า-กว๊า.

8เยียม เม่ย กะญั์ว เมี่ยน หมั่ง เผีย เยีย เญย ธีง-เหฑ่ง กะน้าย หย่า ปุน เยีย เญย ตี้ง กง ฮนอย ม่าย หวุย.

9เยียม เม่ย บุด๋ง ม่าย เมี่ยน ก๊อง จ๊า เญย หว่า เหว่ย ปุน เมี่ยน หฒุ ไต๋ ปุน ฑย้าม เหลี่ยว ธ้วด. เยียม เม่ย กะญั์ว ม่าย เมี่ยน เยียม บง กู้ หงว่าย หญั่น เหฒี่ย ปุน หมิ่ว-ฝัง เญย กะน้าย หย่า โหฒว ไล่ ฮลบ, ไญ้ ไห่ เญย สี่.

10เยียม เม่ย บุด๋ง ม่าย เต๋ย เมี่ยน เหธา กั้น เญย เตีย เญย เอ๊า-ตอน เปว๋ย. เยียม เม่ย กะญั์ว ม่าย เต๋ย เมี่ยน ชั้ง ม่าน เปว๋ย ม่าย ซิน-เหยี่ยน, ไม้ ธีง-เหฑ่ง เญย มเซียะ ตอน.

11เยียม เม่ย บุด๋ง ม่าย เต้า โหฒว กั้ม เฑี้ย เญย สี่, เหฮยียน จวั่ง ล์าง เมี่ยน เญย เอ๊า. ม่าย เต้า เหฮยียน นิ่น เญย บวั์ง, ม่าย เต้า เหฮยียน นิ่น เญย ต่อ ไฟ หมั่ว, เซ นิ่น เญย เตีย เญย เซียะ.

12เยียม เม่ย บุด๋ง ม่าย เมี่ยน ฒิบ ญ่าน หฮมวัง เหว่ย ไต๋ เมี่ยน, ปุน ฑย้าม เหลี่ยว ธ้วด. นิ่น ปู๋ง แฒะ หย่า หล่ง เหล่ย ไฟ หล่ง เก้า ธั้ม ป๊วน, ไฟ เนี้ยว จวั่ง ล์าง เมี่ยน ธ้วด ญ่าน เหว่ย ตุ๊ ญ่าน หญั่น. เม่ย หละคุ เยีย หมี่ อ๊ะ.” เฒี้ยว ทิน-ฮู่ง ฮนั้ง น้าย ก๊อง.

13“‘หมั่ง ม่าะ! เหว่ย น้าย เยีย อ๋อย ไบ๋ ปั์ว-ฒ้าง-ท้าด, หลาย เยียม เม่ย บุด๋ง ตุ๊ ไม้ แป้ง ฟิม เญย ญ่าน หย่า ไต๋ เมี่ยน, ปุน ฑย้าม เหลี่ยว ธ้วด.

14เถา เยีย โหฒว ปุน เม่ย เญย ฮนอย-เหญียะ, เม่ย ไฮ่ เตี๊ย ตุ๊ เญย ไฟ? เม่ย เญย ปั์ว หธ่อ ม่าย ชะ เญย ไฟ? เยีย, เฒี้ยว, ก๊อง ลิ์ว หย่า หฒะเก้ง อ๋อย เอย เจี๊ยน โหฒว.

15เยีย อ๋อย ปุน เม่ย ฟ้าด หฑาน เยียม หม่าน กั๊วะ หม่าน ฝีง บุด๋ง. เยีย อ๋อย เหมียด เหฑ่ง เยียม เม่ย กะญั์ว ไล่ ฮลบ เญย เจ๊า.

16เยียม หม่าน กั๊วะ เมี่ยน เญย หฑะเฮมียน เม่ย ปุน กั้น หฒุ ม่าย หวุย. เม่ย ฯฒฯ ฮิ้ว ตุ๊ เยีย เซ เฒี้ยว. ’”

17เยีย แอ๋ง ตุ๊ ฒิบ เฒี้ยว เญย หว่า ก๊อง,

18“ป้าม เมี่ยน อ้า! หฒิว เยีย หมั่ง, อิสะลาเอน เญย เฒ้ย-ฟุน เป๋น ดุย ไม้ ลั่ม หล่ง เญย กะน้าย. นิ่น บัว เยียม โต์ว-โล่ว เป๋น ต้ง ซิ, ยั่ง เถี่ย, เฮลียะ เหธา จู์ง เญย ไฆ้. นิ่น บัว เป๋น สิน ธ้วด เญย ญ่าน ไฆ้.

19เหว่ย น้าย เฒี้ยว ทิน-ฮู่ง ฮนั้ง น้าย ก๊อง, ‘หลาย เม่ย บัว เหยียด ฒู้ง เป๋น น้าย หญู่ง กะน้าย-ไฆ้, เยีย ฯฒฯ เฒาะ เม่ย บัว กั๊บ ฒุ้น เยียม เยลูซาเลม.

20ฮนั้ง เมี่ยน เฒาะ ญ่าน, ต้ง ซิ, เฮลียะ, จู์ง เหธา ยั่ง เถี่ย กั๊บ ฒุ้น ตั๊บ เจี๊ยน โล่ว โต์ว, ธุย โต์ว ปั๊ว หยุ, เยีย อ๋อย ฮนั้ง น้าย เฉีย เจี์ย, โน์ว เจี๊ยน เฒาะ เม่ย บัว กั๊บ ฒุ้น เยียม ฒี่ง กะญั์ว ปั๊ว หยุ.

21เยีย อ๋อย เฒาะ เม่ย บัว กั๊บ ฒุ้น แอ๋ง ปุน เยีย เญย กะเฉีย แป๊ด ธ้วด ฮนั้ง โต์ว นอ, ฯฒฯ ปั๊ว เม่ย บัว หยุ.

22ญ่าน ฮนั้ง หาย นอ เยียม โล่ว กะญั์ว หยุ, เม่ย บัว อ๋อย หฒุ ฮนั้ง วั้ว นอ เยียม ฒี่ง กะญั์ว หยุ. เม่ย บัว ฯฒฯ ฮิ้ว ตุ๊ เยีย, เฒี้ยว, เญย กะเฉีย แป๊ด ธ้วด ปุน เม่ย บัว.’”

23เยีย แอ๋ง ตุ๊ ฒิบ เฒี้ยว เญย หว่า ก๊อง,

24“ป้าม เมี่ยน อ้า! เม่ย อ๋อย หฒุ บั๋ว อิสะลาเอน เต่ย-ปูง, ‘เม่ย เซ ไม้ ตุ๊ สา ธีง-เหฑ่ง เญย เต่ย-ปูง. เยีย เฉีย เจี์ย เญย ฮนอย หย่า ไม้ ม่าย บยู่ง ตุ้ย เหฌี่ย.

25เต่ย-ปูง กะญั์ว เญย เปย๊ย เฒ้ย ฮนั้ง ฌุ่น เจี๊ยน เญย เซี่ยน เป๊ด กะน้าย หญั่น. นิ่น บัว ไต๋ เมี่ยน, ธ้าง ฒิ่น ฒ่อย เหธา จ๋าย เญย กะน้าย, หย่า ปุน เต่ย-ปูง ม่าย เอ๊า-กว๊า ธั้ม.

26เต่ย-ปูง กะญั์ว เญย ไซ เมี่ยน โหฒว ต่อง เยีย เญย เล์ย-หลัด, หย่า ปุน เยีย เญย ธีง-เหฑ่ง กะน้าย ม่าย หวุย. หาย หญู่ง ธีง-เหฑ่ง, หาย หญู่ง ม่าย หวุย, นิ่น บัว ไม้ ปุน ฆอย. นิ่น บัว หย่า ไม้ หฌาว เมี่ยน ฮิ้ว ตุ๊ ธีง-เหฑ่ง เญย เหธา ไม้ ธีง-เหฑ่ง เญย, ฮนั้ง หาย นอ กั้น หญู่ง. นิ่น บัว ไม้ โก๋ว เยีย เญย ตี้ง กง ฮนอย, ฯฒฯ ปุน เยีย เยียม นิ่น บัว บุด๋ง หฒุ เมี่ยน หมั่ง เผีย.

27เยียม เต่ย-ปูง กะญั์ว เญย เปย๊ย เฒ้ย ฮนั้ง เฮยี่ย จู๊ เป๊ด กะน้าย หญั่น. นิ่น บัว ไต๋ เมี่ยน ปุน ฑย้าม เหลี่ยว ธ้วด, ห่อย เมี่ยน เญย แหม่ง, โหฒว ไม้ หฒีง เหว่ย ตุ๊ กะน้าย.

28เต่ย-ปูง เญย โต่ว หว่า เมี่ยน หล่ง ฮวุย-แปะ ฑ้าด เจี๊ยน เหว่ย ปวัง แปะ ฝีง โหฒว เญย สี่ ฯฒฯ เหว่ย นิ่น บัว ปวัด จ๊า หิ่น ย่าง เญย สี่ หย่า โบ๊ว กว๋า ก๊อง เป๋น ก๊อง-แปะ เญย หว่า. นิ่น บัว ก๊อง, ‘เฒี้ยว ทิน-ฮู่ง ฮนั้ง น้าย ก๊อง.’ มป่า เฒี้ยว ไม้ ตุ๊ ก๊อง.

29เต่ย-ปูง เญย เมี่ยน เนี้ยว เมี่ยน, ลู้ เมี่ยน, เหฒย เมี่ยน จ่ม เมี่ยน เหธา ตั๋ง-ต๋น เมี่ยน หย่า ไม้ หล่ง เล์ย เญย เนี้ยว เยียม นิ่น บัว บุด๋ง เญย กั้น ฝีง เมี่ยน.

30“เยีย เยียม นิ่น บัว บุด๋ง ล์อ เต้า เหธย ฒี่ง หลาด เญย เมี่ยน, อ๋อย ปุน นิ่น เยียม เยีย เญย หฑะเฮมียน เหว่ย วั้ว นอม เต่ย-ปูง โซ้ว เจี๊ยน ฒี่ง หลาด บ๋าย ทง เญย ต๋อง, ปุน เยีย ไม้ เหมียด วั้ว นอม เต่ย-ปูง. มป่า ล์อ ไม้ ตุ๊ เหยียด เต้า.

31เหว่ย น้าย เยีย เญย กะเฉีย แป๊ด ธ้วด ปุน นิ่น บัว. เยีย เญย กะเฉีย ฮนั้ง โต์ว นอ ปั๊ว เหมียด นิ่น บัว. หฒิว นิ่น บัว โหฒว เญย เจ๊า เยีย ฒู้ง อ๋อย วิ่น ปุน นิ่น บัว. เฒี้ยว ทิน-ฮู่ง ฮนั้ง น้าย นอ ก๊อง.”

← Chapter 21 Jump to: Chapter 23 →