Ezekiel 32

Mien Bible (Thai Script) © Thailand Bible Society, 2007

← Chapter 31 Jump to: Chapter 33 →

1เยีย บัว หฒุ กว๊าด มี่ง เหฒียบ เหญ่ย หฮญัง, เหฒียบ เหญ่ย หฮลา, แซง-เยี้ยด วั้ว ฮนอย, เยีย ตุ๊ ฒิบ เฒี้ยว เญย หว่า ก๊อง,

2“ป้าม เมี่ยน อ้า! เม่ย อ๋อย หฒุ โหฒ่ ติ้ว หน่าน ฒี่ง ฑูง ป๋าว ก๊อง อียิบ เต่ย-ปูง เญย ฮู่ง, ฟาโล, หย่า ฒุ่น บั๋ว นิ่น, “‘เม่ย ฝุน กั้น เยียม หม่าน กั๊วะ บุด๋ง ฮนั้ง เต้า เซี่ยน หลุน มป่า เม่ย ฮนั้ง เยียม ค้อย กะญั์ว เญย จูง-ฮู่ง. เม่ย เยียม เม่ย เญย โด๊ะ แป๊ด ธ้วด ต้าย, หล่ง เม่ย เญย เหฒา โช้ว ววม, ปุน โด๊ะ เญย ววม โหฌะ.

3“‘เฒี้ยว ทิน-ฮู่ง ฮนั้ง น้าย ก๊อง, “‘เยีย อ๋อย หล่ง เหฒีย กั๊วะ เญย เมี่ยน ม่าน, หล่ง เยีย เญย มู์ง ป์อง หฒาว เจี๊ยน เม่ย. นิ่น บัว ฯฒฯ เฒาะ เม่ย เยียม เยีย เญย มู์ง ทอ ฝาว ต้าย.

4เยีย อ๋อย เฒาะ เม่ย กวั่ง กะเดี๊ย เดา, เฒาะ เม่ย ฒอย เหฌี่ย หล่ม-ฮวาง. เยีย อ๋อย ปุน ด๊าม-ลู่ง เญย เหนาะ เหฌี่ย ต้าย หฑบ เจี๊ยน เม่ย, หย่า ปุน เยียม ก๋อม เดา-เป้ย เญย เฮยี่ย ฒ่อย ต้าย หญั่น เม่ย เป๊ว.

5เยีย อ๋อย เฒาะ เม่ย เญย อ๊อ ฒอย กวั่ง วั้ว บง กู้ หงว่าย, หย่า ปุน เม่ย เญย เซย ปวั๊ง นอมๆ ฮ์อง.

6เยีย อ๋อย ปุน เม่ย เหลี่ยว ธ้วด เญย ฑย้าม สาม เปียะ เดา ดอน, เลี่ยม เถา บง, หย่า ปุน เม่ย เญย ฑย้าม ปวั๊ง เหฑ่ง เหยียด ฒู้ง โด๊ะ-หฒวน.

7เยีย ปุน เม่ย ไต่ เญย เฒี่ยง โห่ เยีย อ๋อย ท้อง เจี๊ยน ลู่ง, ปุน เหฮลย มวั่ง มี่ง. เยีย อ๋อย ปุน บ๋วน ท้อง เจี๊ยน บะฮนอย, หฮลา-หญุด หย่า ไม้ ตุ๊ หฒิว ฌัง.

8เยีย อ๋อย ปุน เยียม ลู่ง กู้ หงว่าย หฒิว ฌัง เญย เหยียด ฒู้ง เยียม เม่ย กู้ หงว่าย หฮมวัง มี่ง, หย่า ปุน เม่ย เญย เต่ย-ปูง หฮมวัง เหฑ่ง. น้าย เซ เฒี้ยว ทิน-ฮู่ง ก๊อง เญย หว่า.

9“‘เยีย ปุน เม่ย เยียม เหฒีย ฝีง เมี่ยน บุด๋ง หฒุ เหมียด เญย เฒี่ยง โห่, เซ เยียม ต้ง เม่ย ไม้ ฮิ้ว เญย กั๊วะ, เยีย ฯฒฯ ปุน ธั้ม-ฝีง เมี่ยน เญย เฮญี้ยว เหว่ย เม่ย เฑ่า ฟ่าน.

10เยีย เยียม นิ่น บัว เญย หฑะเฮมียน เฝง เยีย เญย หฑุ ด๊าว วั้ว หฒั่น, เยีย ฯฒฯ แฮะ เหฒีย กั๊วะ เมี่ยน กั้ม เหฑีย ไห่, หย่า ปุน นิ่น บัว เญย ฮู่ง เตี๋ย เหว่ย เม่ย ซิน หฒิน. เยียม เม่ย หฒุ ป่าย วั้ว ฮนอย, เก๊าะ-เมี่ยน เหว่ย เฑ่า เก๊าะ-เมี่ยน เญย แหม่ง ซิน หฒั่นๆ หฒิน เจี๊ยน เยียม.

11“‘เหว่ย หฒุ เฒี้ยว ทิน-ฮู่ง ฮนั้ง น้าย ก๊อง, “‘เม่ย บัว ฒู้ง อ๋อย หฒุ บาบีโลน ฮู่ง เญย หฑุ ด๊าว ไต๋.

12เยีย อ๋อย ปุน เฮ้น ไห่ เญย เมี่ยน, เซ เยียม หม่าน กั๊วะ บุด๋ง เหยียด ฒู้ง เก้า เธี้ยว เจี๋ย เญย เมี่ยน เญย หฑุ ด๊าว, โหฒว ปุน เม่ย เญย เมี่ยน ธั้ม หฒุ เหมียด. นิ่น บัว ฯฒฯ ปุน อียิบ โหฒว เหมา เญย เจ๊า หฒุด เหฑ่ง. นิ่น เญย เหยียด ฒู้ง เมี่ยน ธั้ม หย่า หฒุ เหมียด.

13เยีย อ๋อย เยียม อียิบ เญย ววม ธั้ม กะเฮลน เหมียด เหฑ่ง นิ่น เญย เหยียด ฒู้ง แซง-คู้ เฮยี่ย ฒ่อย. เยียม น้าย มี่ง ไม้ ม่าย ป้าม เมี่ยน เญย เหฒา โช้ว น้าย เต๋ย ววม เป๋น ววม-ปั่ม, หย่า ไม้ ม่าย หาย เต้า แซง-คู้ เญย เต้ย ปุน ววม โหฌะ.

14เยีย ฯฒฯ ปุน อียิบ เญย ววม ฑัง, ปุน นิ่น เญย เหยียด ฒู้ง ด้าย เหลี่ยว ฮนั้ง โย่ว นอ. น้าย เซ เฒี้ยว ทิน-ฮู่ง ก๊อง เญย หว่า.

15“‘เยีย ปุน อียิบ เป๋น เดา-ฮวาง, เยียม เต่ย-ปูง เหยียด ฒู้ง กะน้าย หฒุ ลู้ เหฑ่ง, เยีย หย่า ปุน เยียม เต่ย-ปูง เญย เหยียด ฒู้ง เมี่ยน ไต่ เหฑ่ง วั้ว หฒั่น, นิ่น บัว ฯฒฯ ฮิ้ว ตุ๊, เยีย เซ เฒี้ยว. ’

16“น้าย เซ เมี่ยน อ๋อย ป๋าว เญย หน่าน ฒี่ง ฑูง. หม่าน กั๊วะ เญย เซียะ อ๋อย ป๋าว น้าย ติ้ว ฑูง. นิ่น บัว อ๋อย เหว่ย อียิบ เต่ย-ปูง เหธา นิ่น เญย เมี่ยน ม่าน ป๋าว. น้าย เซ เฒี้ยว ทิน-ฮู่ง ก๊อง เญย หว่า.”

17เยีย บัว หฒุ กว๊าด มี่ง เหฒียบ เหญ่ย หฮญัง, เหฒียบ เหญ่ย หฮลา, เหฒียบ ฮม์ วั้ว ฮนอย, เยีย ตุ๊ ฒิบ เฒี้ยว เญย หว่า ก๊อง,

18“ป้าม เมี่ยน อ้า! เม่ย อ๋อย หฒุ เหว่ย อียิบ เญย เมี่ยน ม่าน เฑ่า เญี้ยม. อ๋อย หฒุ เฒาะ นิ่น บัว เหธา ม่าย เม่ง โห่ เญย กั๊วะ เญย เมี่ยน ฒอย เหฌี่ย เยี่ยม เกน, เซ เหฌี่ย เยียม เจี๊ยน เดา-เดี๊ย เญย ค้วด วั้ว เต๋ย.

19อ๋อย หฒุ บั๋ว นิ่น บัว, ‘เป๊ย เต้าๆ, เม่ย บัว เก้า เหฑว่ย เจี๋ย ไฟ? เหฌี่ย มี่ง ม่าะ! เหฌี่ย มี่ง เหธา ไม้ เจี๋ย ก๊าด เญย เล์ย เญย เมี่ยน เหยียด เหฌี่ย เปว๋ย.’

20นิ่น บัว เยียม หฒุ หฑุ ด๊าว ไต๋ ไต่ เญย เมี่ยน บุด๋ง คีง เหฌี่ย. หฑุ ด๊าว ฒู้ง แปง ธ้วด ต้าย อ๊ะ. กุ๊น เฒาะ อียิบ เหธา นิ่น เญย หฒวัง เมี่ยน ธั้ม ทอ มี่ง.

21ม่าย เฮ้น ไห่ เญย แปง อ๋อย เยียม เยี่ยม เกน ก๊อง เถา อียิบ ฮู่ง เหธา เถง นิ่น วั้ว เต๋ย, ‘นิ่น บัว ไม้ เจี๋ย ก๊าด เญย เล์ย เญย เมี่ยน หฒุ หฑุ ด๊าว ไต๋, เหฌี่ย ต้าย เปว๋ย เจี๊ยน น้าย.”

22“อัดซีเลีย เหธา นิ่น เญย หฒวัง เมี่ยน เยียม วั้ว หย่า ม่าย นิ่น เญย โฒ้ว เว่ย ก๋อม. นิ่น บัว เหยียด ฒู้ง หฒุ หฑุ ด๊าว ไต๋ ไต่.

23นิ่น บัว เญย โฒ้ว เยียม วั้ว นอม ค้วด โด เจี๋ย เญย ต๋อง. นิ่น เญย กวั้น เยียม เว่ย ก๋อม นิ่น เญย โฒ้ว. เต้าๆ หฒุ หฑุ ด๊าว ไต๋ ไต่, หย่า ปุน ย่าง เกน เญย เมี่ยน กั้ม เหฑีย ไห่.

24“เอลาม หย่า เยียม หน่าย. นิ่น เญย หฒวัง เมี่ยน ธั้ม หย่า เยียม เว่ย ก๋อม นิ่น เญย โฒ้ว. นิ่น บัว เต้าๆ หฒุ หฑุ ด๊าว ไต๋ ไต่. ไม้ เจี๋ย ก๊าด เญย เล์ย นิ่น บัว เหฌี่ย เถา เยี่ยม เกน. นิ่น บัว เยียม ย่าง เกน วั้ว หฒั่น, นิ่น บัว โหฒว ปุน เมี่ยน กั้ม เหฑีย ไห่. นิ่น บัว ฯฒฯ อ๋อย หฒุ เหธา เหฌี่ย วั้ว นอม ค้วด เญย เหยียด ฒู้ง เมี่ยน เตี๊ย ไญ้.

25นิ่น บัว โหฒว ต๋อง ปุน นิ่น เหธา นิ่น เญย เหยียด ฒู้ง เมี่ยน ม่าน เปว๋ย, ม่าย นิ่น บัว เญย โฒ้ว เว่ย ก๋อม. เหยียด ฒู้ง ไม้ เจี๋ย ก๊าด เญย เล์ย หย่า หฒุ หฑุ ด๊าว ไต๋. เหว่ย หฒุ เยียม ย่าง เกน เญย เฒี่ยง โห่ นิ่น บัว โหฒว ปุน เมี่ยน กั้ม เหฑีย, นิ่น บัว อ๋อย หฒุ เหธา เหฌี่ย วั้ว นอม ค้วด เญย เมี่ยน เตี๊ย ไญ้. นิ่น บัว ฯฒฯ ตุ๊ ต๋อง เหธา หฒุ ไต๋ ไต่ เญย เมี่ยน เยียม.

26“เมเซ้ก เหธา ทูบัน เหธา นิ่น บัว เญย เมี่ยน ธั้ม เยียม หน่าย. นิ่น บัว เญย โฒ้ว ฮวีง ก๋อม นิ่น บัว อี ล่าน. เหยียด ฒู้ง ไม้ เจี๋ย ก๊าด เญย เล์ย หย่า หฒุ หฑุ ด๊าว ไต๋ ไต่ เหว่ย เยียม ย่าง เกน วั้ว หฒั่น นิ่น บัว โหฒว แฮะ เมี่ยน กั้ม เหฑีย ไห่.

27นิ่น บัว ไม้ ตุ๊ เหธา ไม้ เจี๋ย ก๊าด เญย เล์ย วั้ว เต๋ย เฮ้น เญย เมี่ยน เปว๋ย. วั้ว เต๋ย เมี่ยน เหธา นิ่น บัว เบ๊าะ จ๋า เญย หวัวะ กิ่น เหฌี่ย เยี่ยม เกน. มฆ้อง ฑ์ม เจี๊ยน หฑุ ด๊าว. ท้อง-ป้าย หลอง เจี๊ยน นิ่น บัว เญย บู๊ง. เหว่ย หฒุ เยียม ย่าง เกน วั้ว หฒั่น น้าย เต๋ย เมี่ยน โหฒว ปุน เมี่ยน กั้ม เหฑีย ไห่.

28“ฟาโล อ้า! เม่ย ฟี่ ฮนั้ง เญย อ๋อย หฒุ ฮู้ หม่วน ฯฒฯ เหธา ไม้ เจี๋ย ก๊าด เญย เล์ย เญย เมี่ยน เหยียด เหฌี่ย เปว๋ย, เซ เหธา เจี๊ยน หฒุ หฑุ ด๊าว ไต๋ เญย เมี่ยน.

29“เอโดม หย่า เยียม วั้ว. นิ่น เญย ฮู่ง เหธา เหยียด ฒู้ง เปย๊ย เฒ้ย, ไม้ กุ๊น นิ่น บัว ม่าย ชะ เฮ้น, นิ่น บัว เหธา หฒุ หฑุ ด๊าว ไต๋ ไต่ เญย เมี่ยน เหยียด เหฌี่ย เปว๋ย. นิ่น บัว เหธา ไม้ เจี๋ย ก๊าด เญย เล์ย เญย เมี่ยน, เซ เหฌี่ย วั้ว นอม ค้วด เญย เมี่ยน เปว๋ย.

30“ม่าย เยียม ป๊ะ ปูง เญย หฒวัง เปย๊ย เฒ้ย เหธา ไซดอน เญย เหยียด ฒู้ง เมี่ยน, ไม้ กุ๊น นิ่น บัว ม่าย ชะ เฮ้น โหฒว ปุน เมี่ยน กั้ม เหฑีย ไห่, ฯฒฯ หฒุ ไญ้ หย่า เหธา หฒุ ไต๋ ไต่ เญย เมี่ยน เหฌี่ย วั้ว นอม ค้วด. นิ่น บัว ไม้ เจี๋ย ก๊าด เญย เล์ย นิ่น บัว เหธา หฒุ หฑุ ด๊าว ไต๋ เญย เมี่ยน เหยียด เหฌี่ย เปว๋ย หย่า เยียม เยี่ยม เกน ล่ม ฑ่อย เตี๊ย ไญ้.

31“เฒี้ยว ทิน-ฮู่ง ก๊อง, ‘ฟาโล เหธา นิ่น เญย จุน-แปง กวั้น ปวัด น้าย เต๋ย เมี่ยน นิ่น ฯฒฯ เหว่ย นิ่น เญย เมี่ยน ธั้ม หฒุ หฑุ ด๊าว ไต๋ ไต่ ตุ๊ ออน เฮญี้ยว.

32ไม้ กุ๊น เยีย ปุน เยียม ย่าง เกน เญย เมี่ยน กั้ม เหฑีย ฟาโล, นิ่น เหธา นิ่น เญย หฒวัง เมี่ยน ธั้ม หธ่อ อ๋อย หฒุ เหธา ไม้ เจี๋ย ก๊าด เญย เล์ย เญย เมี่ยน เหธา หฒุ หฑุ ด๊าว ไต๋ เญย เมี่ยน เหยียด เหฌี่ย เปว๋ย. น้าย เซ เฒี้ยว ทิน-ฮู่ง ก๊อง เญย หว่า.”

← Chapter 31 Jump to: Chapter 33 →