Ezekiel 34

Mien Bible (Thai Script) © Thailand Bible Society, 2007

← Chapter 33 Jump to: Chapter 35 →

1เยีย แอ๋ง ตุ๊ ฒิบ เฒี้ยว เญย หว่า ก๊อง,

2“ป้าม เมี่ยน อ้า! เม่ย อ๋อย หฒุ โต่ว หว่า ก๊อง อิสะลาเอน เญย โก๋ว ปะกี ยู่ง เมี่ยน. อ๋อย หฒุ โต่ว หว่า ก๊อง นิ่น บัว, เซ ก๊อง วั้ว เต๋ย หมั่ง ปะกี ยู่ง เญย เมี่ยน, บั๋ว นิ่น บัว, ‘เฒี้ยว ทิน-ฮู่ง ฮนั้ง น้าย ก๊อง, “อิสะลาเอน เญย โก๋ว ปะกี ยู่ง เมี่ยน ขูง โก๋ว กั้น ฮนั้ง ฯฒฯ อ๋อย หฒุ โค้ว อ๊ะ. โก๋ว ปะกี ยู่ง เญย เมี่ยน อ๋อย หฒุ โก๋ว ปะกี ยู่ง ไม้ เฒ์ย?

3เม่ย บัว หญั่น อ๊อ-จุ่น, ฒุ ยู่ง เปยย เญย ลุย, ไต๋ เก้า จุ่น เจี๋ย เญย ปะกี ยู่ง หญั่น, มป่า ไม้ โก๋ว ปะกี ยู่ง.

4เมา วั้ว เต๋ย, เม่ย บัว ไม้ เถง เฮ้น. ปุ๊ด แป่ง วั้ว เต๋ย, เม่ย บัว ไม้ หฒ่อ. หฒุ มุน เญย, เม่ย บัว ไม้ เปว. ต่อง เจ๊า วั้ว เต๋ย, เม่ย บัว ไม้ ต้อ หฑวน. ตี๋ง ล่าย วั้ว เต๋ย, เม่ย บัว ไม้ ล์อ. ต๋าว หฑวน เม่ย บัว กุ๊น นิ่น บัว, หย่า ชะ เหฒย, โหฒว โตะ นิ่น บัว.

5นิ่น บัว ฟ้าด หฑาน เหฑ่ง เหว่ย หฒุ ไม้ ม่าย โก๋ว ปะกี ยู่ง เมี่ยน. หฑาน มี่ง เญย เฒี่ยง โห่ นิ่น บัว เป๋น เหยียด ฒู้ง เฮยี่ย ฒ่อย หญั่น เญย กะน้าย.

6เยีย เญย ปะกี ยู่ง โย่ว กัน เหยียด ฒู้ง บง เหธา นอมๆ บง-ฮลัง มี่ง. เยีย เญย ปะกี ยู่ง หฑาน มี่ง เยียม ลู่ง เดี๊ย เญย เดา-เป้ย, หย่า ไม้ ม่าย เมี่ยน ฒิ่ม ล์อ.”

7“‘เหว่ย น้าย เม่ย บัว โก๋ว ปะกี ยู่ง เญย เมี่ยน อ๋อย หฒุ หมวัง เฒี้ยว เญย หว่า.

8เฒี้ยว ทิน-ฮู่ง ฮนั้ง น้าย นอ ก๊อง, “เยีย เฒี้ยง เจี๊ยน เยีย กั้น เญย แหม่ง แล์ง หว่า. เหว่ย หฒุ เยีย เญย ปะกี ยู่ง ไม้ ม่าย เมี่ยน โก๋ว, หย่า ไม้ ม่าย หาย เต้า มี่ง ฒิ่ม ล์อ นิ่น บัว, เยีย เญย ปะกี ยู่ง เป๋น เหยียด ฒู้ง เฮยี่ย ฒ่อย หญั่น เญย กะน้าย. ต๋าว หฑวน วั้ว เต๋ย โก๋ว ปะกี ยู่ง เญย เมี่ยน ขูง โก๋ว กั้น ฮนั้ง, ไม้ โก๋ว เยีย เญย ปะกี ยู่ง.

9เหว่ย น้าย เม่ย บัว โก๋ว ปะกี ยู่ง เญย เมี่ยน หมวัง เฒี้ยว เญย หว่า ม่าะ!

10เฒี้ยว ทิน-ฮู่ง ฮนั้ง น้าย ก๊อง, “เยีย เหธา วั้ว เต๋ย โก๋ว ปะกี ยู่ง เญย เมี่ยน ต๊า วิน. เยีย อ๋อย เฒาะ เยีย เญย ปะกี ยู่ง เยียม นิ่น บัว เญย ปั์ว-เดี๊ย หฑวน, ไม้ ปุน นิ่น บัว โก๋ว อ๊ะ. ฮนั้ง หน่าย นิ่น บัว ไม้ ตุ๊ แอ๋ง โก๋ว นิ่น บัว กั้น. เยีย อ๋อย เหฌียว เยีย เญย ปะกี ยู่ง เปย๋า ดุ๊ด นิ่น บัว เญย ฑุ่ย, ไม้ ปุน โหฒว นิ่น บัว เญย หญั่น ฮบ อ๊ะ.”

11“‘เฒี้ยว ทิน-ฮู่ง ฮนั้ง น้าย ก๊อง, “เยีย กั้น อ๋อย ฒิ่ม ล์อ, อ๋อย ล์อ ปวัด เยีย กั้น เญย ปะกี ยู่ง.

12โก๋ว ปะกี ยู่ง เมี่ยน ฮนั้ง หาย นอ เยียม นิ่น เญย ปะกี ยู่ง หฑาน มี่ง เญย ต๋อง ล์อ นิ่น เญย ปะกี ยู่ง, เยีย หย่า อ๋อย ฮนั้ง วั้ว นอ ล์อ เยีย เญย ปะกี ยู่ง. น้าย เต๋ย ปะกี ยู่ง เยียม บ๋วน-เจี๊ยะ หฮมวัง เญย ฮนอย หฒุ หฑาน มี่ง เญย นอมๆ ต๋อง, เยีย อ๋อย เยียม วั้ว เหฌียว นิ่น บัว หฑวน ต้าย.

13เยีย อ๋อย เยียม หม่าน ฝีง หม่าน กั๊วะ ต้อ นิ่น บัว หฑวน ต้าย เยียม นิ่น บัว กั้น เญย เต่ย-ปูง. เยีย อ๋อย โก๋ว นิ่น บัว เยียม อิสะลาเอน เญย บง เหธา ติ้วๆ ววม-เฮลน เหธา เมี่ยน เยียม เหฌี่ย เญย เหยียด ฒู้ง ต๋อง.

14เยีย อ๋อย ปู๋ง นิ่น บัว เยียม หลง ไห่ เญย เมี้ย-เธี้ยง. นิ่น บัว เญย เมี้ย-เธี้ยง หย่า เยียม อิสะลาเอน เญย บง-ฮลัง. นิ่น บัว ไฮ่ เปว๋ย เหฌี่ย เมี้ย หลง เญย เธี้ยง, เซ เยียม อิสะลาเอน เญย บง หญั่น หลง ไห่, คู้ ไห่ เญย เมี้ย.

15เยีย กั้น โหฒว เยีย เญย ปะกี ยู่ง เญย โก๋ว ปะกี ยู่ง เมี่ยน หย่า ปุน นิ่น บัว ตุ๊ เปว๋ย เหฌี่ย.” น้าย เซ เฒี้ยว ทิน-ฮู่ง ก๊อง เญย หว่า.

16ตี๋ง ล่าย วั้ว เต๋ย, เยีย อ๋อย มี่ง ล์อ. ต่อง เจ๊า วั้ว เต๋ย, เยีย อ๋อย ต้อ หฑวน. หฒุ มุน วั้ว เต๋ย, เยีย อ๋อย เปว เดีย. เมา วั้ว เต๋ย, เยีย อ๋อย เถง เฮ้น. มป่า จุ่น เญย, เฮ้น เญย, เยีย อ๋อย เหมียด. เยีย อ๋อย หล่ง แป้ง ฟิม เญย เจ๊า โก๋ว น้าย เต๋ย ปะกี ยู่ง.

17“‘เฒี้ยว ทิน-ฮู่ง ก๊อง, “เยีย เญย ปะกี ยู่ง กวั้น อ้า! เยีย อ๋อย เยียม ปะกี ยู่ง บุด๋ง เซี้ยม เหยียด เต้า เหยียด เต้า, หย่า เฒาะ ปะกี ยู่ง โก๊ว เหธา ยู่ง โก๊ว ปุน ฆอย.

18เม่ย บัว เยียม หลง ไห่ เญย เมี้ย-เธี้ยง หญั่น หลง ไห่ เญย เมี้ย หธ่อ ไม้ เก๋า ไฟ? เม่ย บัว หธ่อ หล่ง เต้ย ธ้าย เหฒ่ง เหฌี่ย เญย เมี้ย. เม่ย บัว ฮบ ววม-ฑัง หธ่อ ไม้ เก๋า ไฟ? หธ่อ หล่ง เม่ย บัว เญย เต้ย โช้ว เหฒ่ง เหฌี่ย เญย ววม โหฌะ มี่ง.

19เยีย เญย ปะกี ยู่ง อ๋อย หฒุ หญั่น เม่ย บัว ธ้าย เหฌี่ย เญย เมี้ย หย่า ฮบ เม่ย บัว เญย เต้ย โช้ว โหฌะ เญย ววม เซ หอบ เญย ไฟ?

20“‘เหว่ย น้าย เฒี้ยว ทิน-ฮู่ง ฮนั้ง น้าย ก๊อง บั๋ว นิ่น บัว, “เยีย อ๋อย เยียม ปะกี ยู่ง จุ่น เหธา ปะกี ยู่ง ไจ่ บุด๋ง เซี้ยม,

21เหว่ย หฒุ เม่ย บัว หล่ง บะเต้า เหธา ซิน เบ๋ง เหยียด ฒู้ง เฮย เญย, เมา เญย วั้ว เต๋ย, หย่า หล่ง จอง ฒง เถา เม่ย บัว ปุน นิ่น บัว หฑาน มี่ง เปยย ปูง.

22เหว่ย น้าย เยีย อ๋อย เหฌียว เยีย เญย ปะกี ยู่ง. เยียม น้าย มี่ง นิ่น บัว ฯฒฯ ไม้ หฒุ เหฒย อ๊ะ. เยีย หย่า อ๋อย เยียม นิ่น บัว เหยียด เต้า เหยียด เต้า ปะกี ยู่ง บุด๋ง เซี้ยม นิ่น บัว.

23เยีย อ๋อย ออน เหยียด เต้า โก๋ว ปะกี ยู่ง เญย เมี่ยน, เซ เยีย เญย โปว, ดาวิด, โก๋ว นิ่น บัว. นิ่น อ๋อย โก๋ว นิ่น บัว หย่า เป๋น นิ่น บัว เญย โก๋ว ปะกี ยู่ง เมี่ยน.

24เยีย, เฒี้ยว, อ๋อย โหฒว นิ่น บัว เญย ทิน-ฮู่ง. เยีย เญย โปว, ดาวิด, หย่า อ๋อย เยียม นิ่น บัว บุด๋ง โหฒว เก้า โฮล เจี๋ย วั้ว เต้า ฮู่ง เตี๋ย. เยีย, เฒี้ยว, ก๊อง ลิ์ว อ๊ะ.

25“‘“เยีย อ๋อย เหธา นิ่น บัว เหลียบ แหง่ง หว่า ปุน นิ่น บัว แป้ง ออน เญย เยียม, หย่า ปุน เยียม เต่ย-ปูง เธี้ยว เญย เฮยี่ย ฒ่อย หฒุด เหฑ่ง. นิ่น บัว ฯฒฯ ไฮ่ แป้ง ออน เญย เยียม เต่ย-ปูง-ฮวาง หย่า เปว๋ย วั้ว เดี๋ยง-หล่ม.

26เยีย อ๋อย ปุน นิ่น บัว เหธา เว่ย ก๋อม เยีย เญย บง นอมๆ ต๋อง เป๋น เหธย ฟุ เญย ต๋อง. เยีย อ๋อย หฒิว ธุน-เธียว ปุน ลู่ง ตุ้ย บยู่ง, เป๋น เหธย ฟุ ปุน เมี่ยน เญย บยู่ง.

27หล่ม-ฮวาง เญย เดี๋ยง อ๋อย ธ้วด เปี๊ยว. เดา-เป้ย อ๋อย ธ้วด แกง-หฒวัง. นิ่น บัว ฯฒฯ ตุ๊ แป้ง ออน เญย เยียม นิ่น บัว เญย เต่ย-ปูง. เยีย ว้วด นิ่น บัว ก์า เญย เดี๋ยง-ก์า เน้า, เหฌียว นิ่น บัว เปย๋า ดุ๊ด ห่อย นิ่น บัว โหฒว โน่ว วั้ว เต๋ย เญย ปั์ว-เดี๊ย วั้ว หฒั่น, นิ่น บัว ฯฒฯ ฮิ้ว ตุ๊ เยีย เซ เฒี้ยว.

28เยียม น้าย มี่ง นิ่น บัว ไม้ หฒุ กั้น กั๊วะ เมี่ยน ลู้. เต่ย-ปูง เญย เฮยี่ย ฒ่อย หย่า ไม้ หงาด นิ่น บัว. นิ่น บัว ตุ๊ แป้ง ออน เญย เยียม นิ่น บัว เญย เต่ย-ปูง, ไม้ ม่าย หาย เต้า โหฒว แฮะ นิ่น บัว.

29เยีย เฒาะ ม่าย เม่ง เต้า, เดา-โท้ว หลง เญย ลี่ง เต่ย ปุน นิ่น บัว. เยียม น้าย มี่ง นิ่น บัว ไม้ หฒุ หง่อ หฮนาง ไต่, หย่า ไม้ หฒุ กั้น กั๊วะ เมี่ยน หมั่ง เผีย นิ่น บัว.

30นิ่น บัว ฯฒฯ ฮิ้ว ตุ๊ เยีย, เฒี้ยว, นิ่น บัว เญย ทิน-ฮู่ง, เหธา นิ่น บัว เยียม. นิ่น บัว เซ อิสะลาเอน เญย เฒ้ย-ฟุน, เป๋น เยีย เญย แปะ ฝีง. น้าย เซ เฒี้ยว ทิน-ฮู่ง ก๊อง เญย หว่า.

31เม่ย บัว โหฒว เยีย เญย ปะกี ยู่ง, เซ เยีย เญย เมี้ย-เธี้ยง เญย ปะกี ยู่ง. เม่ย บัว เป๋น ป้าม เมี่ยน. เยีย เป๋น เม่ย บัว เญย ทิน-ฮู่ง. น้าย เซ เฒี้ยว ทิน-ฮู่ง ก๊อง เญย หว่า.”’”

← Chapter 33 Jump to: Chapter 35 →