Ezekiel 8

Mien Bible (Thai Script) © Thailand Bible Society, 2007

← Chapter 7 Jump to: Chapter 9 →

1เยีย บัว หฒุ ธ้าง ตะหลัวะ หฮญัง, หลัวะ หฮลา, แซง-ฮม์, เยีย เฒว์ย เจี๊ยน เยีย เญย เปย๊า กะญั์ว. ยูดา เญย เมี่ยน โก๋ บัว เฒว์ย เจี๊ยน เยีย เญย หฑะเฮมียน วั้ว หฒั่น, เฒี้ยว ทิน-ฮู่ง เญย ชะ เหฌี่ย ต้าย เยียม เยีย.

2เยีย เธา เฮมียน หมั่ง, ปวัด ม่าย ฝัง เฒ้ย ฮนั้ง ป้าม เมี่ยน เญย ฝัง เฒ้ย นอ. เยียม นิ่น เญย จ๊าย กะเดี๊ย แหมง ปวัด โมว เฒ้ย ฮนั้ง โต์ว. เยียม จ๊าย กู้ หงว่าย ฌัง เญย, ฮนั้ง ต้ง ซิ โหย่วๆ วั้ว.

3นิ่น ซูง ธ้วด ปวัด ฮนั้ง ปั์ว นอ, นั้น เจี๊ยน เยีย เญย เหยียด เฒ้ย บะเปยย. สีง ลี่ง โป้ว เยีย ฝาว เถา ลู่ง เหธา เดา บุด๋ง, แอ๋ง เยียม ทิน-ฮู่ง ปุน เยีย หล่าว ย่าง เญย สี่ ต้อ เยีย มี่ง เยลูซาเลม, เถา ฮวิน ป๊ะ ปูง เปียะ ทิน-ฮู่ง เญย เปย๊า กะญั์ว วั้ว คัง หลาด แก้ง. เยียม วั้ว เหลียบ นอม ธัวะ ทิน-ฮู่ง เฉีย เจี์ย เญย หมิ่ว-ฝัง, ธัวะ ทิน-ฮู่ง เฉีย เจี์ย ไห่.

4เยียม วั้ว ม่าย อิสะลาเอน เญย ทิน-ฮู่ง เญย ฌัง-หล่าง ฮนั้ง เยีย เยียม เดา-แป้ง ปวัด วั้ว นอ.

5ทิน-ฮู่ง ก๊อง บั๋ว เยีย, “ป้าม เมี่ยน อ้า! อี้ หฒั่น เธา เฮมียน หมั่ง ป๊ะ ปูง.” เยีย ฯฒฯ เธา เฮมียน หมั่ง ป๊ะ ปูง, ปวัด เยียม เหฒี่ย-ต้อง เญย หลาด แก้ง ป๊ะ ปูง ม่าย ธัวะ ทิน-ฮู่ง เฉีย เจี์ย เญย หมิ่ว-ฝัง.

6ทิน-ฮู่ง แอ๋ง ก๊อง บั๋ว เยีย, “ป้าม เมี่ยน อ้า! เม่ย ปวัด นิ่น บัว โหฒว หาย หญู่ง ไฟ? เซ อิสะลาเอน เญย เฒ้ย-ฟุน เยียม น้าย โหฒว ด่ง น้าย โฮล, กั้ม เฑี้ย เญย สี่, หฒุ่น เยีย เล่ย โก เยีย เญย สีง ติ่น. มป่า เม่ย หธ่อ ไฮ่ ตุ๊ ปวัด กั้ม เฑี้ย เญย สี่ เก้า โฮล เจี๋ย น้าย.”

7นิ่น แอ๋ง ต้อ เยีย เถา เปียะ ฒี่ง หลาด กะญั์ว เญย แก้ง ด่าง. เยีย หมั่ง ปวัด เยียม วั้ว ฒี่ง หลาด ม่าย นอม ค้วด.

8นิ่น ก๊อง บั๋ว เยีย, “ป้าม เมี่ยน อ้า! เว้ด ทง ฒี่ง หลาด ม่าะ!” เยีย ฯฒฯ เว้ด ทง นอม ค้วด, ปวัด ม่าย เต้า แก้ง.

9นิ่น แอ๋ง ก๊อง บั๋ว เยีย, “เปียะ ม่าะ! เปียะ มี่ง หมั่ง นิ่น บัว เยียม น้าย โหฒว กั้ม เฑี้ย ไห่ เญย เอ๊าะ สี่.”

10เยีย ฯฒฯ เปียะ มี่ง หมั่ง, ปวัด เว่ย ก๋อม เญย หฌ่ง ม่าย หญู่งๆ ญอง เดา เญย กะน้าย เญย ฝัง, เหธา กั้ม เฑี้ย ไห่ เญย แซง-คู้ เญย ฝัง, แอ๋ง เหธา อิสะลาเอน เญย เฒ้ย-ฟุน เญย เหยียด ฒู้ง หมิ่ว-ฝัง.

11เยียม หน่าย ม่าย เธี้ยด เหฒียบ เต้า อิสะลาเอน เญย เฒ้ย-ฟุน เญย เมี่ยน โก๋ โซ้ว เจี๊ยน วั้ว เต๋ย กะน้าย เญย ฝัง เญย หฑะเฮมียน. หย่า ม่าย ซาฟาน เญย ตอน, ยาอาซันยา, เยียม วั้ว เต๋ย เมี่ยน บุด๋ง. โม์ว ล่าน เมี่ยน เญย ปั์ว โป้ว เจี๊ยน ฮูง-โล่ว. ฮูง เญย เฉีย เหธา เสียว ธุดๆ เญย ฝาว กู้ หงว่าย.

12ทิน-ฮู่ง ก๊อง บั๋ว เยีย, “ป้าม เมี่ยน อ้า! เม่ย ปวัด อิสะลาเอน เญย เฒ้ย-ฟุน เญย เมี่ยน โก๋ เยียม หฮมวัง ฒง โหฒว เญย สี่ ไฟ? เก๊าะ-เมี่ยน เยียม เก๊าะ-เมี่ยน กั้น ม่าย หมิ่ว-ฝัง วั้ว ฉง ต๋อง เหว่ย หฒุ นิ่น บัว ก๊อง, ‘ เฒี้ยว หมั่ง ไม้ ปวัด เยีย บัว. เฒี้ยว กวั่ง น้าย นอม เต่ย-ปูง หมี่ อ๊ะ.’”

13ทิน-ฮู่ง แอ๋ง ก๊อง บั๋ว เยีย, “เม่ย หธ่อ ไฮ่ ตุ๊ ปวัด นิ่น บัว โหฒว กั้ม เฑี้ย เญย สี่ เก้า โฮล เจี๋ย น้าย.”

14นิ่น แอ๋ง ต้อ เยีย มี่ง เถา เฒี้ยว เญย เปย๊า เปียะ ป๊ะ ปูง เญย แก้ง. เยียม วั้ว ม่าย ธั้ม-เต้า มเซียะ ตอน เฒว์ย เจี๊ยน เฑ่า เญี้ยม เหว่ย หฒุ ทัมมุด เฒี่ยน ไต่.

15นิ่น แอ๋ง ก๊อง บั๋ว เยีย, “ป้าม เมี่ยน อ้า! เม่ย ปวัด เญย ไฟ? เม่ย หธ่อ ไฮ่ ตุ๊ ปวัด กั้ม เฑี้ย เญย สี่ เก้า โฮล เจี๋ย น้าย.”

16นิ่น แอ๋ง ต้อ เยีย เปียะ เฒี้ยว เญย เปย๊า เญย หลาด กะญั์ว วั้ว คัง. เยียม เฒี้ยว เญย เปย๊า เญย แก้ง ด่าง, ปี๋ง ล่าง ต๋อง เหธา เหฒี่ย-ต้อง บุด๋ง, ม่าย เล่ย ไม้ โก หญี่ เหฒียบ ฮม์ ล่าน เมี่ยน. นิ่น บัว เญย ติ ต์าน ฮวิน เฒี้ยว เญย เปย๊า วั้ว ปูง. นิ่น บัว เญย เฮมียน ฮวิน ตง ปูง. นิ่น บัว หย่า ป๋าย เยียม ตง ปูง เญย บะฮนอย.

17เฒี้ยว แอ๋ง ก๊อง บั๋ว เยีย, “ป้าม เมี่ยน อ้า! เม่ย ปวัด น้าย เต๋ย สี่ ไฟ? ยูดา เญย เฒ้ย-ฟุน เยียม น้าย โหฒว น้าย เต๋ย กั้ม เฑี้ย เญย สี่ เซ ไฝ-ฟิ้ว สี่ ไฟ? นิ่น บัว เยียม ปวั๊ง เต่ย-ปูง โหฒว เธี้ยว เญย สี่ ธัวะ เยีย เก้า ฟัด เฉีย เจี์ย. นิ่น บัว เฒาะ เดี๋ยง-ฆว่า อัน นิ่น บัว เญย บะฒอง.

18เหว่ย น้าย เยีย อ๋อย เฉีย เจี์ย เจี๊ยน โหฒว ปุน นิ่น บัว. เยีย เญย มฒีง หมั่ง นิ่น บัว หย่า ไม้ ค้อ-ฟิ หย่า ไม้ ค้อ-เลี่ยน นิ่น บัว. ไม้ กุ๊น นิ่น บัว ชะ เห่ว เฉีย บุย เปียะ เยีย เญย มน่อม, เยีย ไม้ หมวัง นิ่น บัว.”

← Chapter 7 Jump to: Chapter 9 →