Ezekiel 16

Mien Bible (Thai Script) © Thailand Bible Society, 2007

1เยีย แอ๋ง ตุ๊ ฒิบ เฒี้ยว เญย หว่า ก๊อง,

2“ป้าม เมี่ยน อ้า! เม่ย อ๋อย หฒุ ปุน เยลูซาเลม ฒี่ง ฮิ้ว ตุ๊ นิ่น เญย กั้ม เฑี้ย ไห่ เญย สี่.

3อ๋อย หฒุ ก๊อง, ‘เฒี้ยว ทิน-ฮู่ง ฮนั้ง น้าย ก๊อง บั๋ว เยลูซาเลม, “เม่ย เญย กอน-ป๊วน เหธา เม่ย ธ้วด เสย เญย ต๋อง เซ คานาอัน เมี่ยน เญย เต่ย-ปูง. เม่ย เญย เตีย เซ อาโมไล เมี่ยน, เม่ย เญย มา ฮิดไท เมี่ยน.

4ก๊อง เถา เม่ย ธ้วด เสย เญย เจ๊า, ต้ง เม่ย ธ้วด เสย วั้ว ฮนอย ไม้ ตุ๊ จั๊บ เม่ย เญย เน์ว, หย่า ไม้ ตุ๊ หล่ง ววม หฑาว เม่ย เญย ซิน ปุน เม่ย ธีง-เหฑ่ง, ไม้ ตุ๊ หล่ง เฑ้า ฑ้าด ซิน หย่า ไม้ ตุ๊ หล่ง สวัง เปว.

5ไม้ ม่าย หาย เต้า เญย มฒีง หมั่ง ตุ๊ ค้อ-เลี่ยน เม่ย. ไม้ ม่าย หาย เต้า เถง เม่ย โหฒว น้าย เต๋ย สี่ เหว่ย หฒุ ไม้ ม่าย หาย เต้า ค้อ-เลี่ยน. เม่ย ธ้วด เสย เญย ฮนอย เม่ย หฒุ กวั่ง วั้ว หล่ม-ฮวาง เหว่ย หฒุ เมี่ยน ฒู้ง กั้ม เฑี้ย เม่ย.

6“‘“เยีย เจี๋ย เม่ย เญย กะเฮลน วั้ว หฒั่น, ปวัด เม่ย เยียม เม่ย เญย ฑย้าม-ด้อง กะญั์ว ถิน. เม่ย เปว๋ย เจี๊ยน เม่ย เญย ฑย้าม-ด้อง กะญั์ว เยีย ก๊อง บั๋ว เม่ย, ‘เม่ย กุ๊น เฒี่ยง เจี๊ยน อ๊ะ,

7หย่า โฮล ต้าย ฮนั้ง เยียม เด่ย เญย เมี้ย-เปี้ยง นอ.’ เม่ย ฯฒฯ หมั่นๆ โฮล ต้าย โหย่ว ฮลัง, เป๋น เซียะ เหฑว่ย เญย. เม่ย เญย หญอ ปุ๊ด ธ้วด เจ้า เญย, บะเปยย หย่า ด๊าว, มป่า เม่ย หธ่อ ฌัง ซิน แล่ง แก๊ง เญย เยียม.

8“‘“เยีย แอ๋ง เจี๋ย เม่ย เญย กะเฮลน หมั่ง เม่ย, ปวัด เม่ย เถา เฒี่ยง โห่ ไฮ่ ฮนั้ม ตอน. เยีย ฯฒฯ หล่ง เยีย เญย ต้ม ลุย-จั๊วะ เญย เก๊าะ ปวัง เจี๊ยน เม่ย แล่ง แก๊ง เญย ซิน. เยีย เหธา เม่ย โฮ้ว หว่า หย่า เหธา เม่ย แล์ง เจี์ย แหง่ง หว่า. เม่ย ฯฒฯ เป๋น เยีย เญย หมี่ อ๊ะ.” น้าย เซ เฒี้ยว ทิน-ฮู่ง ก๊อง เญย หว่า.

9“‘“เยีย หล่ง ววม หฑาว เม่ย เญย ซิน, หฑาว กั๊วะ เม่ย วั้ว เต๋ย ฑย้าม หย่า หล่ง กะลั้น โย่ว ฑ้าด เจี๊ยน เม่ย.

10เยีย ปุน เม่ย ฒุ หธง ต้าย เญย ลุย หย่า ตาบ หลง เจี๋ย เญย ด๊บ-เฮ่. เยีย หล่ง ล่าม่า เดีย-หม่วน หย่า หล่ง เธี่ยว ตุ่น โหฒว ลุย-โหว ปวัง เจี๊ยน เม่ย เญย ซิน.

11เยีย หล่ง เซียว-เซ้ด ฒอง เจี๊ยน เม่ย, หล่ง เจี้ยม ตั้ง เจี๊ยน เม่ย เญย ปั์ว, หล่ง เจียม-หลิ่ม ตั้ง เจี๊ยน เม่ย เญย จาง.

12เยีย เฒาะ บะฒอง-ฮยุน ตั้ง เจี๊ยน เม่ย เญย บะฒอง หย่า เฒาะ มน่อม ฮยุน ตั้ง เจี๊ยน เม่ย เญย มน่อม, แอ๋ง เฒาะ นอม เหฑว่ย ไห่ เญย นี้ง ด๋ง เจี๊ยน เม่ย เญย มฆ้อง.

13ฮนั้ง หน่าย เม่ย เญย ซิน ฒอง เจี๊ยน เจียม ญ่าน เญย เซียว-เซ้ด. เม่ย ฒุ เญย ลุย-โหว หล่ง ล่าม่า เดีย-หม่วน, เธี่ยว ตุ่น เหธา หธง ต้าย เญย เดีย. เม่ย หญั่น เญย กะน้าย เซ บ๊วน-หม่วน, เมว์ย-ต้อง เหธา กะลั้น โย่ว. เม่ย หฒะเก้ง! เหฑว่ย ไห่, ฒู้ง เป๋น ฮู่ง หม่า หมี่ อ๊ะ.

14เหว่ย หฒุ เม่ย เหฑว่ย ไห่, เม่ย เญย เม่ง เต้า ซีง ปวั๊ง นอมๆ กั๊วะ. เม่ย เหฑว่ย ตุ๊ ตุ้น ยุ่น เหว่ย เยีย จา ปุน เม่ย เญย ฌัง-หล่าง.” น้าย เซ เฒี้ยว ทิน-ฮู่ง ก๊อง เญย หว่า.

15“‘“หลาย เม่ย เหฑว่ย, เม่ย ปั่ง เหฑว่ย เญย เม่ง เต้า เป๋น ปวั้ง เลี่ยว เญย มเซียะ ตอน. ตะฟ่าน หาย เต้า เจี๋ย เจ๊า เญย เมี่ยน, เม่ย หย่า อะเฮน้ย เหฮยียน.

16เม่ย เฒาะ เต๋ย กั้น เญย ลุย-โหว ฒอง เยียม ฮลัง หฒั่ง เฒี่ยน เญย ต๋อง เหฑว่ย, ฯฒฯ เยียม วั้ว โหฒว ปวั้ง เลี่ยว เญย สี่. น้าย เต๋ย สี่ ไม้ หอบ หฒุ ม่าย. เหยียด ลิ์ว ไม้ หอบ หฒุ ม่าย อ๊ะ.

17เม่ย แอ๋ง เฒาะ เยีย จิว ปุน เม่ย เหฑว่ย ไห่ เญย เซียว-เซ้ด, เซ หล่ง เยีย เญย เจียม ญ่าน เญย เซียว-เซ้ด, ต้ง เยีย จิว ปุน เม่ย. เม่ย ฯฒฯ หล่ง เหว่ย กั้น โหฒว มจั่ง ตอน เญย ฝัง เหฮยียน อ๊ะ.

18เม่ย หล่ง เม่ย หธง ต้าย เญย ลุย-โหว ปุน น้าย เต๋ย หมิ่ว-ฝัง ปุ๋ย เจี๊ยน, หย่า เฒาะ เยีย เญย กะลั้น โย่ว เหธา เยีย เญย ฮูง อัน เจี๊ยน นิ่น เญย หฑะเฮมียน.

19เม่ย แอ๋ง เฒาะ เยีย เหธย ปุน เม่ย เญย หญั่น ฮบ, เซ จิว ปุน เม่ย หญั่น เญย บ๊วน-หม่วน, กะลั้น โย่ว เหธา เมว์ย-ต้อง, อัน เจี๊ยน นิ่น เญย หฑะเฮมียน เหว่ย โหฒว ดาง เญย เฉีย หอบ นิ่น เญย เฮญี้ยว.” น้าย เซ เฒี้ยว ทิน-ฮู่ง ก๊อง เญย หว่า.

20“‘“เม่ย แอ๋ง เฒาะ เม่ย เญย ตอน, เม่ย เญย เซียะ, ต้ง เม่ย ยู์ง ปุน เยีย เญย ตอน เซียะ, หล่ง โหฒว เหฒี่ย เญย กะน้าย ปุน วั้ว เต๋ย หมิ่ว-ฝัง. เม่ย โหฒว ปวั้ง เลี่ยว เญย เมี่ยน ฝุน เป๋น ไฝ-ฟิ้ว สี่ ไฟ?

21เม่ย ฯฒฯ เฒาะ เยีย เญย น่าม โญ์ว ไต๋ เหว่ย หล่ง โต์ว ปั๊ว เหฒี่ย ฝ่ง ห่อ ปุน วั้ว เต๋ย หมิ่ว-ฝัง.

22เม่ย โหฒว น้าย เต๋ย เหยียด ฒู้ง กั้ม เฑี้ย เญย สี่ เหธา หม่าย ซิน เญย เจ๊า. เม่ย ไม้ จั๋ง หฮญัง-เจ๊ย หลุน เญย เฒี่ยง โห่ เม่ย ฌัง ซิน แล่ง แก๊ง เญย เยียม เม่ย เญย ฑย้าม-ด้อง ถิน.”

23“‘เฒี้ยว ทิน-ฮู่ง ก๊อง, “โค้ว อ๊ะ. เม่ย อ๋อย หฒุ โค้ว อ๊ะ. เยียม เม่ย โหฒว ลิ์ว เหยียด ฒู้ง เอ๊าะ สี่,

24ฆะฮ้า เม่ย เหว่ย กั้น โหฒว นอม ต๋อง ป๋าย หมิ่ว-ฝัง หย่า เยียม นอมๆ ต้ม หฒวัง หฒ่าม โหฒว ฮลัง เญย ต๋อง.

25เยียม ติ้วๆ เจ๊า-คู้ เม่ย โหฒว ฮลัง, หฒั่ง เฒี่ยน เญย ต๋อง, หล่ง เม่ย เหฑว่ย เญย เม่ง เต้า โหฒว กั้ม เฑี้ย เญย สี่. ตะฟ่าน เจี๋ย เจ๊า เญย เมี่ยน เม่ย อะเฮน้ย เหฮยียน, ปุน เม่ย เหฮยียน เญย เจ๊า หฮยาง เจี๊ยน มี่ง.

26เม่ย หย่า เยียม กะเฮลน เญย กั๊วะ หั่น เม่ย เญย อียิบ เมี่ยน ฯฒฯ ปุน เม่ย ปวั้ง เลี่ยว เญย เจ๊า หฮยาง เจี๊ยน ฝาว, ธัวะ เยีย เฉีย เจี์ย.

27เหว่ย น้าย เยีย ซูง เยีย เญย ปั์ว เหธา เม่ย ต๋อย-เตก หย่า ปุน เม่ย เญย หญั่น ฮบ โหฒะ เหฌี่ย. เยีย เฒาะ เม่ย จิว ปุน ฑอง เม่ย เญย เมี่ยน, เซ จิว ปุน ฑอง เม่ย วั้ว เต๋ย ฟีลิสะเตีย เมี่ยน, ปุน นิ่น บัว เซว่ย เอ๋ย โหฒว, เหว่ย หฒุ นิ่น บัว ปวัด เม่ย โหฒว ปวั้ง เลี่ยว เญย สี่ ฯฒฯ ไฮ์ ไญ้ ไห่.

28เม่ย ไฮ์ หธ่อ ไม้ ปวั๊ง เฮญี้ยว ฯฒฯ เหธา อัดซีเลีย เมี่ยน ม่าย ปวั้ง เลี่ยว เญย สี่. เหฮยียน ลิ์ว หธ่อ ไฮ์ ไม้ ปวั๊ง เฮญี้ยว.

29เม่ย แอ๋ง ปุน เม่ย ปวั้ง เลี่ยว เญย เจ๊า ธั้ม เจี๊ยน ฝาว ฯฒฯ มี่ง เหฮยียน บาบีโลน เญย แซง-เอ๋ย เมี่ยน. ไม้ กุ๊น ฮนั้ง หน่าย, เม่ย หธ่อ ไม้ ปวั๊ง เฮญี้ยว.”

30“‘เฒี้ยว ทิน-ฮู่ง ก๊อง, “เม่ย เญย เฮญี้ยว เมา ไห่, กุ๊น ไม้ ตุ๊ กั้น ฯฒฯ โหฒว น้าย เต๋ย เหยียด ฒู้ง สี่ ฮนั้ง ไม้ ฮิ้ว ตุ๊ ไญ้ หม่าย ซิน เญย มเซียะ ตอน.

31เม่ย เยียม ติ้วๆ เจ๊า-คู้ หย่า เยียม นอมๆ ต้ม หฒวัง หฒ่าม โหฒว ฮลัง หฒั่ง เฒี่ยน เญย ต๋อง. มป่า เม่ย ไม้ ฮนั้ง หม่าย ซิน เญย มเซียะ ตอน เหว่ย หฒุ เม่ย ไม้ หล่ง หม่าย ซิน เญย จ๋า-ฒิ่น.

32“‘“เม่ย โหฒว ปวั้ง เลี่ยว เญย เอ๊า, หล่ง ไม้ ฮิ้ว เญย เมี่ยน ตี๊ หล่ง กั้น เญย โหฆ.

33เหยียด เกา มจั่ง ตอน ปุน ฒี่ง เหญ่ย หม่าย ซิน เญย มเซียะ ตอน. ต๋าว หฑวน เม่ย ปุน ฒี่ง เหญ่ย ต้าย ฮนั้ม เม่ย เญย เหยียด ฒู้ง เมี่ยน. เม่ย ฒู้ง หยัวะ เปยย ปูง เญย เมี่ยน ต้าย เหว่ย เหฮยียน เม่ย.

34เม่ย เหธา กั้น เต้า โหฒว ปวั้ง เลี่ยว เญย มเซียะ ตอน ไม้ ฟี่ ฮนั้ง, เหว่ย หฒุ ไม้ ม่าย หาย เต้า โท้ เม่ย หม่าย ซิน. ต๋าว หฑวน เม่ย กั้น ธี้ง เมี่ยน, ไม้ ม่าย หาย เต้า ปุน ญ่าน เม่ย, เม่ย หธีง ต้าย กั้น หญู่ง.

35“‘“เม่ย น้าย เต้า โหฒว ปวั้ง เลี่ยว เญย มเซียะ ตอน อ้า! เม่ย อ๋อย หฒุ หมวัง เฒี้ยว เญย หว่า.

36เฒี้ยว ทิน-ฮู่ง ฮนั้ง น้าย ก๊อง. เหว่ย หฒุ เม่ย ไจ๊ เหฑ่ง ลุย-โหว โหฒว ไญ้ เญย สี่ เหฮยียน เม่ย ฮนั้ม เญย เมี่ยน, ปุน เม่ย เญย แล่ง แก๊ง เญย ซิน ธ้วด, หย่า หลาย เม่ย เญย เหยียด ฒู้ง หมิ่ว-ฝัง, หย่า หลาย เม่ย ไต๋ เม่ย เญย ฝุเจว๊ย, ปุน ฑย้าม เหลี่ยว ธ้วด เหฒี่ย ปุน หมิ่ว-ฝัง,

37เยีย ฯฒฯ อ๋อย เฒาะ ต้ง เม่ย อะเฮน้ย หล่ง เญย เหยียด ฒู้ง ฮนั้ม เม่ย เญย เมี่ยน, เซ เม่ย ฮนั้ม เญย เหยียด ฒู้ง เหธา เม่ย ฑอง เญย เหยียด ฒู้ง. เยีย อ๋อย ปุน นิ่น บัว เยียม เปยย ปูง ต้าย กั๊บ ฒุ้น เหธา เม่ย เบ๊าะ จ๋า. เยีย ฯฒฯ ปุน เม่ย ฌัง ซิน เหว่ย ปุน นิ่น บัว ปวัด เหฑ่ง เม่ย แล่ง แก๊ง เญย ซิน.

38เยีย อ๋อย ตี่ง เม่ย เญย ฒุ์ย ฮนั้ง ตี่ง เหฮยียน โหฆ เญย มเซียะ ตอน เหธา ไต๋ เมี่ยน ปุน ฑย้าม เหลี่ยว ธ้วด วั้ว เต๋ย หฒุ ตี่ง ฒุ์ย นอ. เหว่ย เยีย เฉีย เจี์ย, หั่น เม่ย บัว เยีย อ๋อย ปุน เม่ย หฒุ ไต๋, ปุน ฑย้าม เหลี่ยว ธ้วด.

39เยีย อ๋อย เฒาะ เม่ย จิว ปุน เยียม ต้าย ฮนั้ม เม่ย วั้ว เต๋ย เมี่ยน เญย ปั์ว-เดี๊ย. นิ่น บัว ฯฒฯ แธะ เม่ย โหฒว ต้าย อัน หมิ่ว-ฝัง เญย ต๋อง หย่า ป่าย หว่าย เม่ย โหฒว ฮลัง หฒั่ง เฒี่ยน เญย ต๋อง. นิ่น บัว อ๋อย เธี้ย เหฑ่ง เม่ย เญย ลุย-โหว, เฒาะ เหฑ่ง เม่ย เหฑว่ย ไห่ เญย เซียว-เซ้ด, ปุน เม่ย ฌัง ซิน ธี้ ลี้ เญย.

40นิ่น บัว อ๋อย ต้อ เมี่ยน ธั้ม ต้าย เบ๊าะ เม่ย. นิ่น บัว ฯฒฯ หล่ง หละเปย๊ย ฒง เม่ย, หย่า หล่ง หฑุ ด๊าว ฮงะ เม่ย.

41นิ่น บัว อ๋อย ปู๋ง โต์ว ปั๊ว เม่ย เญย เปย๊า หย่า ตอง เจี๊ยน มเซียะ ตอน ธั้ม เญย ตี่ง เม่ย เญย ฒุ์ย. เยีย อ๋อย ปุน เม่ย ตี้ง เหฌี่ย, ไม้ โหฒว เหฮยียน เญย เจ๊า. เยียม น้าย มี่ง ไม้ ตุ๊ แอ๋ง ธี้ง เมี่ยน ต้าย เหธา เม่ย.

42เยีย ฯฒฯ ปุน เยีย เญย กะเฉีย ปยุ้ย ธ้วด โหฒว ปุน เม่ย เถา กะเฉีย ฟิว. เยีย หั่น เญย เจ๊า หย่า เล่ย ฆอย เม่ย อ๊ะ. เยีย ฯฒฯ เซ้ก เหฑียะ เญย, ไม้ แอ๋ง เฉีย เจี์ย.

43“‘“เหว่ย หฒุ เม่ย ไม้ จั๋ง หฮญัง-เจ๊ย หลุน เญย ฮนอย-เหญียะ, มป่า หล่ง น้าย เต๋ย เหยียด ฒู้ง สี่ ธัวะ เยีย เฉีย เจี์ย, เฒี้ยว ทิน-ฮู่ง ก๊อง, เหว่ย น้าย เยีย อ๋อย หฒิว เม่ย โหฒว เญย วิ่น ปุน เม่ย. เม่ย โหฒว ลิ์ว น้าย เต๋ย เหยียด ฒู้ง กั้ม เฑี้ย เญย สี่ เม่ย แอ๋ง จา โหฒว ปวั้ง เลี่ยว เญย สี่ ไม้ เฒ์ย?”

44“‘เยลูซาเลม อ้า! ตะฟ่าน ก๊อง หว่า-เป๊ย เญย เมี่ยน อ๋อย หล่ง น้าย ติ้ว หว่า-เป๊ย ก๊อง เม่ย. นิ่น บัว ก๊อง, “มา ฮนั้ง หาย นอ, เซียะ ฮนั้ง วั้ว นอ.”

45เม่ย โหฒว เม่ย เญย มา เญย เธียน เซียะ. เม่ย เญย มา หมั่ง เผีย นิ่น เญย โหฆ เหธา ฝุเจว๊ย. เม่ย หย่า เป๋น เม่ย เญย ต่อ เหธา เฑี์ย เญย เธียน มั์ว-ต่อย. นิ่น บัว หย่า ฑอง นิ่น บัว เญย โหฆ เหธา ฝุเจว๊ย. เม่ย เญย มา โหฒว ฮิดไท เมี่ยน, เม่ย เญย เตีย เซ อาโมไล เมี่ยน.

46เม่ย เญย ต่อ เซ สะมาเลีย. นิ่น เหธา นิ่น เญย เซียะ บัว เยียม เม่ย เญย ป๊ะ ปูง แหมง. เม่ย เญย เฑี์ย เซ โสโดม. นิ่น เหธา นิ่น เญย เซียะ เยียม เม่ย เญย น่าม ปูง แหมง.

47เม่ย ไม้ ตาน กัน นิ่น บัว เญย เจ๊า ยั่ง, หย่า หฒวด นิ่น บัว กั้ม เฑี้ย เญย สี่. ไม้ เล่า เหยียด เต๋ย เม่ย โหฒว เญย เหยียด ฒู้ง เก้า หว่าย เจี๋ย นิ่น บัว โหฒว เญย.’

48เฒี้ยว ทิน-ฮู่ง ก๊อง, ‘เยีย เฒี้ยง เจี๊ยน เยีย กั้น เญย แหม่ง ก๊อง, “เม่ย เญย เฑี์ย โสโดม เหธา นิ่น เญย เซียะ ไม้ โหฒว ฮนั้ง เม่ย เหธา เม่ย เญย เซียะ โหฒว เญย สี่.

49“‘“หมั่ง ม่าะ! เม่ย เญย เฑี์ย, โสโดม, เญย ฒุ์ย, เซ นิ่น เหธา นิ่น เญย เซียะ บัว โหฒว เหมา, ม่าย ล่าง หฒิ หญั่น เป๊ว, ฒู้ง ม่าย เหฒ่ง. นิ่น บัว คู่ เยียม คู่ หญั่น หย่า ไม้ เถง จ่ม โค้ว, ตั๋ง-ต๋น เญย เมี่ยน.

50นิ่น บัว เธง-โฮล, เยียม เยีย เญย หฑะเฮมียน โหฒว กั้ม เฑี้ย เญย สี่. เยีย ปวัด ฯฒฯ โหฒว ปุน นิ่น บัว หฒุด หมี่ อ๊ะ.

51สะมาเลีย ป์าม ฒุ์ย ไม้ ด่ง เม่ย เหยียด ป่วน. เม่ย โหฒว กั้ม เฑี้ย เญย สี่ เก้า ธั้ม นิ่น บัว. หลาย เม่ย โหฒว เหยียด ฒู้ง กั้ม เฑี้ย เญย สี่, เป๊ย เม่ย เญย ต่อ เหธา เฑี์ย โหฒว เญย, ปวัด ฮนั้ง นิ่น บัว โหฒว ตุ๊ หอบ.

52เม่ย อ๋อย หฒุ เตี๊ย ไญ้ เหว่ย หฒุ เม่ย ปุน เม่ย เญย ต่อ เหธา เฑี์ย หฒุ ตี่ง ฒุ์ย เก้า เฮง. หลาย เม่ย ป์าม ฒุ์ย โหฒว กั้ม เฑี้ย เญย สี่ เก้า ธั้ม นิ่น บัว, นิ่น บัว ฯฒฯ โหฒว เก้า หอบ เม่ย. เหว่ย น้าย เม่ย อ๋อย หฒุ ป่าย เฮมียน เตี๊ย ไญ้, เหว่ย หฒุ เม่ย ปุน เม่ย เญย ต่อ เหธา เฑี์ย ปวัด ฮนั้ง โหฒว ตุ๊ หอบ.

53“‘มป่า เยีย อ๋อย ปุน นิ่น บัว แอ๋ง ตุ๊ หลง ฮนั้ง โล์ วั้ว นอ, เซ โสโดม เหธา นิ่น เญย เซียะ, สะมาเลีย เหธา นิ่น เญย เซียะ. เยีย หย่า อ๋อย ปุน เม่ย เหธา เม่ย เญย เซียะ เยียม นิ่น บัว บุด๋ง ตุ๊ หลง ฮนั้ง โล์,

54เหว่ย ปุน เม่ย อ๋อย หฒุ เตี๊ย เจี๊ยน หฒุ ป่าย เฮมียน หย่า เหว่ย เม่ย โหฒว เญย เหยียด ฒู้ง เตี๊ย ไญ้, ฯฒฯ ออน นิ่น บัว เญย เฮญี้ยว.

55เม่ย เญย ต่อ เหธา เม่ย เญย เฑี์ย, เซ โสโดม เหธา นิ่น เญย เซียะ อ๋อย ฮนั้ง โล์ วั้ว นอ. สะมาเลีย เหธา นิ่น เญย เซียะ หย่า อ๋อย ฮนั้ง โล์ วั้ว นอ. เม่ย กั้น เหธา เม่ย เญย เซียะ หย่า อ๋อย หฑวน ต้าย ฮนั้ง โล์ วั้ว นอ.

56เม่ย เธง-โฮล เญย ฮนอย-เหญียะ เม่ย เญย ฑุ่ย ก๊อง จั๊ด เม่ย เญย เฑี์ย, โสโดม,

57เซ ต๋อย เม่ย โหฒว เญย เอ๊าะ สี่ ไม้ แก้ง ธ้วด ย่าง เญย เฒี่ยง โห่. อี้ หฒั่น เม่ย ฮนั้ง นิ่น นอ หฒุ เอโดม เหธา เว่ย ก๋อม เญย เมี่ยน เฆ่ม. ฟีลิสะเตีย เมี่ยน เญย เซียะ เหธา เว่ย ก๋อม วั้ว เต๋ย หย่า หมั่ง เผีย.’

58เฒี้ยว ก๊อง, เม่ย อ๋อย หฒุ เหว่ย เม่ย โหฒว น้าย เต๋ย ไญ้ ไห่, กั้ม เฑี้ย ไห่ เญย สี่ ดาม-ตอง.

59“เฒี้ยว ทิน-ฮู่ง ฮนั้ง น้าย ก๊อง, ‘เม่ย หมั่ง เผีย โฮ้ว เญย หว่า หย่า ป์าม เหลียบ เญย แหง่ง หว่า. เยีย ฯฒฯ โหฒว ปุน เม่ย ฮนั้ง เม่ย โหฒว วั้ว นอ.

60มป่า เยีย อ๋อย จั๋ง เม่ย หฮญัง-เจ๊ย หลุน เญย เฒี่ยง โห่ เยีย เหธา เม่ย เหลียบ เญย แหง่ง หว่า. เยีย หย่า อ๋อย เหธา เม่ย เหลียบ เจี์ย เหยียด ลิ์ว เญย แหง่ง หว่า.

61เม่ย ตุ๊ เม่ย เญย ต่อ เหธา เม่ย เญย เฑี์ย หฑวน ต้าย เญย เฒี่ยง โห่ เม่ย ฯฒฯ จั๋ง เม่ย โหฒว เญย เจ๊า. เยีย อ๋อย เฒาะ นิ่น บัว จิว ปุน เม่ย, เป๋น เม่ย เญย เซียะ, มป่า ไม้ เฒ์ย หฒิว เยีย ฒิ่น ด่าง เหธา เม่ย เหลียบ เจี๋ย เญย แหง่ง หว่า.

62เยีย อ๋อย เหธา เม่ย เหลียบ เจี์ย เยีย เญย แหง่ง หว่า, เม่ย ฯฒฯ ฮิ้ว ตุ๊ เยีย เซ เฒี้ยว.

63เยีย กวั่ง เม่ย โหฒว เญย เหยียด ฒู้ง สี่ วั้ว หฒั่น เม่ย ฯฒฯ จั๋ง หย่า ไญ้. หลาย เม่ย ไญ้ เม่ย เหยียด ลิ์ว ไม้ หมอง ฑุ่ย ก๊อง อ๊ะ.’ น้าย เซ เฒี้ยว ทิน-ฮู่ง ก๊อง เญย หว่า.”

← Chapter 15 Jump to: Chapter 17 →