Ezekiel 27

Mien Bible (Thai Script) © Thailand Bible Society, 2007

← Chapter 26 Jump to: Chapter 28 →

1เยีย แอ๋ง ตุ๊ ฒิบ เฒี้ยว เญย หว่า ก๊อง,

2“ป้าม เมี่ยน อ้า! เม่ย อ๋อย หฒุ เหว่ย ไทละ ป๋าว ติ้ว หน่าน ฒี่ง ฑูง.

3ไทละ เยียม เปียะ ค้อย เญย ต๋อง หย่า ม์าย หม่าย ปุน เยียม ธั้ม-นอม ค้อย-เฮลน เญย เหฒีย ฝีง เมี่ยน. อ๋อย หฒุ ก๊อง บั๋ว ไทละ, ‘เฒี้ยว ทิน-ฮู่ง ฮนั้ง น้าย ก๊อง, “‘“โอ ไทละ อ่า, เม่ย เธง กั้น ก๊อง, ‘เยีย เหฑว่ย เถา ต้าว อ๊ะ.’

4เม่ย เญย กั๊บ-จ๋าย เยียม ค้อย บุด๋ง. เหธย เม่ย ต้าย วั้ว เต๋ย ปุน เม่ย เหฑว่ย เถา ต้าว อ๊ะ.

5นิ่น บัว หล่ง เสนี เญย ฒ่ง เดี๋ยง โหฒว เม่ย เญย เหยียด ฒู้ง เดี๋ยง-เป๊น. นิ่น บัว หล่ง ติ้ว เลบานอน เญย สีดา ฒ่ง เดี๋ยง โหฒว เม่ย เญย ธอง เดีย-บวั้ง เญย เดี้ยว.

6นิ่น บัว หล่ง บาซาน เญย ต้ม บะอง เฒวย เดี๋ยง โหฒว เม่ย เญย ฑั้ง-เฒ่ย. นิ่น บัว หล่ง ไซปัด ค้อย-โฑว- เฮลน เญย ฒ่ง เดี๋ยง ติว ต้าย, แอ๋ง เฒาะ ฒ์าง-ญ่า ฟับ เจี๊ยน โหฒว เม่ย เญย ฑั้ง-พ่าง.

7เม่ย เญย เดีย-บวั้ง หล่ง อียิบ ต้าย เญย ล่าม่า เดีย-หม่วน หธง เจี๊ยน เปี้ยง, หล่ง ต๋อง เม่ย เญย เก้. เม่ย แบะ กู้ หงว่าย เญย เดีย, เซ เยียม เอลีเซอา ค้อย-เฮลน เญย เดีย-บั๊ว เดีย-หลัวะ โหฒว ต้าย.

8ไซดอน เหธา อานวัด เมี่ยน โหฒว เม่ย เญย แฑง ฑั้ง เมี่ยน. โอ ไทละ อ่า, เม่ย เญย หฒั่ง เมี่ยน เยียม เม่ย เญย ฑั้ง โหฒว เม่ย เญย ฑั้ง-เจียน.

9เกบาน เญย เมี่ยน โก๋ เหธา ม่าย ปั์ว-เต้า เญย หฒั่ง เมี่ยน เยียม เม่ย กะญั์ว เบี๊ย เม่ย เญย ฑั้ง-กั๊บ เญย ต๋อง. ค้อย เญย เหยียด ฒู้ง ฑั้ง เหธา นิ่น บัว เญย ฑั้ง-โน่ว ต้าย เยียม เม่ย เญย กะเฮลน เหธา เม่ย โหฒว แซง-เอ๋ย เหยี่ยน หัว.

10“‘“เปเซีย เมี่ยน, ลูเด เมี่ยน, เหธา พู้ด เมี่ยน เยียม เม่ย เญย จุน-แปง กวั้น โหฒว เม่ย เญย เบ๊าะ จ๋า แปง. นิ่น บัว เฒาะ นิ่น บัว เญย ท้อง-ป้าย เหธา เฮลียะ-หมั่ว ขวัง เจี๊ยน เม่ย เญย ฒี่ง หลาด, นิ่น บัว ปุน เม่ย ตุ๊ ฌัง-หล่าง.

11อานวัด เมี่ยน เหธา เฮเหลก เมี่ยน เยียม ก๋อม เม่ย เญย ฒี่ง หลาด กู้ หงว่าย. กามัด เมี่ยน หย่า เยียม เม่ย เญย ล่าว. นิ่น บัว เฒาะ นิ่น บัว เญย ท้อง-ป้าย ขวัง เจี๊ยน เว่ย ก๋อม เม่ย เญย ฒี่ง หลาด. นิ่น บัว ปุน เม่ย เหฑว่ย เถา ต้าว.

12“‘“ทานซิด เมี่ยน ต้าย เหธา เม่ย ม์าย หม่าย เหว่ย หฒุ เม่ย ม่าย หญู่งๆ กะน้าย ธั้ม. นิ่น บัว หล่ง ญ่าน, เฮลียะ, ยั่ง เถี่ย เหธา จู์ง เถง เม่ย เหยี่ยน หัว.

13“‘“ยาวาน เมี่ยน, ทูบัน เมี่ยน เหธา เมเซ้ก เมี่ยน เหธา เม่ย ทิ้ว กะน้าย. นิ่น บัว เฒาะ เมี่ยน เหธา ต้ง ซิ จา-สี่ เหยี่ยน เม่ย เญย หัว.

14“‘“เบดโทกานมา เมี่ยน หล่ง ม์า เหธา เบ๊าะ จ๋า เญย ม์า เหธา ล่อ เหยี่ยน เม่ย เญย หัว.

15“‘“เดดาน เมี่ยน เหธา เม่ย ม์าย หม่าย. ค้อย-เฮลน เญย ต๋อง ธั้ม เญย เป๋น เม่ย ม์าย หม่าย เญย เฮย. นิ่น บัว ต้อ ฒ์าง-ญ่า เหธา แหง่ง เญย เดี๋ยง-เจี๊ยะ เหยี่ยน หัว.

16“‘“ซีเลีย เมี่ยน มี่งๆ ต้ายๆ เหธา เม่ย ม์าย หม่าย, เหว่ย หฒุ เม่ย ม่าย หัว ธั้ม. นิ่น บัว หล่ง เดี้ยม แมง, ฑัง เญย หละเปย๊ย-จ๋าย เหธา เดีย-หลัวะ, หล่ง หธง เจี๊ยน เปี้ยง เญย เดีย, ล่าม่า เดีย-หม่วน, เยียม ค้อย จ๋าย เญย หละเปย๊ย เหธา ซิ เญย หละเปย๊ย-จ๋าย เหยี่ยน เม่ย เญย หัว.

17“‘“ยูดา เมี่ยน เหธา อิสะลาเอน เมี่ยน เหธา เม่ย โหฒว แซง-เอ๋ย. นิ่น บัว หล่ง มินนิด เญย เบย้า วิด, กะลั้น เปี๊ยว, เมว์ย-ต้อง, กะลั้น โย่ว เหธา เดีย-ดาง เหยี่ยน เม่ย เญย หัว.

18“‘“ดามัดกัด เมี่ยน เหธา เม่ย โหฒว แซง-เอ๋ย, เหว่ย หฒุ เม่ย ม่าย ม์าย หม่าย เญย กะน้าย ธั้ม, หญู่งๆ ม่าย ฑ่อย. นิ่น บัว หล่ง เฮนโบน ต้าย เญย อะหงุ่น ติ๊ว เหธา ปะกี ยู่ง แปะ เญย เปยย เหยี่ยน เม่ย เญย หัว.

19“‘“นิ่น บัว ต้อ อะหงุ่น ติ๊ว เยียม อุซาน ต้าย เหยี่ยน เม่ย เญย กะน้าย. นิ่น บัว หล่ง โต๋ เหฒียง เญย เฮลียะ เหธา กานบุน เหธา ฒ่า ฆาน เหยี่ยน เม่ย เญย หัว.

20“‘“เดดาน เมี่ยน หล่ง ติ่ม ม์า-เก้ ออน เญย สวัง เหยี่ยน เม่ย เญย หัว.

21“‘“อาละเบีย เมี่ยน เหธา เคดา เญย เหยียด ฒู้ง โหฒว โฮล เญย เมี่ยน, หฒั่นๆ เหธา เม่ย โหฒว แซง-เอ๋ย. นิ่น บัว หล่ง ปะกี ยู่ง ตอน, ปะกี ยู่ง โก๊ว เหธา ยู่ง เหยี่ยน เม่ย เญย หัว.

22“‘“เชบา เมี่ยน เหธา ลาอามา เมี่ยน เหธา เม่ย โหฒว แซง-เอ๋ย. นิ่น บัว หล่ง เหยียด ฒู้ง เก้า หลง เจี๋ย เญย หลาบ หลิ่ว, หญู่งๆ หละเปย๊ย-จ๋าย เหธา เจียม เหยี่ยน เม่ย เญย หัว.

23“‘“ฮาลาน เมี่ยน, คานเน เหธา เอเดน เมี่ยน, เชบา เญย แซง-เอ๋ย เมี่ยน, อัดซู เหธา คินม้าด เมี่ยน เหธา เม่ย ม์าย หม่าย.

24น้าย เต๋ย ต๋อง เญย เมี่ยน หล่ง เก้า หลง, เก้า เหฑว่ย เจี๋ย เญย ลุย-โหว, หล่ง เดีย-บั๊ว เหธา หธง เจี๊ยน เปี้ยง เญย ลุย-โหว, หล่ง เหฒีย หญู่ง เซ้ด โหฒว ต้าย ติ่ม เปย๊า เญย เดีย, หย่า หล่ง กิ๊ด ต้าย เหฒียด เญย ฮลาง เหธา เม่ย ม์าย หม่าย.

25“‘“ทานซิด เญย ฑั้ง เถง เม่ย ทอ เม่ย เญย หัว. ฮนั้ง หน่าย เม่ย เยียม ค้อย กะญั์ว ทอ กะน้าย เฮนี้ย, ฒู้ง ปวั๊ง ฑั้ง.

26แฑง ฑั้ง เญย เมี่ยน ต้อ เม่ย มี่ง ค้อย โด เญย ต๋อง. ตง ปูง เญย หฑยาว เยียม ค้อย กะญั์ว ปุน เม่ย ฮู้ เหฑ่ง.

27เม่ย เญย ฒิ่น ฒ่อย, เม่ย เญย หัว, เม่ย ม์าย หม่าย เญย กะน้าย, เม่ย เญย ฑั้ง-เจียน ฑั้ง-โน่ว, ฑั้ง เญย เดี๋ยง-หฒั่ง, เม่ย เญย แซง-เอ๋ย เมี่ยน เหธา เยียม เม่ย กะญั์ว เญย เบ๊าะ จ๋า แปง เหธา เหยียด ฒู้ง เมี่ยน, ต้ง เม่ย หฒุ เบ๊าะ หว่าย วั้ว ฮนอย, เหยียด ฒู้ง ฯฒฯ เฒ่ม เหฌี่ย ค้อย.

28ฑั้ง-เจียน เห่ว ธ้วด เหฌียว แหม่ง เญย เฉีย, เยียม วั้ว เบี๋ยน ฒู้ง ดั่น ต์ง.

29ตะฟ่าน แฑง ฑั้ง เมี่ยน ธ้วด นิ่น บัว เญย ฑั้ง. เยียม ค้อย เญย ฑั้ง-โน่ว เหธา เหยียด ฒู้ง ฑั้ง-เจียน ต้าย โซ้ว เจี๊ยน วั้ว เบี๋ยน.

30นิ่น บัว ปู๋ง-ซีง ปู๋ง-เฉีย เฮญี้ยว มุน เญย เฑ่า เญี้ยม เม่ย. นิ่น บัว ฮ์า เนีย-บูง อัน นิ่น บัว เญย มฆ้อง, ฒู้ง หฌัง วั้ว ซ้าย-ดุย.

31เหว่ย เม่ย นิ่น บัว เถย มฆ้อง ฌัง เหฑ่ง, หย่า ฒุ เจี๊ยน ล่าม่า เดีย-โธว. นิ่น บัว เฮญี้ยว มุน เจี๊ยน ปู๋ง-ซีง ปู๋ง-เฉีย เญย เญี้ยม ตุ๊ โค้ว ไห่, บะฑิว ฒู้ง ไฮ่ บ๋าย.

32นิ่น บัว เฑ่า เญี้ยม เม่ย เญย เฒี่ยง โห่ นิ่น บัว เหว่ย เม่ย ป๋าว ติ้ว หน่าน ฒี่ง ฑูง ก๊อง, ‘ม่าย หาย เต้า ฮนั้ง ไทละ เยียม ค้อย กะญั์ว หฒุ เหมียด?’

33เม่ย เยียม ค้อย กัน ฑั้ง ฝูง ธ้วด ม์าย หม่าย เญย กะน้าย. เม่ย ปุน เหฒีย กั๊วะ เมี่ยน ปวั๊ง เฮญี้ยว. เม่ย เญย ฒิ่น ฒ่อย เหธา หัว ธั้ม ไห่ ปุน ลู่ง เดี๊ย เญย ฮู่ง เตี๋ย ปุ๊ด ฒ่อย.

34อี้ หฒั่น เม่ย เยียม ค้อย โด เญย ต๋อง หฒุ ค้อย เบ๊าะ ฮู้ เหฑ่ง. เม่ย เญย หัว เหธา เยียม ฑั้ง เญย เหยียด ฒู้ง เมี่ยน เหธา เจี๊ยน เม่ย เฒ่ม เหฌี่ย ค้อย.

35เยียม ค้อย-เฮลน เญย หฒวัง เมี่ยน เหว่ย เม่ย กั้ม เหฑีย ไห่. นิ่น บัว เญย ฮู่ง เตี๋ย กั้ม เหฑีย เกา, เฮมียน ฒู้ง เบี่ยน เหฑ่ง.

36นอมๆ กั๊วะ เญย แซง-เอ๋ย เมี่ยน ธ้วด เฉีย ปุน ธีง อะเฮน้ย เม่ย ปวั้ง หฒุ โค้ว. เม่ย เญย เซ้ด เมว์ย กั้ม เหฑีย! ไห่, เหยียด ลิ์ว ไม้ ม่าย เม่ย อ๊ะ.”’”

← Chapter 26 Jump to: Chapter 28 →