Ezekiel 23

Mien Bible (Thai Script) © Thailand Bible Society, 2007

1เยีย แอ๋ง ตุ๊ ฒิบ เฒี้ยว เญย หว่า ก๊อง,

2“ป้าม เมี่ยน อ้า! ม่าย อี เต้า มเซียะ ตอน, เป๋น อี มั์ว-เซียะ จวั่ง มา.

3นิ่น บัว เยียม อียิบ หม่าย ซิน. เยียม หฮญัง-เจ๊ย หลุน เญย เฒี่ยง โห่ นิ่น บัว ฒู้ง หม่าย ซิน อ๊ะ. เยียม หน่าย ม่าย เมี่ยน ชัม นิ่น บัว เญย หละค้วด. เซียะ-หลุน เญย เฒี่ยง โห่ เมี่ยน มัวะ นิ่น บัว เญย หญอ.

4ต่อ เญย บั๋ว เห่ว โอโฮลา, เฑี์ย เญย บั๋ว เห่ว โอโฮลีบา. นิ่น บัว อี เต้า ต้าย เป๋น เยีย เญย. อี เต้า ฒู้ง ยู์ง ตอน ยู์ง เซียะ. ก๊อง เถา นิ่น บัว เญย บั๋ว, โอโฮลา เป๊ย สะมาเลีย ฒี่ง, โอโฮลีบา เป๊ย เยลูซาเลม ฒี่ง.

5“โอโฮลา เป๋น เยีย เญย วั้ว หฒั่น นิ่น โหฒว ปวั้ง เลี่ยว เญย สี่. นิ่น อ๋อย ไห่ ฮนั้ม นิ่น วั้ว เต๋ย อัดซีเลีย เมี่ยน,

6เซ ฒุ ลุย-โหว หลัวะ เบ๊าะ จ๋า เฮ้น เญย แปง เหธา โหฒว แซ้ง-เฒี้ยว เหธา ต้ม แปง-เปย๊ย, เหยียด ฒู้ง หฮญัง-เจ๊ย หลุน, เซ เมี่ยน อ๋อย เญย เมี่ยน, เหธา เก้ ม์า เญย แปง.

7โอโฮลา ฯฒฯ เหฮยียน นิ่น บัว, เหฮยียน เหยียด ฒู้ง เก้า หลง เจี๋ย เญย อัดซีเลีย เมี่ยน. นิ่น หล่ง ต้ง นิ่น อ๋อย ไห่ น้าย เต๋ย เมี่ยน เญย เหยียด ฒู้ง หมิ่ว-ฝัง ฯฒฯ ปุน กั้น ม่าย หวุย.

8นิ่น ไม้ กวั่ง นิ่น เยียม อียิบ เญย เฒี่ยง โห่ หม่าย ซิน เญย เจ๊า, เหว่ย หฒุ นิ่น หฮญัง-เจ๊ย หลุน วั้ว หฒั่น ม่าย เมี่ยน เหธา นิ่น เปว๋ย หย่า มัวะ นิ่น เญย หญอ หย่า หฒิว นิ่น บัว หั่น เญย เจ๊า เหฮยียน.

9“เหว่ย น้าย เยีย เฒาะ นิ่น จิว ปุน ฮนั้ม นิ่น วั้ว เต๋ย เมี่ยน เญย ปั์ว-เดี๊ย, เซ จิว ปุน อัดซีเลีย เมี่ยน, ต้ง นิ่น อ๋อย ไห่ เญย เมี่ยน.

10น้าย เต๋ย เมี่ยน เธี้ย ฌัง นิ่น เญย ลุย-โหว, ธ้าง นิ่น เญย น่าม โญ์ว มี่ง, หย่า หล่ง หฑุ ด๊าว ไต๋ นิ่น. นิ่น หฒุ ตี่ง ลิ์ว ฒุ์ย, ฆะฮ้า เยียม มเซียะ ตอน บุด๋ง นิ่น เป๋น โก๊ว ก๊อง.

11“นิ่น เญย เฑี์ย, โอโฮลีบา, ปวัด ลิ์ว, มป่า นิ่น หธ่อ โหฒว เก้า หว่าย เจี๋ย นิ่น เญย ต่อ อ๊ะ. เยียม นิ่น ปะหละ แซง เหฮยียน เญย เจ๊า นิ่น ฒู้ง โหฒว เจี๋ย นิ่น เญย ต่อ.

12นิ่น อ๋อย ไห่ อัดซีเลีย เมี่ยน, เซ แซ้ง-เฒี้ยว, ต้ม แปง-เปย๊ย, ฒุ ลุย-โหว เหฑว่ย เบ๊าะ จ๋า เฮ้น เญย แปง, เหธา เก้ ม์า เญย แปง, เหยียด ฒู้ง หฮญัง-เจ๊ย หลุน, เซ เมี่ยน อ๋อย เญย เมี่ยน.

13เยีย หย่า ปวัด นิ่น หฒุ ม่าย หวุย หมี่ อ๊ะ. นิ่น บัว อี มั์ว-เซียะ จวั่ง ติ้ว เจ๊า ยั่ง.

14“มป่า โอโฮลีบา จา โหฒว นิ่น เหฮยียน เญย เจ๊า ธั้ม เจี๊ยน ฝาว. นิ่น ปวัด เมี่ยน เญย ฝัง ว์า เจี๊ยน วั้ว หฌ่ง, เซ หล่ง เซ้ด ซิ ว์า เคนเดีย เมี่ยน เญย ฝัง.

15จ๊าย ไซ เจี๊ยน โหว-ฮลาง, มฆ้อง ญัด เจี๊ยน เดีย แอ๋ง แฮนง เหฌี่ย. เต้าๆ ฮนั้ง แปง-เปย๊ย. ฝัง เฒ้ย ปวัด ฮนั้ง บาบีโลน เมี่ยน, เซ เคนเดีย เต่ย-ปูง เญย เมี่ยน.

16โอโฮลีบา ปวัด ลิ์ว, ไฮ์ อ๋อย ไห่ นิ่น บัว, ฯฒฯ พ้าย เมี่ยน มี่ง เคนเดีย ล์อ นิ่น บัว.

17บาบีโลน เมี่ยน ฯฒฯ ต้าย เหธา นิ่น เปว๋ย, หฒิว นิ่น บัว หั่น เญย เจ๊า โหฒว, ฯฒฯ ปุน นิ่น ม่าย หวุย. หฒุ ม่าย หวุย ลิ์ว, นิ่น โหยว หมี่ อ๊ะ, ไม้ หมั่ง นิ่น บัว อ๊ะ.

18นิ่น เหฮยียน เญย เจ๊า นิ่น โหฒว ตุ๊ แหฆ่ง, เซว่ย เมี่ยน หมั่ง นิ่น แล่ง แก๊ง เญย ซิน. เยีย ฯฒฯ โหยว นิ่น ฮนั้ง ฒิ่น ด่าง เยีย โหยว นิ่น เญย ต่อ นอ.

19มป่า นิ่น หธ่อ จา เหฮยียน ธั้ม เจี๊ยน ฝาว, จั๋ง เถา นิ่น หฮญัง-เจ๊ย หลุน เญย เฒี่ยง โห่ เยียม อียิบ เต่ย-ปูง หม่าย ซิน วั้ว หฒั่น อ๊ะ.

20เยียม วั้ว นิ่น อ๋อย ไห่ ฮนั้ม นิ่น วั้ว เต๋ย. นิ่น บัว เหฮยียน เญย เจ๊า เฮ้น ฮนั้ง ล่อ โก๊ว ม์า-โก๊ว แซง นอ.

21ฮนั้ง หน่าย เม่ย ไฮ์ เฝย ตุ๊ ฮนั้ง เม่ย หฮญัง-เจ๊ย หลุน เญย เฒี่ยง โห่ เม่ย เยียม อียิบ หม่าย ซิน. ม่าย เมี่ยน ชัม เม่ย เญย หละค้วด. เซียะ-หลุน เญย เฒี่ยง โห่ หย่า มัวะ เม่ย เญย หญอ.

22“โอโฮลีบา อ้า! เหว่ย น้าย เฒี้ยว ทิน-ฮู่ง ก๊อง, ‘เยีย อ๋อย ปุน ฒิ่น ด่าง ฮนั้ม เม่ย มป่า ฆะฮ้า เม่ย โหยว วั้ว เต๋ย เมี่ยน ต้าย เบ๊าะ เม่ย. เยีย อ๋อย ต้อ นิ่น บัว เยียม เปยย ปูง ต้าย เหธา เม่ย ต๋อย-เตก.

23เยีย ต้อ บาบีโลน เมี่ยน, เคนเดีย เญย หฒวัง เมี่ยน, เปโขด เมี่ยน, โชอา เมี่ยน, โคอา เมี่ยน, เลี่ยม อัดซีเลีย เญย หฒวัง เมี่ยน, เซ หฮญัง-เจ๊ย หลุน, ต้ง เมี่ยน อ๋อย เญย เมี่ยน. เหยียด ฒู้ง เป๋น แซ้ง-เฒี้ยว เหธา ต้ม แปง-เปย๊ย ฟิ้ว-แปง-เปย๊ย เหธา เบ๊าะ จ๋า เฮ้น เญย แปง, เหยียด ฒู้ง เก้ เจี๊ยน ม์า.

24นิ่น บัว ฯฒฯ เยียม ป๊ะ ปูง ต้าย เหธา เม่ย เบ๊าะ จ๋า, หย่า ต้อ เจี๊ยน เบ๊าะ จ๋า เญย ม์า-เธีย, ทอ กะน้าย เญย เธีย, เหธา เหฒีย ฝีง เมี่ยน ธั้ม. นิ่น บัว ด๋ง เจี๊ยน เฮลียะ-หมั่ว, นั้น เจี๊ยน ต้ม ท้อง-ป้าย ฟิ้ว-ท้อง-ป้าย ไบ้ เจี๊ยน เยียม เม่ย เญย เปยย ปูง เบ๊าะ เม่ย. เยีย อ๋อย เฒาะ เม่ย จิว ปุน นิ่น บัว เซี้ยม, นิ่น บัว ฯฒฯ หฒิว นิ่น บัว เซี้ยม เญย เล์ย ตี่ง เม่ย เญย ฒุ์ย.

25เยีย โน์ว ไห่ เม่ย, อ๋อย ปุน นิ่น บัว เฉีย เจี์ย เจี๊ยน โหฒว ปุน เม่ย. นิ่น บัว อ๋อย ก๊าด เม่ย เญย บะฒอง เหธา เม่ย เญย มน่อม กวั่ง. เยียม เม่ย เหฒ่ง เหฌี่ย เญย เมี่ยน อ๋อย หฒุ หฑุ ด๊าว ไต๋. นิ่น บัว อ๋อย เฒาะ เม่ย เญย ตอน เหธา เม่ย เญย เซียะ. เลี่ยว เหฌี่ย เญย เมี่ยน อ๋อย หฒุ โต์ว ปั๊ว ชุย.

26นิ่น บัว อ๋อย เธี้ย เหฑ่ง เม่ย เญย ลุย-โหว หย่า เฒาะ เม่ย เหฑว่ย ไห่ เญย เซียว-เซ้ด.

27ฮนั้ง หน่าย เยีย ฯฒฯ ปุน เม่ย เยียม อียิบ ต้อ ต้าย วั้ว เต๋ย เหฮยียน เญย, หม่าย ซิน เญย เจ๊า ตั๋ง, เหว่ย ปุน เม่ย ไม้ แอ๋ง เธา เฮมียน หมั่ง อียิบ เมี่ยน. เยียม น้าย มี่ง หย่า ไม้ จั๋ง นิ่น บัว.’

28“เหว่ย หฒุ เฒี้ยว ทิน-ฮู่ง ก๊อง, ‘เยีย อ๋อย เฒาะ เม่ย จิว ปุน เยียม เม่ย ฑอง วั้ว เต๋ย เมี่ยน เญย ปั์ว-เดี๊ย, เซ เม่ย โหยว วั้ว เต๋ย เมี่ยน เญย ปั์ว-เดี๊ย.

29นิ่น บัว ฯฒฯ ฑอง เจี๊ยน โหฒว ปุน เม่ย, เฒาะ เหฑ่ง เม่ย ล่าว หลุ่ย ตุ๊ ต้าย เญย เหยียด ฒู้ง กะน้าย ปุน เม่ย ฌัง ซิน แล่ง แก๊ง เญย เยียม. หม่าย ซิน เหธา ปวั้ง เลี่ยว เญย เจ๊า ฯฒฯ ธ้วด ต้าย แหฆ่ง เญย.

30เม่ย เหฮยียน เญย, หม่าย ซิน เญย เจ๊า ปุน เม่ย หฒุ น้าย เต๋ย สี่, เหว่ย หฒุ เม่ย หม่าย ซิน ปุน หม่าน กั๊วะ เมี่ยน, หย่า หลาย นิ่น บัว เญย หมิ่ว-ฝัง ปุน กั้น ม่าย หวุย อ๊ะ.

31เม่ย ยั่ง เม่ย เญย ต่อ ยั่ง เญย เจ๊า. เหว่ย น้าย เยีย เฒาะ นิ่น เญย ฒ้าน จิว ปุน เยียม เม่ย เญย ปั์ว.’

32“เฒี้ยว ทิน-ฮู่ง ฮนั้ง น้าย ก๊อง, “‘เม่ย อ๋อย หฒุ ฮบ เม่ย เญย ต่อ ฮบ เญย ฒ้าน. น้าย นอม ฒ้าน โหย่ว โด โหย่ว โฮล. เม่ย อ๋อย หฒุ เมี่ยน จั๊ด, หฒุ เมี่ยน ฮว้วด, เหว่ย หฒุ น้าย นอม ฒ้าน ตั๊บ ตุ๊ ธั้ม.

33เม่ย ฒู้ง ฮบ ฆวิน หย่า หฒุ เฑ่า โค้ว, น้าย นอม ฒ้าน ปุน เมี่ยน กั้ม เหฑีย หย่า หฒุ ป่าย ฮวาง. เซ เม่ย เญย ต่อ, สะมาเลีย, เญย ฒ้าน.

34เม่ย อ๋อย หฒุ ฮบ น้าย นอม ฒ้าน หย่า ฮบ เถา เหฑ่ง. เฒาะ ฒ้าน เบ๊าะ ฮู้, หล่ง เหยียด เหฮลง เหยียด เหฮลง เกว๊ด กั้น เญย หญอ.’ น้าย เซ เยีย, เฒี้ยว ทิน-ฮู่ง, ก๊อง ลิ์ว อ๊ะ.

35“เหว่ย น้าย เฒี้ยว ทิน-ฮู่ง ก๊อง, ‘เหว่ย หฒุ เม่ย หละคุ เยีย, เฒาะ เยีย ฒอย กวั่ง เม่ย เญย ฆะฮ้า ฆาง, เม่ย ฯฒฯ อ๋อย หฒุ ดาม-ตอง เม่ย เหฮยียน เญย, หม่าย ซิน เญย สี่.’”

36เฒี้ยว แอ๋ง ก๊อง บั๋ว เยีย, “ป้าม เมี่ยน อ้า! เม่ย อ๋อย เซี้ยม โอโฮลา เหธา โอโฮลีบา ไฟ? ฮนั้ง หน่าย อ๋อย หฒุ เฒาะ นิ่น บัว โหฒว กั้ม เฑี้ย เญย สี่ ก๊อง บั๋ว นิ่น บัว,

37เหว่ย หฒุ นิ่น บัว เหฮยียน โหฆ, ปั์ว หย่า ม่าย ไต๋ เมี่ยน เญย ฑย้าม กั๊วะ เจี๊ยน. นิ่น บัว ป๋าย หมิ่ว-ฝัง, เลี่ยม นิ่น บัว ยู์ง ปุน เยีย เญย ฝุเจว๊ย หล่ง โต์ว ปั๊ว เหฒี่ย โหฒว หมิ่ว-ฝัง เญย หญั่น ฮบ.

38ไม้ ตาน บัวะ น้าย. นิ่น บัว ฮนั้ง น้าย นอ โหฒว ปุน เยีย. ต้ง วั้ว ฮนอย นิ่น บัว โหฒว ปุน เยีย เญย สีง ติ่น ม่าย หวุย หย่า ปุน เยีย เญย ตี้ง กง ฮนอย ไม้ ธีง-เหฑ่ง.

39เซ นิ่น บัว ไต๋ นิ่น บัว เญย น่าม โญ์ว ฝ่ง ห่อ เหฒี่ย หมิ่ว-ฝัง, ต้ง วั้ว ฮนอย นิ่น บัว เปียะ เยีย เญย สีง ติ่น, ปุน เยีย เญย สีง ติ่น ม่าย หวุย. นิ่น บัว เยียม เยีย เญย เปย๊า ฮนั้ง น้าย นอ โหฒว.

40“ไม้ ตาน บัวะ น้าย. นิ่น บัว พ้าย โต่ว เฝียน เมี่ยน มี่ง โก เญย ต๋อง ล์อ เมี่ยน ต้าย. วั้ว เต๋ย เมี่ยน หย่า หฒะเก้ง ต้าย อ๊ะ. เม่ย ฯฒฯ หฑาว ซิน, หล่ง เซ้ด ฑ้าด มฒีง, ฒอง เหฑว่ย เญย เซียว-เซ้ด ฒิบ นิ่น บัว.

41เม่ย เฒว์ย เจี๊ยน เหฑว่ย เญย โหธว หย่า ม่าย เตี้ย ตน เจี๊ยน เม่ย เญย หฑะเฮมียน. เตี้ย กู้ หงว่าย ม่าย เยีย เญย ฮูง เหธา เยีย เญย กะลั้น โย่ว.

42“เหธา นิ่น เยียม วั้ว ม่าย เหยียด ต้ม กวั้น ไม้ ฮิ้ว ตุ๊ โยว-เฑ่า เญย เมี่ยน เญย เฉีย บุย. แอ๋ง ม่าย เมี่ยน เยียม เต่ย-ปูง-ฮวาง ต้อ ติ๊ว ฆวิน เญย เมี่ยน เหธา เจี๊ยน โพว-ทง เญย เมี่ยน ต้าย. วั้ว เต๋ย เมี่ยน เฒาะ เจี้ยม ปุน วั้ว เต๋ย มเซียะ ตอน ตั้ง เจี๊ยน หย่า เฒาะ เหฑว่ย ไห่ เญย นี้ง ปุน นิ่น บัว ด๋ง เจี๊ยน.

43เยีย ฯฒฯ ก๊อง เถา น้าย เต้า หลาย เหฮยียน เญย เจ๊า ด๊อด จ๋า เญย มเซียะ ตอน, ‘เมี่ยน หธ่อ เหฮยียน นิ่น เญย ไฟ?’

44เหว่ย หฒุ เมี่ยน หธ่อ เปียะ มี่ง ล์อ นิ่น ฮนั้ง เปียะ มี่ง ล์อ หม่าย ซิน เญย มเซียะ ตอน นอ. นิ่น บัว ฯฒฯ เปียะ มี่ง ล์อ โอโฮลี เหธา โอโฮลีบา เหฮยียน.

45มป่า คู้ เมี่ยน อ๋อย ตี่ง นิ่น บัว เญย ฒุ์ย หฒิว ตี่ง เหฮยียน โหฆ เญย มเซียะ ตอน เญย ฒุ์ย, เหธา ไต๋ เมี่ยน ปุน ฑย้าม เหลี่ยว ธ้วด เญย มเซียะ ตอน เญย ฒุ์ย, เหว่ย หฒุ นิ่น บัว เป๋น เหฮยียน โหฆ เญย มเซียะ ตอน. ปั์ว หย่า กั๊วะ เจี๊ยน ไต๋ เมี่ยน เญย ฑย้าม.

46“เฒี้ยว ทิน-ฮู่ง ฮนั้ง น้าย ก๊อง, ‘ต้อ เมี่ยน ธั้ม ต้าย เบ๊าะ นิ่น บัว, แฮะ นิ่น บัว กั้ม เหฑีย หย่า หฒุ เมี่ยน ลู้.

47น้าย เต๋ย เมี่ยน อ๋อย เฒาะ หละเปย๊ย ฒง นิ่น บัว หย่า หล่ง หฑุ ด๊าว ไต๋. เลี่ยม นิ่น บัว เญย น่าม โญ์ว หย่า ไต๋ หย่า ปู๋ง โต์ว ปั๊ว นิ่น บัว เญย เปย๊า.

48“‘ฮนั้ง หน่าย, เยีย ฯฒฯ เยียม น้าย นอม เต่ย-ปูง ปุน เหฮยียน เญย เจ๊า ตั๋ง, เหว่ย ต๊น เหยียด ฒู้ง มเซียะ ตอน ไม้ ตู๋ง หฒวด เม่ย บัว เหฮยียน เญย เจ๊า.

49หฒิว เม่ย บัว เหฮยียน เญย เจ๊า เยีย อ๋อย วิ่น ปุน เม่ย บัว. เม่ย บัว หย่า อ๋อย หฒุ ดาม-ตอง ป๋าย หมิ่ว-ฝัง เญย ฒุ์ย. วั้ว หฒั่น เม่ย บัว ฯฒฯ ฮิ้ว ตุ๊ เยีย เซ เฒี้ยว ทิน-ฮู่ง. ’”

← Chapter 22 Jump to: Chapter 24 →