Ezekiel 24

Mien Bible (Thai Script) © Thailand Bible Society, 2007

← Chapter 23 Jump to: Chapter 25 →

1เยีย บัว หฒุ ธ้าง มี่ง ตะจั๊ว หฮญัง, เหฒียบ หฮลา แซง-เหฒียบ, เยีย แอ๋ง ตุ๊ ฒิบ เฒี้ยว เญย หว่า ก๊อง,

2“ป้าม เมี่ยน อ้า! เม่ย อ๋อย หฒุ เฒาะ น้าย นอม ฮนอย เฟี้ย เจี๊ยน. หฒะเก้ง เฟี้ย น้าย นอม ฮนอย เหว่ย หฒุ ต้ง น้าย นอม ฮนอย บาบีโลน เญย ฮู่ง เว่ย เจี๊ยน อ๋อย เบ๊าะ เยลูซาเลม.

3อ๋อย หฒุ ก๊อง ติ้ว หว่า-เป๊ย บั๋ว วั้ว เต๋ย เฮญี้ยว แหง่ง เญย เฒ้ย-ฟุน. บั๋ว นิ่น บัว, ‘เฒี้ยว ทิน-ฮู่ง ฮนั้ง น้าย ก๊อง, “‘“เฒาะ แธง ท้าบ เจี๊ยน โต์ว กู้ หงว่าย, ท้าบ เจี๊ยน โต๋ ววม ตั๊บ กะญั์ว.

4เฒาะ อ๊อ เหยียด ดุ้น เหยียด ดุ้น ตั๊บ เจี๊ยน, ต้ง เหยียด ฒู้ง หลง เจี๋ย เญย อ๊อ, เซ ปั์ว-ฒุ่ย เหธา เหฒา-ฒุ่ย เญย อ๊อ. เฒาะ เก้า หลง เจี๋ย เญย บู๊ง ตั๊บ ปวั๊ง แธง.

5กิ๊น ปะกี ยู่ง กวั้น กะญั์ว เก้า หลง เจี๋ย เญย ปะกี ยู่ง. เฒาะ ฒ่าง ดุย เจี๊ยน โต์ว-เหฑ่า ปุน ววม เบว๋ย, ว่วน เถา บู๊ง เมา.”

6“‘เหว่ย หฒุ เฒี้ยว ทิน-ฮู่ง ฮนั้ง น้าย ก๊อง, “‘“ม่าย ไต๋ เมี่ยน ปุน ฑย้าม เหลี่ยว ธ้วด เญย ฒี่ง อ๋อย หฒุ โค้ว อ๊ะ. เซ เหยียด นอม กะญั์ว เจี๋ย หฑีง เญย แธง, หฑีง หย่า ไม้ ไฮ่ ดุ๊ด. อ๋อย หฒุ เฒาะ อ๊อ เหยียด ดุ้น เหยียด ดุ้น เญย ธ้วด, หย่า ไม้ ตู๋ง กิ๊น หาย ดุ้น.

7“‘“เหว่ย หฒุ ฒี่ง กะญั์ว หธ่อ ม่าย ไต๋ เมี่ยน ปุน ฑย้าม เหลี่ยว ธ้วด เญย สี่, วั้ว เต๋ย ฑย้าม โต๋ เจี๊ยน ฌัง เญย หละเปย๊ย-ฒอง กู้ หงว่าย, นิ่น ไม้ โต๋ เหฌี่ย เดา, ไฮ่ ม่าย เนีย-บูง ปวัง เจี๊ยน เญย ต๋อง.

8เยีย เฒาะ ฒี่ง กะญั์ว ไต๋ เมี่ยน เหลี่ยว ธ้วด เญย ฑย้าม โต๋ นอม ฌัง เญย หละเปย๊ย-ฒอง กู้ หงว่าย, เหว่ย ปุน ไม้ ไฮ่ ท้อง, ฯฒฯ ธัวะ เยีย เฉีย เจี์ย จ๊าว วิน.”

9“‘เหว่ย น้าย เฒี้ยว ทิน-ฮู่ง ก๊อง, “‘“ไต๋ เมี่ยน ปุน ฑย้าม เหลี่ยว ธ้วด เญย ฒี่ง อ๋อย หฒุ โค้ว อ๊ะ. เยีย ฟี่ ฮนั้ง เญย อ๋อย เฒาะ ฒ่าง ดุย เจี๊ยน ธั้ม เญย.

10จา ฒ่าง ธั้ม, เตี๊ยม โต์ว, ว่วน อ๊อ เมา, โต๋ อ๊อ-ทอง ธ้วด หย่า ปุน บู๊ง ล์าว.

11เฒาะ แธง-ขูง ท้าบ เจี๊ยน โต์ว-ถาน กู้ หงว่าย, ปั๊ว แธง จอม เถา ต้ง ซิ แธง ซิ เหฑ่ง, ปุน กะญั์ว ไล่ ฮลบ เญย กะน้าย หยุ เหฑ่ง, หฑีง หย่า ปั๊ว ชุย.

12เยีย แปะๆ โหฒว โค้ว ฮนั้ง. โต์ว ฒู้ง ปั๊ว ไม้ ดุ๊ด น้าย เต๋ย โฮ์ เญย หฑีง.

13“‘“น้าย เต๋ย หฑีง เป๊ย เม่ย เหฮยียน เญย เจ๊า เป๋น ไล่ ฮลบ เญย สี่. ไม้ กุ๊น เยีย อ๋อย สา เม่ย ธีง-เหฑ่ง, เม่ย ไม้ สา เม่ย โหฒว ไล่ ฮลบ เญย สี่ ธีง-เหฑ่ง. เม่ย ฯฒฯ ไม้ ไฮ่ แอ๋ง สา ธีง-เหฑ่ง เถา เยีย เญย กะเฉีย ฟิว, ไม้ โน์ว เม่ย อ๊ะ.

14“‘“เยีย, เฒี้ยว, ก๊อง ลิ์ว อ๊ะ. เฒี่ยง โห่ อ๋อย เถา, เยีย หฒะเก้ง โหฒว อ๊ะ. เยีย ไม้ ถุย, ไม้ ค้อ-เลี่ยน หย่า ไม้ ก๊อย เฮญี้ยว. เยีย อ๋อย หฒิว เม่ย โหฒว เญย เจ๊า เหธา โหฒว เญย สี่ เซี้ยม เม่ย.”’ เฒี้ยว ทิน-ฮู่ง ฮนั้ง น้าย ก๊อง.”

15เยีย แอ๋ง ตุ๊ ฒิบ เฒี้ยว เญย หว่า ก๊อง,

16“ป้าม เมี่ยน อ้า! เยีย อ๋อย เฒาะ ต้ง เม่ย เญย มฒีง ปวัด เก้า ฮนั้ม เจี๋ย เญย เมี่ยน, ปุน นิ่น เลี่ยม เฒ่ย หฒุ ไต่. มป่า ไม้ ตู๋ง เฑ่า, ไม้ ตู๋ง เญี้ยม ไฟ ปุน ววม-เหมว่ย เหลี่ยว.

17กุ๊น เท้า เฉีย-โดะ มป่า ไม้ ตู๋ง บุย. ไม้ ตู๋ง เหว่ย ไต่ มี่ง เญย เมี่ยน เฑ่า เญี้ยม. เม่ย อ๋อย หฒุ เปว เจี๊ยน มฆ้อง-เปว, ตาบ เจี๊ยน เฮ่, หย่า ไม้ ตู๋ง ปวัง ฑุ่ย ไฟ หญั่น เหว่ย เฑ่า เญี้ยม เบ่น เญย ไล-หฮนาง.”

18ฮนั้ง หน่าย ลู่ง ดอม เยีย เหธา แปะ ฝีง ก๊อง หว่า. ลู่ง ม์าน-หฮมวัง เยีย เญย เอ๊า ไต่ หมี่ อ๊ะ. ตะเหญ่ย ดอม เยีย เอย เฒี้ยว หัด เญย หว่า โหฒว.

19แปะ ฝีง ฯฒฯ หน่าย เยีย, “เม่ย ไม้ บั๋ว เยีย บัว ไฟ? เม่ย ฮนั้ง น้าย นอ โหฒว, เหว่ย เยีย บัว ม่าย หาย หญู่ง เอ๋ย เล์ย?”

20เยีย ฯฒฯ บั๋ว นิ่น บัว, “เยีย ฒิบ เฒี้ยว เญย หว่า ก๊อง,

21‘เม่ย อ๋อย หฒุ บั๋ว อิสะลาเอน เญย เฒ้ย-ฟุน, ‘เฒี้ยว ทิน-ฮู่ง ฮนั้ง น้าย ก๊อง, “หมั่ง ม่าะ! เยีย อ๋อย ปุน เยีย เญย สีง ติ่น ม่าย หวุย, ต้ง เม่ย บัว เฮ้น, ปู๋ง หว่า-เหมา เญย ต๋อง. เซ มฒีง ปวัด อะเฮน้ย เญย, เฮญี้ยว หย่า อ๋อย เญย ต๋อง. ต้ง เม่ย บัว เลี่ยว เยียม เยลูซาเลม เญย น่าม โญ์ว หย่า อ๋อย หฒุ หฑุ ด๊าว ไต๋.

22เถา วั้ว หฒั่น เม่ย บัว อ๋อย หฒุ โหฒว ฮนั้ง เยีย โหฒว. ไม้ ตุ๊ ปวัง ฑุ่ย หย่า ไม้ ตุ๊ หญั่น เฑ่า เญี้ยม เญย เมี่ยน เญย หญั่น ฮบ.

23เม่ย บัว หธ่อ อ๋อย หฒุ เปว เจี๊ยน เม่ย บัว เญย มฆ้อง-เปว, ตาบ เจี๊ยน เฮ่, ไม้ ตู๋ง เฑ่า เญี้ยม. หลาย เม่ย บัว เญย ฒุ์ย, เม่ย บัว เญย ซิน หฒั่ง อ๋อย โค้ว เจี๊ยน เหฌี่ย, ล่าน เหธา ล่าน ฌุ่น เจี๊ยน เยียม.

24เอเสเคน ฯฒฯ เป๋น นอม จั๋ง-โห่ ปุน นิ่น บัว หมั่ง. ตะฟ่าน นิ่น ฮนั้ง หาย นอ โหฒว, เม่ย บัว อ๋อย หฒุ ฮนั้ง วั้ว นอ โหฒว. น้าย เต๋ย สี่ ธ้วด เญย เฒี่ยง โห่, เม่ย บัว ฯฒฯ ฮิ้ว ตุ๊ เยีย เซ เฒี้ยว ทิน-ฮู่ง. ”’

25“ป้าม เมี่ยน อ้า! เยีย เฒาะ ธ้วด นิ่น บัว ว้วน เญย ต๋อง, ต้ง นิ่น บัว เขา ตุ๊ เฌียน-โย่ว เหธา ฌัง-หล่าง เญย ต๋อง, นิ่น บัว เญย มฒีง ปวัด อะเฮน้ย เญย, เฮญี้ยว หย่า อ๋อย เญย, เลี่ยม นิ่น บัว เญย น่าม โญ์ว หย่า เฒาะ มี่ง.

26วั้ว ฮนอย ม่าย เต้า เปย๋า ดุ๊ด สี่ เญย เมี่ยน อ๋อย ต้าย เฒาะ น้าย เต๋ย เจ๊า ก๊อง ปุน เม่ย หมวัง.

27ต้ง วั้ว ฮนอย, เม่ย ตอง เจี๊ยน เปย๋า สี่ วั้ว เต้า เมี่ยน ไฮ่ ก๊อง หว่า อ๊ะ. เยียม หน่าย มี่ง เม่ย ไม้ หฮงง. ฮนั้ง หน่าย เม่ย ฯฒฯ เป๋น นอม จั๋ง-โห่ ปุน นิ่น บัว หมั่ง. นิ่น บัว ฯฒฯ ฮิ้ว ตุ๊ เยีย เซ เฒี้ยว. ”

← Chapter 23 Jump to: Chapter 25 →