Ezekiel 21

Mien Bible (Thai Script) © Thailand Bible Society, 2007

← Chapter 20 Jump to: Chapter 22 →

1เยีย ตุ๊ ฒิบ เฒี้ยว เญย หว่า ก๊อง,

2“ป้าม เมี่ยน อ้า! อ๋อย หฒุ ฮวิน เม่ย เญย เฮมียน หูง เจี๊ยน เยลูซาเลม โต่ว หว่า ฒุ่น ก๊อง สีง ติ่น, หย่า อ๋อย หฒุ โต่ว หว่า ก๊อง อิสะลาเอน เต่ย-ปูง.

3อ๋อย หฒุ บั๋ว อิสะลาเอน เต่ย-ปูง, ‘ เฒี้ยว ฮนั้ง น้าย ก๊อง, “เยีย เหธา เม่ย โหฒว วิน-วั้ง อ๊ะ. เยีย อ๋อย แปง เยีย เญย หฑุ ด๊าว ธ้วด ไพ้, หย่า อ๋อย เยียม เม่ย บุด๋ง เลี่ยม คู้ เมี่ยน เหธา เอ๊าะ เมี่ยน ไพ กวั่ง.

4เหว่ย หฒุ เยีย อ๋อย เยียม เม่ย บัว บุด๋ง, เลี่ยม คู้ เมี่ยน เหธา เอ๊าะ เมี่ยน ไพ กวั่ง. เยีย เญย หฑุ ด๊าว ฯฒฯ หฒุ แปง ธ้วด ไพ้, เยียม น่าม ปูง เถา ป๊ะ ปูง ไต๋ เหยียด ฒู้ง ป้าม เมี่ยน.

5เหยียด ฒู้ง หม่าน เมี่ยน ฯฒฯ ฮิ้ว ตุ๊ เยีย, เฒี้ยว, แปง เยีย เญย หฑุ ด๊าว ธ้วด ไพ้, ไม้ ตุ๊ แอ๋ง ทับ.”’

6“ป้าม เมี่ยน อ้า! เม่ย อ๋อย หฒุ เท้า ต้ม เฉีย. อ๋อย หฒุ เยียม นิ่น บัว เญย หฑะเฮมียน เท้า ต้ม เฉีย ฮนั้ง บะฑิว ไฮ่ บ๋าย, เฑ่า ตุ๊ โค้ว ไห่.

7นิ่น บัว หาย หฒั่น หน่าย, ‘เม่ย เหว่ย หาย ติ่ว เท้า ต้ม เฉีย?’ เม่ย อ๋อย หฒุ เตา, ‘หลาย วั้ว เต๋ย เธี้ยว เญย เฝียน. เฝียน เถา เญย เฒี่ยง โห่, โม์ว เต้า เมี่ยน เญย บะฑิว อ๋อย หยุ เหฑ่ง, เหยียด ฒู้ง ปั์ว หย่า เมา, เต้าๆ เญย เฮญี้ยว หว่าย เหฑ่ง, นอมๆ ธี่ง เบาะ หย่า เมา.’ หมั่ง ม่าะ! น้าย เต๋ย เฝียน อ๋อย เถา, หย่า หฒะเก้ง อ๋อย ฮนั้ง หน่าย ธ้วด ต้าย อ๊ะ. เฒี้ยว ทิน-ฮู่ง ฮนั้ง น้าย ก๊อง.”

8เยีย แอ๋ง ตุ๊ ฒิบ เฒี้ยว เญย หว่า ก๊อง,

9“ป้าม เมี่ยน อ้า! เม่ย อ๋อย หฒุ โต่ว หว่า ก๊อง, ‘เฒี้ยว ฮนั้ง น้าย ก๊อง, “‘“ม่าย ฒูง หฑุ ด๊าว, ม่าย ฒูง เหฑียว ไหล่, ฑ้าด ฌัง เญย หฑุ ด๊าว.

10เหฑียว ไหล่ เหว่ย ไต๋ เมี่ยน, ฑ้าด ฌัง แฒ่งๆ เญย ฮนั้ง บะหลี่ง นอ. “‘“เยีย บัว ไฮ่ ออน-เหลาะ เญย ไฟ? เยีย เญย ตอน อ้า! เม่ย หมั่ง เผีย เหยียด ฒู้ง ต๊น เญย หว่า เหธา ตี่ง ฒุ์ย เญย เจ๊า.

11“‘“น้าย ฒูง หฑุ ด๊าว จิว ปุน เมี่ยน ฑ้าด ฌัง, เหว่ย ไฮ่ นั้น เจี๊ยน. หฑุ เหฑียว ไหล่ หย่า ฑ้าด ฌัง หมี่ อ๊ะ, เหว่ย จิว ปุน ไต๋ เมี่ยน เญย เมี่ยน นั้น เจี๊ยน.

12ป้าม เมี่ยน อ้า! ชะ เห่ว, ชะ เญี้ยม, เหว่ย หฒุ หฑุ ด๊าว อ๋อย ห่อย เยีย เญย แปะ ฝีง, เซ ห่อย อิสะลาเอน โหฒว โฮล เญย เหยียด ฒู้ง เมี่ยน. นิ่น บัว เหธา เจี๊ยน เยีย เญย แปะ ฝีง หฒุ จิว ปุน หฑุ ด๊าว ไต๋. เหว่ย น้าย อ๋อย หฒุ ไบ๋ เม่ย เญย ธั่ม ฒุ่ย.

13“‘“หฒุ เสย เญย สี่ ด่ง หาย ฒู้ง อ๋อย ม่าย. สี ก๊อง หมั่ง เผีย ปย๊า, น้าย เต๋ย สี่ ไม้ เฒ์ย อ๋อย ธ้วด เญย ไฟ?” เซ เฒี้ยว ทิน-ฮู่ง ฮนั้ง น้าย ก๊อง.’

14“ป้าม เมี่ยน อ้า! อ๋อย หฒุ ไบ๋ เจี๊ยน ปั์ว โต่ว หว่า. กุ๊น ปุน หฑุ ด๊าว ฮงะ เหฌี่ย อี หฑุ่น, ฒู้ง ฮงะ เหฌี่ย ปัว หฑุ่น. เซ ไต๋ เมี่ยน เญย หฑุ ด๊าว, ฒู้ง อ๋อย ไต๋ เมี่ยน ธั้ม เญย, หย่า เฝง ฮวีง ก๋อม นิ่น บัว.

15เซ เหว่ย ปุน นิ่น บัว เญย บะฑิว หยุ, หย่า ม่าย เมี่ยน ธั้ม ดิ๊ หฒุ ดอบ. เยีย ปุน ไต๋ เมี่ยน เญย หฑุ ด๊าว เยียม นิ่น บัว เญย เหยียด ฒู้ง ฒี่ง แก้ง. อา, น้าย ฒูง หฑุ ด๊าว ฮนั้ง บะหลี่ง, หย่า ฑ้าด ฌัง หลิ่ว เล์ย ไต๋ เมี่ยน.

16โอ หฑุ ด๊าว อ่า, ฮงะ มี่ง บย่าว ปูง แอ๋ง ไบ้ เจี๊ยน ฮงะ หฒาย ปูง. เม่ย เญย หฑะเฮมียน ฮวิน หาย ปูง, อ๋อย หฒุ ฮงะ วั้ว ปูง.

17เยีย กั้น หย่า อ๋อย ไบ๋ ปั์ว, อ๋อย ปุน เยีย เญย กะเฉีย ฟิว มี่ง. เยีย, เฒี้ยว, ก๊อง น้าย เต๋ย หว่า.”

18เยีย แอ๋ง ตุ๊ ฒิบ เฒี้ยว เญย หว่า ก๊อง,

19“ป้าม เมี่ยน อ้า! เม่ย อ๋อย หฒุ เกว๊ด อี ติ้ว เจ๊า ปุน บาบีโลน เญย ฮู่ง ต้อ หฑุ ด๊าว ต้าย. น้าย เต๋ย อี ติ้ว เจ๊า เยียม เหยียด นอม เต่ย-ปูง ธ้วด. อ๋อย หฒุ โหฒว นอม จั๋ง-โห่ อัน เจี๊ยน ปุน ธีง เปียะ ฒี่ง เญย เจ๊า-คู้.

20เหยียด ติ้ว เจ๊า อ๋อย หฒุ โหฒว เหว่ย ปุน หฑุ ด๊าว มี่ง เถา อัมโมน เมี่ยน เญย ลับบา ฒี่ง. เหยียด ติ้ว มี่ง ยูดา เหธา เว่ย ว้วน เญย ฒี่ง, เยลูซาเลม.

21เหว่ย หฒุ บาบีโลน เญย ฮู่ง โซ้ว เจี๊ยน เจ๊า-หธา, อี ติ้ว เจ๊า บุด๋ง, โบ๊ว กว๋า, โจ้ว ธิม, หน่าย นิ่น เญย หมิ่ว-ฝัง หย่า ฒ่า หมั่ง แซง-คู้ เญย ฮลัน.

22บย่าว เจี๊ยะ ปั์ว นั้น เญย ธิม ปุน ธีง ด๊อด หฒุ เยลูซาเลม, เหว่ย ปุน เหลียบ ฒง ฒี่ง เญย จา-สี่, เหว่ย ฆอย ฑุ่ย เห่ว เมี่ยน ไต๋, เหว่ย เหน่า เบ๊าะ จ๋า เญย เฉีย บุย, ฯฒฯ เยียม วั้ว เหลียบ ฒง ฒี่ง แก้ง ทง เญย กะน้าย, หย่า เว้ด เนีย ดุย เจี๊ยน, แอ๋ง โหฒว ล่าว เว่ย ก๋อม.

23เยลูซาเลม เมี่ยน ไฮ์ ฮนั้ง น้าย เต๋ย โต่ว เญย หว่า เซ จ๊า เญย, เหว่ย หฒุ นิ่น บัว เหธา บาบีโลน เญย ฮู่ง แล์ง เจี๋ย แหง่ง หว่า. มป่า น้าย เต๋ย โต่ว เญย หว่า ปุน นิ่น บัว จั๋ง หฒุ นิ่น บัว โหฒว ต่อง ฒุ์ย, ฯฒฯ หฒุ เฒาะ มี่ง.

24“เหว่ย น้าย เฒี้ยว ทิน-ฮู่ง ฮนั้ง น้าย ก๊อง, ‘เม่ย บัว ป์าม ฒุ์ย แหฆ่ง เญย, ปุน เยีย จั๋ง เม่ย บัว โหฒว ต่อง เญย ฒุ์ย. ฮนั้ง หน่าย เยียม เม่ย บัว โหฒว เญย เหยียด ฒู้ง สี่ เม่ย บัว เญย ฒุ์ย ปิ๋ว เม่ง ธ้วด ต้าย. เหว่ย หฒุ เม่ย บัว ปุน เยีย จั๋ง, เม่ย บัว ฯฒฯ หฒุ เฒาะ มี่ง อ๊ะ.

25“‘โอ อิสะลาเอน ไม้ ธีง-เหฑ่ง, เอ๊าะ ไห่ เญย ฮู่ง อ้า! เม่ย หฒุ ตี่ง ฒุ์ย ฆะฮ้า ลาย วั้ว หฑุ่น เญย ฮนอย-เหญียะ เถา อ๊ะ.

26เฒี้ยว ทิน-ฮู่ง ก๊อง, เฒาะ นิ่น เญย มฆ้อง-เปว เหธา ฮู่ง นี้ง หมวน ธ้วด. หญู่งๆ อ๋อย ทิ้ว เหฑ่ง, ไม้ ฮนั้ง ฒิ่น ด่าง อ๊ะ. ไอ๊ เญย อ๋อย หฒุ ท่าย ฮลัง, ฮลัง เญย อ๋อย หฒุ ปุน เหฌี่ย ไอ๊.

27ป่าย หว่าย อ๊ะ, ป่าย หว่าย อ๊ะ, เยีย อ๋อย โหฒว ปุน น้าย นอม ฒี่ง หฒุ ป่าย หว่าย. มป่า ฒั้ว เถา หอบ หฒุ ตุ๊ วั้ว เต้า ต้าย เถา, เยีย ฯฒฯ จิว ปุน นิ่น.’

28“ป้าม เมี่ยน เญย ตอน อ้า! เม่ย อ๋อย หฒุ โต่ว หว่า ก๊อง, ‘เฒี้ยว ทิน-ฮู่ง ฮนั้ง น้าย ก๊อง เถา อัมโมน เมี่ยน เหธา นิ่น บัว ต้าน เญย หว่า. “‘“ม่าย หฑุ ด๊าว, ม่าย หฑุ ด๊าว, แปง ธ้วด ต้าย ฑ้าด ฌัง เหว่ย ไต๋ เมี่ยน, นะ เมี่ยน, หย่า หฌับๆ เญย ฮนั้ง บะหลี่ง.

29เมี่ยน ปวัด หิ่น ย่าง เญย จ๊า สี่, หย่า ก๊อง ฒิ่น โฮ์ หว่า เป๋น ก๊อง-แปะ เญย หว่า บั๋ว เม่ย. เอ๊าะ เมี่ยน อ๋อย หฒุ ไต๋, หฑุ ด๊าว อ๋อย เหฌี่ย เม่ย เญย จาง. เม่ย เญย เฒี่ยง โห่ เถา, เซ เม่ย หฒุ ตี่ง ฒุ์ย ฆะฮ้า ลาย วั้ว หฑุ่น.

30เฒาะ หฑุ ด๊าว ทับ เจี๊ยน ไพ้ ม่าะ! เยียม เหฒย เม่ย ต้าย เญย ต๋อง, เซ เยียม เม่ย เญย อง-ถาย เญย เต่ย-ปูง, เยีย อ๋อย เซี้ยม เม่ย.

31เยีย เญย กะเฉีย อ๋อย แป๊ด ธ้วด ปุน เม่ย, โน์ว เม่ย ฮนั้ง หฌบ โต์ว. เยีย อ๋อย เฒาะ เม่ย จิว ปุน เมี่ยน โตะ เมี่ยน ไต๋, เซ ไฮ่ ไต๋ เมี่ยน, เหมียด เมี่ยน เหลี่ยว เญย เมี่ยน.

32เม่ย ฯฒฯ เป๋น ฒ่าง ปั๊ว โต์ว. เม่ย เญย ฑย้าม อ๋อย หฒุ เหลี่ยว ธ้วด เยียม เม่ย เญย เต่ย-ปูง. เยียม น้าย มี่ง ไม้ ม่าย หาย เต้า จั๋ง ตุ๊ เม่ย, เหว่ย หฒุ เยีย, เฒี้ยว, ก๊อง.”’”

← Chapter 20 Jump to: Chapter 22 →