Ezekiel 37

Mien Bible (Thai Script) © Thailand Bible Society, 2007

← Chapter 36 Jump to: Chapter 38 →

1เฒี้ยว เญย ชะ ต้าย เยียม เยีย เญย ซิน. เฒี้ยว หล่ง นิ่น เญย สีง ลี่ง ต้อ เยีย ธ้วด มี่ง เยียม นอม ฮ์อง กะญั์ว. วั้ว นอม ฮ์อง ม่าย บู๊ง ปวั๊ง เหฑ่ง.

2นิ่น ต้อ เยีย ยั่ง มี่ง ยั่ง ต้าย หมั่ง เหฑ่ง วั้ว เต๋ย บู๊ง. ปวัด ฮ์อง กะญั์ว ม่าย บู๊ง หฒะเก้ง ธั้ม! ไห่. บู๊ง หย่า บ๋อง ฆาย เญย.

3นิ่น ก๊อง บั๋ว เยีย, “ป้าม เมี่ยน อ้า! น้าย เต๋ย บู๊ง แอ๋ง ไฮ่ นั่ง เญย ไฟ?” เยีย ฯฒฯ เตา, “โอ เฒี้ยว ทิน-ฮู่ง อ่า, เม่ย กั้น ฮิ้ว เญย.”

4นิ่น ฯฒฯ บั๋ว เยีย, “อ๋อย หฒุ โต่ว หว่า บั๋ว น้าย เต๋ย บู๊ง, ‘บู๊ง-ฆาย อ้า! อ๋อย หฒุ หมวัง เฒี้ยว เญย หว่า ม่าะ!

5เฒี้ยว ทิน-ฮู่ง ฮนั้ง น้าย ก๊อง บั๋ว เม่ย บัว น้าย เต๋ย บู๊ง. “เยีย อ๋อย ปุน เท้า เญย เฉีย เปียะ เม่ย บัว กะญั์ว, เม่ย บัว ฯฒฯ นั่ง ต้าย.

6เยีย อ๋อย ปุน เม่ย บัว ม่าย จาน, ปุน อ๊อ ธ้วด ต้าย แอ๋ง ปุน ด๊บ ปวัง เจี๊ยน เม่ย บัว. เยีย อ๋อย ปุน เท้า เญย เฉีย เปียะ เม่ย บัว กะญั์ว, เม่ย บัว ฯฒฯ นั่ง ต้าย. เม่ย บัว ฯฒฯ ฮิ้ว ตุ๊ เยีย เซ เฒี้ยว. ”’”

7เยีย ฯฒฯ หฒิว เฒี้ยว พ้าย เยีย โต่ว หว่า. โต่ว หว่า เญย เฒี่ยง โห่ ม่าย เฉีย บุย ปะลี้ก ปะล้อก เญย. บู๊ง เหธา บู๊ง ต๋าว เจี๊ยน จ๋า, เหยียด ติ้ว ต๋าว เหยียด ติ้ว.

8เยีย หมั่ง ปวัด บู๊ง ม่าย จาน หย่า ธ้วด อ๊อ แอ๋ง ม่าย ด๊บ ปวัง เจี๊ยน บู๊ง มป่า เยียม หน่าย กะญั์ว ไม้ ม่าย เท้า เญย เฉีย.

9เฒี้ยว แอ๋ง ก๊อง บั๋ว เยีย, “ป้าม เมี่ยน อ้า! เม่ย อ๋อย หฒุ โต่ว หว่า บั๋ว เท้า เญย เฉีย. อ๋อย หฒุ โต่ว หว่า ก๊อง บั๋ว เท้า เญย เฉีย, ‘เท้า เญย เฉีย อ้า! เฒี้ยว ทิน-ฮู่ง ฮนั้ง น้าย ก๊อง, “เม่ย อ๋อย หฒุ เยียม เปยย ปูง หฑยาว ต้าย ปย๊ม เปียะ น้าย เต๋ย หฒุ ไต๋ ไต่ เญย เมี่ยน เหว่ย ปุน นิ่น บัว นั่ง ต้าย.”’”

10เยีย ฯฒฯ โต่ว หว่า ฮนั้ง นิ่น พ้าย ปุน เยีย นอ. เท้า เญย เฉีย ฯฒฯ เปียะ นิ่น บัว. นิ่น บัว นั่ง ต้าย โซ้ว เจี๊ยน, เป๋น เหยียด ต้ม กวั้น จุน-แปง ธั้ม เญย.

11เฒี้ยว แอ๋ง ก๊อง บั๋ว เยีย, “ป้าม เมี่ยน อ้า! น้าย เต๋ย บู๊ง เซ อิสะลาเอน เมี่ยน เญย เหยียด ฒู้ง เฒ้ย-ฟุน เญย บู๊ง. นิ่น บัว ก๊อง, ‘เยีย บัว เญย บู๊ง ฆาย เหฑ่ง หมี่ อ๊ะ. เยีย บัว ไม้ ลั่ม ฮนั้ม ต๋อง อ๊ะ. เยีย บัว หฒุ เหมียด เหฑ่ง หมี่ อ๊ะ.’

12เหว่ย น้าย เม่ย อ๋อย หฒุ โต่ว หว่า บั๋ว นิ่น บัว, ‘เฒี้ยว ทิน-ฮู่ง ฮนั้ง น้าย ก๊อง, “โอ เยีย เญย แปะ ฝีง อ้า! เยีย อ๋อย คอย ฆอย เม่ย บัว เญย โฒ้ว แอ๋ง เฒาะ เม่ย บัว เยียม โฒ้ว ธ้วด ต้าย ต้อ เม่ย บัว หฑวน อิสะลาเอน เต่ย-ปูง.

13โอ เยีย เญย แปะ ฝีง อ้า! เยีย คอย ฆอย เม่ย บัว เญย โฒ้ว แอ๋ง เฒาะ เม่ย บัว เยียม โฒ้ว ธ้วด ต้าย, เม่ย บัว ฯฒฯ ฮิ้ว ตุ๊ เยีย เซ เฒี้ยว.

14เยีย อ๋อย ปุน เยีย เญย สีง ลี่ง เปียะ เม่ย บัว กะญั์ว, เม่ย บัว ฯฒฯ นั่ง ต้าย. เยีย หย่า อ๋อย ปุน เม่ย บัว เยียม เจี๊ยน กั้น เญย เต่ย-ปูง. วั้ว หฒั่น เม่ย บัว ฯฒฯ ฮิ้ว ตุ๊ เซ เยีย, เฒี้ยว, ก๊อง ลิ์ว, เยีย หย่า เอย เจี๊ยน โหฒว อ๊ะ.” น้าย เซ เฒี้ยว ก๊อง เญย หว่า.’”

15เยีย แอ๋ง ตุ๊ ฒิบ เฒี้ยว เญย หว่า ก๊อง,

16“ป้าม เมี่ยน อ้า! เม่ย อ๋อย หฒุ เฒาะ ติ้ว ปย๊า เฟี้ย เจี๊ยน ‘เหว่ย ยูดา แอ๋ง เหธา ยูดา โหฒว ต่อย เญย อิสะลาเอน เมี่ยน.’ แอ๋ง กั้น เฒาะ ติ้ว, เป๋น เอฟาอิม เญย ปย๊า, เฟี้ย เจี๊ยน, ‘เหว่ย โยเซ้บ แอ๋ง เหธา โยเซ้บ โหฒว ต่อย เญย อิสะลาเอน เมี่ยน เหยียด ฒู้ง เฒ้ย-ฟุน.’

17เฒาะ น้าย เต๋ย อี ติ้ว ปย๊า เตว๊ย-เมว์ย ต๋าว เจี๊ยน, หล่ง ปั์ว นั้น เจี๊ยน ต๋าว เญย ต๋อง, ปุน อี ติ้ว ต๋าว เจี๊ยน เป๋น เหยียด ติ้ว.

18“เม่ย เญย ป๊วน-กั๊วะ เมี่ยน หน่าย เม่ย วั้ว หฒั่น, ‘น้าย เต๋ย อี ติ้ว ปย๊า เญย เอ๋ย เล์ย เม่ย ไม้ อ๋อย บั๋ว เยีย บัว ไฟ?

19เม่ย อ๋อย หฒุ บั๋ว นิ่น บัว, ‘เฒี้ยว ทิน-ฮู่ง ฮนั้ง น้าย ก๊อง, “เยีย อ๋อย เฒาะ โยเซ้บ เหธา นิ่น โหฒว ต่อย เญย อิสะลาเอน ฝีง วั้ว ติ้ว ปย๊า, เซ เยียม เอฟาอิม เญย ปั์ว เญย ปย๊า, หย่า เฒาะ ยูดา เญย ปย๊า ต๋าว เจี๊ยน เป๋น เหยียด ติ้ว, เหว่ย ปุน เยียม เยีย เญย ปั์ว เป๋น เหยียด ติ้ว อ๊ะ.”

20เม่ย ตอง เจี๊ยน นิ่น บัว เญย มฒีง นั้น เฟี้ย เจี๊ยน วั้ว เต๋ย อี ติ้ว ปย๊า วั้ว หฒั่น,

21อ๋อย หฒุ บั๋ว นิ่น บัว, ‘เฒี้ยว ทิน-ฮู่ง ก๊อง, “เยีย อ๋อย เยียม หม่าน กั๊วะ บุด๋ง เฒาะ อิสะลาเอน เมี่ยน เยียม นิ่น บัว หฒุ กว๊าด มี่ง เญย ต๋อง ธ้วด ต้าย, แอ๋ง เยียม เปยย ปูง เซียว นิ่น บัว กั๊บ ฒุ้น ต้าย ต้อ นิ่น บัว หฑวน นิ่น บัว กั้น เญย เต่ย-ปูง.

22เยีย อ๋อย ปุน นิ่น บัว เยียม วั้ว นอม เต่ย-ปูง, เซ อิสะลาเอน เญย หฒวัง บง, เป๋น เหยียด กั๊วะ เมี่ยน, ม่าย เหยียด เต้า ฮู่ง กุ๊น นิ่น บัว เหยียด ฒู้ง. นิ่น บัว ฯฒฯ ไม้ โหฒว อี นอม กั๊วะ เญย เมี่ยน หย่า ไม้ ปุน ฆอย เป๋น อี นอม กั๊วะ.

23นิ่น บัว เหยียด ลิ์ว ไม้ แอ๋ง ป๋าย หมิ่ว-ฝัง ไฟ โหฒว กั้ม เฑี้ย เญย สี่ ไฟ โหฒว ต่อง เญย หาย หญู่ง สี่ ปุน กั้น หฒุ ม่าย หวุย. เยีย อ๋อย เหฌียว นิ่น บัว เปย๋า ดุ๊ด นิ่น บัว ป์าม ฒุ์ย เญย นอมๆ ต๋อง แอ๋ง สา นิ่น บัว ธีง-เหฑ่ง. ฮนั้ง หน่าย นิ่น บัว อ๋อย โหฒว เยีย เญย แปะ ฝีง, เยีย หย่า โหฒว นิ่น บัว เญย ทิน-ฮู่ง.

24“‘“เยีย เญย โปว, ดาวิด, ตุ๊ โหฒว ฮู่ง กุ๊น นิ่น บัว. นิ่น บัว เต้าๆ ฯฒฯ ม่าย เหยียด เต้า เมี่ยน โก๋ว นิ่น บัว ฮนั้ง โก๋ว ปะกี ยู่ง เญย เมี่ยน นอ. นิ่น บัว อ๋อย เอย เจี๊ยน เยีย เญย เล์ย, กัน หลง เยีย เญย เล์ย-หลัด หย่า เอย เจี๊ยน โหฒว.

25นิ่น บัว อ๋อย เยียม เยีย จิว ปุน เยีย เญย โปว, ยาโค้บ, วั้ว นอม เต่ย-ปูง, เซ เม่ย บัว เญย อง-ถาย เยียม เญย เต่ย-ปูง. นิ่น บัว เหธา นิ่น บัว เญย เฒ้ย-ฟุน เฒ้ย-ฟะ อ๋อย เหยียด ลิ์ว เยียม วั้ว. เยีย เญย โปว, ดาวิด, ตุ๊ โหฒว นิ่น บัว เญย ฮู่ง เถา เหยียด ลิ์ว.

26เยีย อ๋อย เหธา นิ่น บัว เหลียบ แป้ง ออน เญย แหง่ง หว่า, เป๋น เหยียด ลิ์ว เญย แหง่ง หว่า. เยีย อ๋อย ปุน เมี่ยน หฮยาง เจี๊ยน ฝาว. เยีย หย่า อ๋อย เหลียบ เยีย เญย สีง ติ่น เยียม นิ่น บัว บุด๋ง เถา เหยียด ลิ์ว.

27เยีย เยียม เญย ต๋อง อ๋อย เยียม นิ่น บัว บุด๋ง. เยีย ฯฒฯ โหฒว นิ่น บัว เญย ทิน-ฮู่ง, นิ่น บัว หย่า โหฒว เยีย เญย แปะ ฝีง.

28เยีย เญย สีง ติ่น เหยียด ลิ์ว เยียม อิสะลาเอน เมี่ยน บุด๋ง เญย เฒี่ยง โห่, หม่าน กั๊วะ เมี่ยน ฯฒฯ ฮิ้ว ตุ๊ เซ เยีย, เฒี้ยว, ปุน อิสะลาเอน เมี่ยน ธีง-เหฑ่ง.”’”

← Chapter 36 Jump to: Chapter 38 →