Ezekiel 42

Mien Bible (Thai Script) © Thailand Bible Society, 2007

← Chapter 41 Jump to: Chapter 43 →

1เจี๋ย ต้าย วั้ว ล่าน เมี่ยน แอ๋ง ต้อ เยีย ธ้วด ต้าย เถา กะญั์ว วั้ว คัง หลาด เญย ป๊ะ ปูง แหมง, เถา เหยียด ไบ้ เปย๊า. วั้ว ไบ้ เปย๊า ต๋อย เหฒียง หฒั่ง ทิน-ฮู่ง เญย เปย๊า กะเฮลน เญย ขูง-ต๋อง, หย่า ต๋อย เหฒียง ป๊ะ ปูง วั้ว คัง เปย๊า.

2เยียม ป๊ะ ปูง แหมง, น้าย ไบ้ เปย๊า เซ ด๊าว เหยียด แป๊ะ เดาะ, จั๊ง ฮม์ เหฒียบ เดาะ,

3หย่า ต๋าว เจี๊ยน กะญั์ว วั้ว คัง หลาด หญี่ เหฒียบ เดาะ จั๊ง, แอ๋ง ฮวิน มี่ง กะเหญี่ย วั้ว คัง หลาด เญย ติ่ม หละเปย๊ย เญย เดา เป๋น ปัว ฑั่ง, เหยียด ฑั่ง ลับ เหยียด ฑั่ง.

4เยียม เปย๊า กะเหญี่ย หฑะเฮมียน แหมง ม่าย ติ้ว เจ๊า ด๊าว เหยียด แป๊ะ เดาะ, จั๊ง ฮม์ เหฒียบ เดาะ. ฉงๆ เญย แก้ง ฮวิน มี่ง ป๊ะ ปูง.

5กู้ หงว่าย วั้ว ฑั่ง หญั่น เปียะ เต๋ย กะญั์ว ฯฒฯ เก้า เหบ บุด๋ง เหธา กะเดี๊ย วั้ว เต๋ย อี ฑั่ง,

6เหว่ย หฒุ เป๋น ปัว ฑั่ง หย่า ไม้ ม่าย เดี้ยว ฮนั้ง เยียม กะเหญี่ย วั้ว คัง, หลาด กะญั์ว ม่าย เดี้ยว. เหว่ย น้าย กู้ หงว่าย วั้ว ฑั่ง หญั่น เปียะ กะญั์ว โด ฯฒฯ เก้า เหบ บุด๋ง เหธา กะเดี๊ย วั้ว เต๋ย อี ฑั่ง.

7เปียะ วั้ว ไบ้ เปย๊า เญย เจ๊า ม่าย เพง หฌ่ง เหธา เปย๊า ต๋อย-เฮมียน, เหธา เปย๊า หย่า เหธา กะเหญี่ย วั้ว คัง หลาด แป้ง ป์าย. หฌ่ง ฮม์ เหฒียบ เดาะ ด๊าว,

8เหว่ย หฒุ เยียม นิด กะเหญี่ย วั้ว คัง หลาด วั้ว ไบ้ เปย๊า ด๊าว ฮม์ เหฒียบ เดาะ. มป่า เยียม หฒั่ง ทิน-ฮู่ง เญย เปย๊า ต๋อย-เฮมียน วั้ว เต๋ย ด๊าว เหยียด แป๊ะ เดาะ.

9วั้ว ไบ้ เปย๊า กะเดี๊ย วั้ว ฑั่ง, เซ ยั่ง กะเหญี่ย วั้ว คัง หลาด เปียะ เญย ต๋อง ตง ปูง แหมง ม่าย เจ๊า เปียะ,

10ต้ง กะเหญี่ย วั้ว คัง หฌ่ง เจี์ย กอน เญย ต๋อง. เยียม หฒั่ง ทิน-ฮู่ง เญย เปย๊า น่าม ปูง, ต๋อย เหฒียง หฒั่ง ทิน-ฮู่ง เญย เปย๊า กะเฮลน เญย ขูง-ต๋อง, หย่า ม่าย เหยียด ไบ้ เปย๊า.

11น้าย ไบ้ เปย๊า หฑะเฮมียน แหมง ม่าย ติ้ว เจ๊า. เปย๊า หย่า ฟี่ ฮนั้ง เยียม ป๊ะ ปูง วั้ว ไบ้, ด๊าว เหธา จั๊ง ฟี่ ฮนั้ง เญย. เปียะ ธ้วด เญย ต๋อง, จั๊ง ด๊าว ฟี่ ฮนั้ง เญย. ฉงๆ เญย แก้ง เหธา ป๊ะ ปูง วั้ว เต๋ย เปย๊า ฟี่ ฮนั้ง เญย.

12เยียม น่าม ปูง วั้ว ไบ้ เปย๊า กะเดี๊ย วั้ว ฑั่ง ม่าย เจ๊า เยียม ตง ปูง เปียะ ต้ง เมี่ยน เปียะ วั้ว ติ้ว เจ๊า เญย ต๋อง. เยียม น้าย เต๋ย ต๋อง ต๋อย-เฮมียน ม่าย เพง หฌ่ง เหฆน เจี๊ยน.

13วั้ว ล่าน เมี่ยน บั๋ว เยีย, “เยียม นิด ทิน-ฮู่ง เญย เปย๊า กะเฮลน เญย ขูง-ต๋อง, ป๊ะ ปูง เหธา น่าม ปูง น้าย เต๋ย อี ไบ้ เปย๊า เซ ธีง-เหฑ่ง เญย เปย๊า. เซ มี่ง นิด ฟัด เฒี้ยว เญย ไซ เมี่ยน หญั่น เก้า ธีง-เหฑ่ง เญย กะน้าย เญย ต๋อง. นิ่น บัว หย่า เซียว ฝ่ง ห่อ เก้า ธีง-เหฑ่ง เญย กะน้าย, เซ ฝ่ง ห่อ เญย ล่าง หฒิ เหธา ฟิ ฒุ์ย เญย กะน้าย เหธา โหฒว ต่อง ฒุ์ย เหฒี่ย เญย กะน้าย, เหว่ย หฒุ เป๋น ธีง-เหฑ่ง เญย ต๋อง.

14ไซ เมี่ยน เปียะ ธีง-เหฑ่ง เญย ต๋อง เญย เฒี่ยง โห่ นิ่น บัว ไม้ คู่ ธ้วด เถา กะเหญี่ย วั้ว คัง หลาด. ฒั้ว เถา ไจ๊ ลิ์ว ฒุ เจี๊ยน ฟู-สู เญย ลุย-โหว หธีง ธ้วด เหว่ย หฒุ น้าย เต๋ย ลุย-โหว เซ ธีง-เหฑ่ง. นิ่น บัว อ๋อย หฒุ ฒุ กั้น หญู่ง ลุย-โหว หธีง ต้าย ไฮ่ เปียะ แปะ ฝีง เยียม เญย ต๋อง.”

15วั้ว ล่าน เมี่ยน เดาะ ลิ์ว หฒั่ง ทิน-ฮู่ง เญย เปย๊า กะญั์ว เญย ต๋อง, นิ่น ต้อ เยีย ธ้วด ฮวิน มี่ง ตง ปูง วั้ว เต้า หลาด แก้ง, แอ๋ง เดาะ ฮวีง ก๋อม หฒั่ง ทิน-ฮู่ง เญย เปย๊า เญย เดา.

16นิ่น หล่ง เดาะ เญย ปย๊า เดาะ ตง ปูง. หฒิว ปย๊า-เดาะ ม่าย ฮม์ แป๊ะ เดาะ.

17นิ่น แอ๋ง ฮวิน มี่ง เดาะ ป๊ะ ปูง, หฒิว ปย๊า-เดาะ ม่าย ฮม์ แป๊ะ เดาะ.

18นิ่น แอ๋ง ฮวิน มี่ง เดาะ น่าม ปูง, หฒิว ปย๊า-เดาะ ม่าย ฮม์ แป๊ะ เดาะ.

19นิ่น แอ๋ง ฮวิน มี่ง เดาะ ไฟ ปูง, หฒิว ปย๊า-เดาะ ม่าย ฮม์ แป๊ะ เดาะ.

20นิ่น เดาะ เปยย ปูง ฮวีง ก๋อม เญย หลาด, ด๊าว ฮม์ แป๊ะ เดาะ, จั๊ง ฮม์ แป๊ะ เดาะ. น้าย เซ เหว่ย ปุน ฆอย น้าย เต๋ย ธีง-เหฑ่ง เดา เหธา โพว-ทง เญย เดา.

← Chapter 41 Jump to: Chapter 43 →