Ezekiel 40

Mien Bible (Thai Script) © Thailand Bible Society, 2007

1เยีย บัว หฒุ กว๊าด มี่ง หญี่ เหฒียบ ฮม์ หฮญัง วั้ว หฮญัง, เซ เยลูซาเลม หฒุ ป่าย หว่าย ฆะฮ้า เหฒียบ เฝย หฮญัง, เปียะ เซียง-หฮญัง แซง-เหฒียบ วั้ว ฮนอย, ต้ง วั้ว ฮนอย เฒี้ยว เญย ชะ เยียม เยีย เญย ซิน, นิ่น ฯฒฯ ต้อ เยีย มี่ง.

2เยียม หล่าว ย่าง เญย สี่ ทิน-ฮู่ง ต้อ เยีย มี่ง เถา อิสะลาเอน เต่ย-ปูง, ปุน เยีย เยียม นอม ฮลัง ไห่ เญย บง. เยียม บง กู้ หงว่าย เญย น่าม ปูง ม่าย หญู่ง เฒ้ย ฮนั้ง นอม ฒี่ง นอ.

3นิ่น ต้อ เยีย เถา วั้ว, เยีย ปวัด ล่าน เมี่ยน, โมว เฒ้ย ฮนั้ง ต้ง ซิ, โซ้ว เจี๊ยน หลาด เญย แก้ง ด่าง. ปั์ว นั้น เจี๊ยน ล่าม่า ฮลาง เหธา ปย๊า-เดาะ.

4วั้ว ล่าน เมี่ยน ก๊อง บั๋ว เยีย, “ป้าม เมี่ยน เญย ตอน อ้า! อ๋อย หฒุ หล่ง เม่ย เญย มฒีง หมั่ง หย่า หล่ง เม่ย เญย มน่อม หมวัง หลง. อ๋อย หฒุ หล่ง เฮญี้ยว หมั่ง เยีย ปุน เม่ย ปวัด เญย เหยียด ฒู้ง. เซ เหว่ย น้าย เยีย หธีง ต้อ เม่ย ต้าย น้าย. ตะฟ่าน เม่ย ปวัด เญย, เม่ย อ๋อย หฒุ ก๊อง บั๋ว อิสะลาเอน เมี่ยน.”

5เยีย ปวัด หฒั่ง ทิน-ฮู่ง เญย เปย๊า ฮวีง หฑวน เญย ต๋อง ม่าย หลาด เว่ย ก๋อม. วั้ว ล่าน เมี่ยน นั้น เจี๊ยน เดาะ เญย ปย๊า, ด๊าว จุ๊ เดาะ. โม์ว เดาะ เล่ง เหยียด ปั์ว-ฒ้าง. วั้ว ล่าน เมี่ยน ฯฒฯ เดาะ หลาด. หลาด โฮ์ ด่ง เหยียด ติ้ว ปย๊า-เดาะ, ฮลัง ด่ง เหยียด ติ้ว ปย๊า-เดาะ.

6นิ่น แอ๋ง มี่ง เถา ฮวิน ตง ปูง วั้ว เต้า หลาด แก้ง เญย เจ๊า. นิ่น ฝาว เทย กู้ หงว่าย เดาะ แก้ง เปียะ เญย ต๋อง ด่ง เหยียด ติ้ว ปย๊า-เดาะ โด.

7แอ๋ง ม่าย ติ้ว เจ๊า เปียะ กะญั์ว. อี ปูง เจ๊า กะเฮลน ม่าย ปัว ฉง เซี้ยว แกง เมี่ยน เญย ต๋อง. โม์ว ฉง ด๊าว ด่ง เหยียด ติ้ว ปย๊า-เดาะ, แอ๋ง จั๊ง ด่ง เหยียด ติ้ว ปย๊า-เดาะ. ฉงๆ เหฆน เจี๊ยน บุด๋ง ขูง เญย ต๋อง ปยา เดาะ. เปียะ หฒั่ง ทิน-ฮู่ง เญย เปย๊า กะญั์ว วั้ว คัง หลาด เญย แก้ง ด่าง ด่ง เหยียด ติ้ว ปย๊า-เดาะ โด.

8นิ่น แอ๋ง เดาะ ธ้วด หลาด แก้ง เปียะ กะญั์ว วั้ว คัง หลาด วั้ว ฉง, ม่าย เหฮยียด เดาะ.

9หลาด เดี้ยว โฮ์ อี เดาะ. หลาด แก้ง กะญั์ว วั้ว ฉง เญย แก้ง ฮวิน มี่ง หฒั่ง ทิน-ฮู่ง เญย เปย๊า.

10เยียม ตง ปูง เญย หลาด แก้ง กะญั์ว, อี ปูง ฒู้ง ฟี่ ฮนั้ง เญย. เหยียด ปูง ม่าย ปัว ฉง เซี้ยว แกง เมี่ยน เญย ต๋อง, ฉงๆ ฟี่ ล่ม เญย. น้าย ปูง เญย เดี้ยว เหธา วั้ว ปูง เญย เดี้ยว หย่า ฟี่ ล่ม เญย.

11น้าย ล่าน เมี่ยน แอ๋ง เดาะ เปียะ หลาด เญย แก้ง ด่าง, ม่าย เหฒียบ เดาะ จั๊ง แอ๋ง ม่าย เหฒียบ ฟาม เดาะ ด๊าว.

12เยียม อี ปูง เจ๊า กะเฮลน, เซี้ยว แกง เมี่ยน เญย ฉง, ฉงๆ เญย หฑะเฮมียน แหมง ม่าย เหฆน เญย ต๋อง เหยียด เดาะ ฮลัง. วั้ว เต๋ย ฉง หย่า ฟี่ เฌี้ยด ฟี่ ดาว จุ๊ เดาะ.

13เยียม เหยียด ฉง ฆะฮ้า แหมง หฌ่ง กู้ หงว่าย เถา ต๋อย-หง่าน วั้ว ฉง ฆะฮ้า แหมง หฌ่ง กู้ หงว่าย จั๊ง หญี่ เหฒียบ ฮม์ เดาะ, เซ เยียม ฆะฮ้า แหมง หฌ่ง เญย แก้ง มี่ง เถา ต๋อย-หง่าน วั้ว ปูง ฆะฮ้า แหมง หฌ่ง เญย แก้ง.

14นิ่น เดาะ แก้ง กะญั์ว วั้ว ฉง จั๊ง หญี่ เหฒียบ เดาะ. เยียม แก้ง กะญั์ว วั้ว ฉง กะเฮลน ม่าย หลาด เว่ย ก๋อม.

15เยียม หฑะเฮมียน แหมง วั้ว คัง แก้ง ด่าง เดาะ มี่ง เถา วั้ว ปูง แก้ง กะญั์ว วั้ว ฉง ม่าย ฮม์ เหฒียบ เดาะ.

16เปียะ หลาด แก้ง วั้ว ติ้ว เจ๊า ม่าย ฟง ม่วน เว่ย ก๋อม. ฉงๆ เญย เดี้ยว ม่าย ฟง ม่วน. ฟง ม่วน กะญั์ว จั๊ง, กะเหญี่ย เหบ. แก้ง กะญั์ว วั้ว ฉง ม่าย ฟง ม่วน เว่ย ก๋อม. เยียม เดี้ยว หย่า ม่าย ตาว-เดี๋ยง เญย ฝัง.

17นิ่น แอ๋ง ต้อ เยีย เปียะ กะเหญี่ย วั้ว คัง หลาด เญย กะญั์ว แหมง. เยียม วั้ว เหฆน เจี๊ยน เป๋น เหฒีย ฉง เหฒีย ฉง เญย, ม่าย หละเปย๊ย ติ่ม เจี๊ยน เว่ย ก๋อม หลาด. ม่าย ฟ่า เหฒียบ ฉง ฮวิน มี่ง ติ่ม หละเปย๊ย เญย เจ๊า.

18น้าย เต๋ย ติ่ม หละเปย๊ย เญย เดา หย่า เยียม เต้าๆ หลาด แก้ง เญย เจ๊า อี ปูง กะเฮลน, ด๊าว นั้ง ฟี่ ฮนั้ง เญย. น้าย เซ ไอ๊ เญย วั้ว คัง ติ่ม หละเปย๊ย เญย ต๋อง.

19น้าย ล่าน เมี่ยน เยียม ไอ๊ วั้ว เต้า หลาด แก้ง กะญั์ว แหมง เดาะ มี่ง เถา เปียะ กะญั์ว วั้ว คัง หลาด เญย แก้ง กะเหญี่ย, ม่าย เหยียด แป๊ะ เดาะ. มี่ง ตง ปูง เหธา ป๊ะ ปูง หย่า ฟี่ ฮนั้ง เญย.

20วั้ว ล่าน เมี่ยน แอ๋ง เดาะ กะเหญี่ย วั้ว คัง หลาด กะญั์ว แหมง, ฮวิน มี่ง ป๊ะ ปูง วั้ว เต้า แก้ง ด่ง หาย จั๊ง, ด่ง หาย ด๊าว.

21เปียะ แก้ง กะเฮลน, เหยียด ปูง ม่าย ปัว ฉง เซี้ยว แกง เมี่ยน เญย ต๋อง. เดี้ยว เหธา เปียะ หลาด แก้ง วั้ว ฉง เหธา ตะเยี้ยด เต้า แก้ง เญย ธิ-หธุน ฟี่ ฮนั้ง เญย, ด๊าว ฮม์ เหฒียบ เดาะ, จั๊ง หญี่ เหฒียบ ฮม์ เดาะ.

22ฟง ม่วน เหธา เปียะ หลาด แก้ง วั้ว ฉง เหธา ติว ต้าย เญย ตาว-เดี๋ยง เหธา ฮวิน ตง ปูง แก้ง เญย ธิ-หธุน ฟี่ ฮนั้ง เญย. ม่าย เสี่ย คัง เทย ฝาว กู้ หงว่าย เถา เปียะ แก้ง เญย ต๋อง. หย่า ม่าย แก้ง กะญั์ว วั้ว ฉง.

23ฮนั้ง ฮวิน ตง ปูง เญย แก้ง, ฮวิน ป๊ะ ปูง เญย แก้ง ต๋อย เหฒียง เปียะ กะญั์ว วั้ว คัง หลาด เญย แก้ง ฟี่ ฮนั้ง เญย. เยียม น้าย ปูง แก้ง เดาะ มี่ง เถา วั้ว ปูง แก้ง ม่าย เหยียด แป๊ะ เดาะ.

24วั้ว ล่าน เมี่ยน แอ๋ง ต้อ เยีย มี่ง เถา น่าม ปูง. เยียม น่าม ปูง หย่า ม่าย เต้า แก้ง. นิ่น ฯฒฯ เดาะ เดี้ยว เหธา เปียะ แก้ง กะญั์ว วั้ว ฉง. น้าย เต้า แก้ง เหธา วั้ว เต๋ย แก้ง เญย ธิ-หธุน ฟี่ ฮนั้ง เญย.

25เปียะ น้าย เต้า แก้ง เญย เจ๊า เหธา เปียะ แก้ง กะญั์ว วั้ว ฉง ม่าย ฟง ม่วน เว่ย ก๋อม, เหธา วั้ว เต๋ย ฟง ม่วน ฟี่ ฮนั้ง เญย. น้าย เต๋ย ต๋อง ด๊าว ฮม์ เหฒียบ เดาะ, จั๊ง หญี่ เหฒียบ ฮม์ เดาะ.

26ม่าย เสี่ย คัง เทย ฝาว กู้ หงว่าย เถา วั้ว เต้า แก้ง, หย่า ม่าย แก้ง กะญั์ว วั้ว ฉง. นอมๆ เดี้ยว ติว เจี๊ยน ตาว-เดี๋ยง, เหยียด ปูง ม่าย ติ้ว.

27เยียม กะญั์ว วั้ว คัง หลาด เญย น่าม ปูง ม่าย เต้า แก้ง. นิ่น ฯฒฯ เยียม น้าย เต้า แก้ง เดาะ เถา ฮวิน น่าม ปูง วั้ว เต้า แก้ง, ม่าย เหยียด แป๊ะ เดาะ.

28วั้ว ล่าน เมี่ยน ต้อ เยีย ยั่ง น่าม ปูง เญย หลาด แก้ง เปียะ กะญั์ว วั้ว คัง หลาด. นิ่น ฯฒฯ เดาะ กะญั์ว น่าม ปูง วั้ว คัง แก้ง. น้าย เต้า แก้ง เหธา วั้ว เต๋ย แก้ง ฟี่ ล่ม เญย.

29กะเฮลน วั้ว เต๋ย เซี้ยว แกง เมี่ยน เญย ฉง เหธา วั้ว เต๋ย เดี้ยว เหธา แก้ง กะญั์ว แหมง วั้ว ฉง เหธา วั้ว เต๋ย กั้น เต้า หลาด แก้ง ฟี่ ล่ม เญย. ม่าย ฟง ม่วน เว่ย ก๋อม. แก้ง กะญั์ว วั้ว ฉง หย่า ม่าย ฟี่ ฮนั้ง เญย. เยียม น้าย ปูง แก้ง เถา วั้ว ปูง แก้ง ด๊าว ฮม์ เหฒียบ เดาะ, จั๊ง หญี่ เหฒียบ ฮม์ เดาะ.

30ปูงๆ หย่า ม่าย เหยียด ฉง เหยียด ฉง. ฉงๆ ด๊าว หญี่ เหฒียบ ฮม์ เดาะ, จั๊ง ปยา เดาะ.

31แก้ง กะญั์ว วั้ว ฉง ฮวิน มี่ง กะเหญี่ย วั้ว คัง หลาด. เดี้ยว หย่า ติว เจี๊ยน ตาว-เดี๋ยง หย่า ม่าย เหฮยียด คัง เทย ฝาว เถา แก้ง.

32นิ่น แอ๋ง ต้อ เยีย มี่ง กะญั์ว วั้ว คัง หลาด, เถา ตง ปูง วั้ว ปูง ฯฒฯ เดาะ ตง ปูง แก้ง, ปวัด เหธา วั้ว เต๋ย แก้ง ฟี่ ฮนั้ง เญย.

33กะเฮลน วั้ว เต๋ย เซี้ยว แกง เมี่ยน เญย ฉง เหธา วั้ว เต๋ย เดี้ยว เหธา แก้ง กะญั์ว แหมง วั้ว ฉง เหธา วั้ว เต๋ย หลาด แก้ง ฟี่ ล่ม เญย. ม่าย ฟง ม่วน เว่ย ก๋อม. แก้ง กะญั์ว วั้ว ฉง หย่า ม่าย ฟี่ ฮนั้ง เญย. เยียม น้าย ปูง แก้ง เถา วั้ว ปูง แก้ง ด๊าว ฮม์ เหฒียบ เดาะ, จั๊ง หญี่ เหฒียบ ฮม์ เดาะ.

34แก้ง กะญั์ว วั้ว ฉง ฮวิน มี่ง กะเหญี่ย วั้ว คัง หลาด. อี ปูง เญย เดี้ยว ติว เจี๊ยน ตาว เญย เดี๋ยง, หย่า ม่าย เหฮยียด คัง เทย ฝาว เถา แก้ง.

35นิ่น แอ๋ง ต้อ เยีย เถา ป๊ะ ปูง เญย แก้ง ฯฒฯ เดาะ. ปวัด เหธา วั้ว เต๋ย ฟี่ ล่ม เญย.

36กะเฮลน เญย วั้ว เต๋ย เซี้ยว แกง เมี่ยน เญย ฉง เหธา วั้ว เต๋ย เดี้ยว เหธา แก้ง กะญั์ว แหมง วั้ว ฉง เหธา วั้ว เต๋ย หลาด แก้ง ฟี่ ล่ม เญย. ม่าย ฟง ม่วน ฮวีง ก๋อม. เยียม น้าย ปูง แก้ง เถา วั้ว ปูง แก้ง ด๊าว ฮม์ เหฒียบ เดาะ, จั๊ง หญี่ เหฒียบ ฮม์ เดาะ.

37แก้ง กะญั์ว วั้ว ฉง ฮวิน มี่ง กะเหญี่ย วั้ว คัง หลาด. อี ปูง เญย เดี้ยว หย่า ติว เจี๊ยน ตาว-เดี๋ยง. หย่า ม่าย เหฮยียด คัง เทย ฝาว เถา แก้ง.

38เยียม แก้ง กะญั์ว วั้ว ฉง เญย เดี้ยว กะเฮลน ม่าย เหยียด ฉง หย่า ม่าย แก้ง เปียะ. เซ หฑาว ปั๊ว เหฒี่ย เญย แซง-คู้ เญย ต๋อง.

39หลาด แก้ง กะญั์ว วั้ว ฉง กะเฮลน ม่าย เปยย นอม เตี้ย, เหยียด ปูง ม่าย อี นอม. น้าย เต๋ย เตี้ย หล่ง ไต๋ ปั๊ว เหฒี่ย เญย แซง-คู้ เหธา ฟิ ฒุ์ย เญย แซง-คู้ แอ๋ง เหธา โหฒว ต่อง ฒุ์ย ฟิ เญย แซง-คู้.

40เยียม กะเหญี่ย วั้ว คัง แก้ง ด่าง, เซ ป๊ะ ปูง เปียะ แก้ง เญย ต๋อง, ม่าย อี นอม เตี้ย. หลาด แก้ง กะญั์ว วั้ว ปูง หย่า ม่าย อี นอม เตี้ย.

41เยียม กะญั์ว หย่า ม่าย เปยย นอม. เปียะ หลาด แก้ง วั้ว ฉง กะเหญี่ย แอ๋ง ม่าย เปยย นอม. ม่าย เหฮยียด นอม เตี้ย. นิ่น บัว ปั่ง น้าย เต๋ย เตี้ย ไต๋ ฝ่ง ห่อ เหฒี่ย เญย แซง-คู้.

42เหว่ย ปั๊ว เหฒี่ย เญย แซง-คู้ ม่าย เปยย นอม เตี้ย เป๋น หฒุ ต้าย เญย หละเปย๊ย, ด๊าว เดาะ เปี๋ยน, จั๊ง เดาะ เปี๋ยน, ฮลัง เหยียด เดาะ. น้าย เต๋ย เตี้ย หล่ง อัน จา-ต๋อง เหว่ย หลิ่ว เล์ย ฝ่ง ห่อ ปั๊ว เหฒี่ย เญย แซง-คู้ เหธา เหฒี่ย เหว่ย กั้น หญู่ง เจ๊า เญย กะน้าย.

43แอ๋ง ม่าย เงา เหยียด ปั์ว-ฒ้าง จั๊ง ขวัง เจี๊ยน ฮวีง ก๋อม กะญั์ว เญย หฌ่ง. น้าย เต๋ย เตี้ย เซ เหว่ย อัน ฝ่ง ห่อ เหฒี่ย เญย แซง-คู้ อ๊อ.

44วั้ว ล่าน เมี่ยน ฯฒฯ ต้อ เยีย เยียม กะเหญี่ย เปียะ กะญั์ว วั้ว คัง หลาด. วั้ว คัง หลาด กะญั์ว ม่าย อี ฉง. ม่าย เหยียด ฉง เยียม ป๊ะ ปูง เญย แก้ง กะเฮลน ฮวิน มี่ง น่าม ปูง. ม่าย ฉง เยียม น่าม ปูง เญย แก้ง กะเฮลน ฮวิน มี่ง ป๊ะ ปูง.

45นิ่น ก๊อง บั๋ว เยีย, “ฮวิน น่าม ปูง วั้ว ฉง เซ ปุน โก๋ว หฒั่ง ทิน-ฮู่ง เญย เปย๊า วั้ว เต๋ย ไซ เมี่ยน.

46ฮวิน มี่ง ป๊ะ ปูง วั้ว เต๋ย เซ ปุน โก๋ว เหฒี่ย-ต้อง เญย ไซ เมี่ยน. น้าย เต๋ย ไซ เมี่ยน เซ สาโดก เญย เฒ้ย-ฟุน. ขูง น้าย เต๋ย เลวี เมี่ยน ฮนั้ง ไฮ่ มี่ง นิด ฟัด เฒี้ยว เหว่ย ฟู-สู นิ่น.”

47นิ่น แอ๋ง เดาะ หลาด กะญั์ว, ด๊าว เหยียด แป๊ะ เดาะ, จั๊ง เหยียด แป๊ะ เดาะ, เซ เฝย-ปูง ฟี่ ฮนั้ง เญย. เหฒี่ย-ต้อง หย่า เยียม หฒั่ง ทิน-ฮู่ง เญย เปย๊า หฑะเฮมียน แหมง.

48นิ่น แอ๋ง ต้อ เยีย มี่ง เถา หฒั่ง ทิน-ฮู่ง เญย เปย๊า ธับ ธ้วด หฑะเฮมียน แหมง วั้ว นอม ต๋อง. เดาะ วั้ว นอม ต๋อง เญย เดี้ยว. อี ปูง กะเฮลน ม่าย ปยา เดาะ. ธับ ธ้วด วั้ว เต๋ย ต๋อง เญย แก้ง จั๊ง เหฒียบ เฝย เดาะ, อี ปูง แก้ง กะเฮลน ปัว เดาะ.

49ธับ ธ้วด เญย ต๋อง ด๊าว หญี่ เหฒียบ เดาะ, จั๊ง เหฒียบ เยี้ยด เดาะ. หย่า ม่าย เหฒียบ คัง เทย ฝาว. อี ปูง แก้ง กะเฮลน เญย เดี้ยว หย่า ม่าย ต้ม เดี้ยว.

← Chapter 39 Jump to: Chapter 41 →