Isaiah 22

Mien Bible (Thai Script) © Thailand Bible Society, 2007

← Chapter 21 Jump to: Chapter 23 →

1น้าย เซ ก๊อง หิ่น ย่าง เญย ฮ์อง เญย หว่า. เม่ย บัว ม่าย หาย หญู่ง สี่ ธ้วด เม่ย บัว เหยียด ฒู้ง หธีง ฝาว เปย๊า-ง่อ?

2เม่ย บัว เญย มู้ง ม่าย บุย เญย เฉีย ปวั๊ง เหฑ่ง. ม่าย เบี้ยวๆ, เหน่า หญิด เญย ฒี่ง อ้า! เยียม เม่ย บัว บุด๋ง หฒุ ไต๋ เญย เมี่ยน, ไม้ เฒ์ย หฒุ หฑุ ด๊าว ไต๋, หย่า ไม้ เฒ์ย เหว่ย เบ๊าะ จ๋า ไต่.

3เม่ย บัว เญย เหยียด ฒู้ง เจียน ล่ม ฑ่อย เปย๋า, เลี่ยม จวัง-หฒิน ไม้ ตุ๊ ป๊วน หย่า หฒุ เฒาะ หมี่ อ๊ะ. ไม้ กุ๊น เปย๋า มี่ง ด่ง หาย โก, ตะฟ่าน ล์อ ปวัด เญย, เม่ย บัว เหยียด ฒู้ง หฒุ เฒาะ หมี่ อ๊ะ.

4เหว่ย น้าย เยีย ก๊อง, “ไม้ ตู๋ง หมั่ง เยีย อ๊ะ. เหว่ย เยีย เญย แปะ ฝีง หฒุ เหมียด, ปุน เยีย เฮญี้ยว มุน เญย เญี้ยม. ไม้ ตู๋ง กวั่ง ชะ ออน เยีย เญย เฮญี้ยว อ๊ะ.”

5เหว่ย หฒุ เฒี้ยว, เน่น เจี๋ย เญย ทิน-ฮู่ง, ม่าย นอม ฮนอย ปุน หิ่น ย่าง เญย ฮ์อง ม่าย เมี่ยน เบี้ยวๆ เญย, ม่าย เหธว หลุ่น เญย, ม่าย ธ้าย เญย สี่. ฒี่ง หลาด อ๋อย หฒุ เบ๊าะ บาง, ม่าย เห่ว เญย เฉีย บุย แอ๊ง เถา บง.

6เอลาม ต้อ เจี๊ยน ฟอง-ด้ง, แอ๋ง ม่าย เบ๊าะ จ๋า เญย ม์า-เธีย เหธา เก้ ม์า แปง. คีอา เฒาะ ธ้วด ท้อง-ป้าย.

7เม่ย บัว เก้า หลง เจี๋ย เญย ฮ์อง ม่าย เบ๊าะ จ๋า เญย ม์า-เธีย ปวั๊ง เหฑ่ง. เก้ ม์า แปง หย่า มี่ง เยียม เจี๊ยน ฒี่ง แก้ง ด่าง.

8ทิน-ฮู่ง เฒาะ ฆอย ท้อง ยูดา เญย กะน้าย. เถา วั้ว ฮนอย เม่ย บัว ฯฒฯ เยียม ม่าย บั๋ว เห่ว เก้ม วั้ว นอม เปย๊า, เฒาะ เบ๊าะ จ๋า เญย หวัวะ กิ่น ธ้วด.

9เม่ย บัว ปวัด ดาวิด เญย ฒี่ง เญย ฒี่ง หลาด ทง เหฒีย นอม ต๋อง. เม่ย บัว หย่า เซียว ววม เยียม วั้ว เดี๊ย เญย ววม-ต้ม.

10เม่ย บัว ซ้าว เยียม เยลูซาเลม เญย เปย๊า, หย่า แธะ เปย๊า เหว่ย หล่ง หฒ่อ ฒี่ง หลาด.

11เยียม อี ปูง ฒี่ง หลาด บุด๋ง นิ่น บัว โหฒว นอม ต๋อง เหว่ย เซียว โล์-ววม-ต้ม เญย ววม. มป่า เม่ย บัว ไม้ เขา โหฒว ธ้วด น้าย เต๋ย สี่ เญย ทิน-ฮู่ง. เม่ย บัว ไม้ จั๋ง โล์-ฮนอย ต๊า ธ้วด น้าย หญู่ง หฒะเอ๋ย วั้ว เต้า.

12เยียม วั้ว ฮนอย, เฒี้ยว, เน่น เจี๋ย เญย ทิน-ฮู่ง, เห่ว เม่ย บัว เญี้ยม ตุ๊ เฑ่า เญย, เถย มฆ้อง ฌัง, ฒุ ล่าม่า เดีย-โธว.

13ต๋าว หฑวน, ม่าย เฌียน-โย่ว เหน่า หญิด, ไต๋ ง่ง ไต๋ ปะกี ยู่ง, หญั่น อ๊อ, ฮบ อะหงุ่น ติ๊ว. เม่ย บัว ก๊อง, “กุ๊น หญั่น กุ๊น ฮบ เหว่ย หฒุ ฌัง ฮนอย เยีย บัว ไต่ อ๊ะ.”

14เน่น เจี๋ย เญย เฒี้ยว กั้น ฮนั้ง น้าย นอ ก๊อง ปุน เยีย หมวัง, “น้าย เต๋ย ฒุ์ย เยีย ด่ง หาย ฒู้ง ไม้ กวั่ง เถา เม่ย บัว ไต่.” น้าย เซ เฒี้ยว, เน่น เจี๋ย เญย ทิน-ฮู่ง, ก๊อง เญย หว่า.

15เฒี้ยว, เน่น เจี๋ย เญย ทิน-ฮู่ง, ฮนั้ง น้าย นอ ก๊อง, “มี่ง อ๊ะ. มี่ง ล์อ กุ๊น ฮู่ง ติ่น เญย ต้ม เจียน, เซ มี่ง ล์อ เซ้บนา ก๊อง บั๋ว นิ่น,

16‘เม่ย ม่าย หาย หญู่ง เล์ย เยียม น้าย? ม่าย เม่ย เญย หาย เต้า เมี่ยน เยียม น้าย เม่ย หธีง เยียม น้าย เหว่ย กั้น หฒุ นอม โฒ้ว? เม่ย เยียม น้าย ฮลัง เญย ต๋อง หฒุ โฒ้ว, เซ หฒุ หละเปย๊ย เหว่ย โหฒว เม่ย กั้น เญย โฒ้ว.

17“‘โอ เม่ย น้าย เต้า เมี่ยน เฮ้น เมี่ยน อ้า! เฒี้ยว อ๋อย หล่ง ต้ม ชะ ฒอย เม่ย กวั่ง. นิ่น อ๋อย เฒาะ เม่ย นั้น เหฒียด,

18เฒาะ เม่ย ฌุ่น เจี๊ยน ฮนั้ง นอม กะน้าย จุ้น เญย, แอ๋ง ฒอย เปียะ นอม โฮล, จั๊ง เญย เต่ย-ปูง. เยียม หน่าย เม่ย ฯฒฯ ไต่, เม่ย เญย ฌัง-หล่าง เญย ม์า-เธีย หย่า อ๋อย หฒุ กวั่ง เจี๊ยน หน่าย. เม่ย เซ ปุน เม่ย เญย เฒี้ยว เญย เปย๊า ฒง เมี่ยน หฒุ ไญ้.

19เยีย อ๋อย หฒุ่น เม่ย ธ้วด โหฒว เจียน เญย เม่ง, อ๋อย ถุย เม่ย ธ้วด ไม้ ตุ๊ โหฒว เจียน.’

20“วั้ว ฮนอย เยีย อ๋อย เห่ว เยีย เญย โปว, ฮินคียา เญย ตอน, เอลียาคิม, ต้าย.

21เยีย อ๋อย เฒาะ เม่ย เญย ลุย-ด๊าว ปุน นิ่น ฒุ, แอ๋ง เฒาะ เม่ย ไซ จ๊าย เญย เดีย เถง นิ่น ไซ เจี๊ยน. เยีย หย่า อ๋อย เฒาะ เม่ย เญย หัด ม์า จิว ปุน นิ่น, นิ่น ฯฒฯ โหฒว ฮนั้ง เตีย เหว่ย เยลูซาเลม เมี่ยน เหธา ยูดา เญย เฒ้ย-ฟุน.

22เยีย อ๋อย เฒาะ ดาวิด เญย เฒ้ย-ฟุน เญย ฟ้อ-เฒ่ย จิว ปุน นิ่น. นิ่น คอย, ไม้ ม่าย หาย เต้า กวน. นิ่น กวน, ไม้ ม่าย หาย เต้า คอย.

23เยีย อ๋อย ปุน นิ่น เยียม ตุ๊ ว้วน เญย, ฮนั้ง หล่ง เดี๋ยง-ตีง ตีง เจี๊ยน ว้วน เญย ต๋อง นอ. เหว่ย นิ่น โหฒว เญย สี่, เมี่ยน ฯฒฯ ท่าย นิ่น เญย โต้ว ฒง.

24นิ่น เญย โต้ว ฒง เมี่ยน เหยียด ฒู้ง ตอน เซียะ เฒ้ย-ฟุน อ๋อย ปั่ง นิ่น ฮนั้ง ฟิ้ว-จา-ต๋อง, เซ ติ๊ว-ฒ้าน เหธา ติ๊ว-ก่อง, ขวัง เจี๊ยน นิ่น.”

25เน่น เจี๋ย เญย เฒี้ยว ก๊อง, “เถา วั้ว ฮนอย, ตีง เจี๊ยน ว้วน เญย ต๋อง เญย เดี๋ยง-ตีง ฯฒฯ หฒุ ก๊าด ดุ๊ด มี่ง, ด๊อด กะเดี๊ย เดา. ขวัง เจี๊ยน เดี๋ยง-ตีง เญย กะน้าย ฯฒฯ หฒุ ไพ เหฌี่ย เหฑ่ง.” เหว่ย หฒุ น้าย เซ เฒี้ยว ก๊อง เญย หว่า.

← Chapter 21 Jump to: Chapter 23 →